Marcos 13:24-32

²⁴»Ekꞌuchiriꞌ ikꞌowinaq chi ri kꞌaxkꞌobꞌik che taq laꞌ laꞌ qꞌij, kuꞌan qꞌequꞌm uwach riꞌ ri qꞌij, y ri ikꞌ na kuya ta chi ruwonibꞌal.

²⁵Ri chꞌumil ketzaq lo che ruwa kaj, y konoje ri kꞌo kichuqꞌabꞌ che ruwa kaj keyikiyoꞌxik.

²⁶Ekꞌuchiriꞌ, kilitaj Ralaxel Chikixoꞌl Tikawex kakꞌun lo pa sutzꞌ rukꞌ runimal uchuqꞌabꞌ y rukꞌ runimal uchomalil.

²⁷Kebꞌutaq kꞌu ru ángeles che umolik kichiꞌ konoje ri ebꞌuchaꞌom ri Dios pa taq ronoje luwar che rukajchal rajlibꞌal ruwachulew. Kujeq kꞌu riꞌ che jun luwar, yey kukꞌisbꞌej che jun chik.

²⁸»E chimaja ri jun kꞌambꞌal naꞌoj puwi ri cheꞌ re higo: Echiriꞌ kujeq katux lo kꞌakꞌ uqꞌabꞌ y kujeq kꞌut katux ruxaq, ruma kꞌu laꞌ kiwetaꞌmaj xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.

²⁹Jekꞌuriꞌlaꞌ riꞌix, echiriꞌ kiwilo kuꞌana ronoje taq waꞌ, chiwetaꞌmaj kꞌu riꞌ xa naqaj chi kꞌo wi lo ruqꞌijol rukꞌunibꞌal Ralaxel Chikixoꞌl Tikawex.

³⁰Paqatzij wi kambꞌiꞌij chiwe: E kꞌo tikawex re waꞌ wa qꞌij na kekam tana we na xkil tubꞌi ronoje waꞌ.

³¹Ruwa kaj y ruwachulew xa kasach uwach, noꞌj taq ri nuchꞌaꞌtem na kasach ta uwach.

³²»Ekꞌu chwi ruqꞌijol y ruꞌorayil waꞌ, na jinta junoq etaꞌmayom re; na ketaꞌam tane ri ángeles e kꞌo chilaꞌ chikaj, na retaꞌam tane ri Kꞌajolaxel, ma xew ri Qaqaw Dios etaꞌmayom re.