Mareko 13:24-32

²⁴“Eme bâŋeŋkerâ weaŋsic nânâ qaʒueha ʒoaŋ gâpârezokac â mosa tatamacne arictac ezokac

²⁵â bâpiŋ gâcne tararâ mâreŋko wahanʒoŋgopieŋ. Ehame sambâŋ qiriŋ qame tâpirine ŋeŋgoroŋkezokac.

²⁶Eme Ŋic Fâri Wâtuŋne e karorac faio ŋehuc ɋuŋɋasaŋ bâric bâricnehec fisime jaŋe hone ʒâirenʒoŋgopieŋ.

²⁷Ehuc aŋelo sorec‐jopame jaŋe bâwosâecfâc‐ticne mâreŋ ŋifec â ŋifec, faic â juwic, sambâŋ â mâreŋ qaŋeŋ‐jekickonec qânusuc‐jopanʒoŋgopieŋ.

²⁸“Firindoaczi mâsi eekac irec manasuhuc fuŋne mananʒepieŋ. E âric qame honerâ mueŋgopieŋ ‘Ʒoaŋ dameŋ bembeŋkekac’.

²⁹Eme ŋoŋe iŋuc jaha, ŋazakopac wiac i fua‐fâreme ʒiŋuc munʒepieŋ: ‘E maic‐nâpozo ehuc motâc râpeo domakac’.

³⁰No jâmbomac ŋazape: Mâreŋ ʒirec rune mi sisirowe jufehuc juhapie wiac sasawa fua tarazokac.

³¹Sambâŋ â mâreŋ jahe sirowezokopirec, nore dâŋ ine mi sirowe‐jâmbâŋkezokac.

³²Erâ dameŋ sâko irec ʒoaŋ me aua ŋic moczi mi mana‐jâmbâŋkekac, sambâŋko aŋelo jaŋe wâc mi manaŋgopieŋ, Ŋokâzi wâc mi manakac, Mamac e buc manakac.