MAREK 5:12-37

¹²a o demona les mangenas: “Bičhav amen andre kale bale, hoj te džas andre lende.”

¹³O Ježiš lenge takoj domukľa a o nalačhe duchi gele avri andral o manuš andro bale. Calo stados, vaj duj ezera (2 000) bale, denašenas tele le brehoha andro moros a tašľile.

¹⁴Ola džene, save pasinenas le balen, denašle a phende ada avri andro foros the pro maľi a o manuša avle te dikhel, so pes ačhiľa.

¹⁵Sar avle ko Ježiš a dikhle oles, andre savo sas oda Legion, hoj bešel a hino urdo andro gada a hino paš e goďi, predaranďile.

¹⁶Ola, save ada dikhle, vakerenas lenge, so pes ačhiľa oleha, andre savo sas nalačhe duchi, the le balenca.

¹⁷Avke mangenas le Ježiš, hoj te džal avri andral lengeri phuv.

¹⁸Sar džalas o Ježiš andre loďka, mangelas les oda manuš, či šaj džal leha.

¹⁹O Ježiš leske na domukľa, ale phenďa leske: “Dža khere ke tiri famelija a phen lenge avri, save bare veci tuke kerďa o Raj the savo lačhipen tuke presikaďa.”

²⁰Geľa a chudľa te vakerel andro Dekapolis, save bare veci leske kerďa o Ježiš; a savore pes čudaľinenas.

²¹Sar pale preplavinde pre oki sera le moroskeri, avle ke leste paš o moros igen but manuša.

²²Avľa ko Ježiš o Jairus, jekh vodcas andral e sinagoga. Sar les dikhľa, peľa paš leskere pindre

²³a igen les mangelas: “E čhajori mange merel. Mangav tut, hoj te aves te thovel pre late o vasta, hoj te sasťol avri a te dživel.”

²⁴Avke o Ježiš odgeľa leha. Džanas pal leste igen but manuša a ispidenas les pal savore seri.

²⁵Sas ode jekh džuvľi, savi sas dešuduj (12) berš nasvaľi pro džuvľikano nasvaľiben.

²⁶Diňa savore peskere love avri le doktorenge a igen but lendar cerpinďa, no na sas lake feder, ale ča furt goreder.

²⁷Sar šunďa pal o Ježiš, oj avľa maškar o nipi ko Ježiš palunestar a dotkňinďa pes leskere ruchostar.

²⁸Bo phenďa peske: “Ča te man leskere ruchostar dotkňinava, sasťuvava avri.”

²⁹Takoj lake preačhiľa o rat te džal andral o ťelos a šunďa andre peste, hoj hiňi avrisasťarďi le nasvaľibnastar.

³⁰O Ježiš takoj džanľa, hoj lestar e zor geľa avri, visaľiľa ko manuša a phučľa: “Ko pes dotkňinďa mire ruchostar?”

³¹O učeňika leske odphende: “Se dikhes, hoj tut o manuša ispiden pal savore seri, a tu phučes: ‘Ko pes mandar dotkňinďa?’ ”

³²Ale o Ježiš dikhelas pašal peste, hoj te dikhel, ko ada kerďa.

³³E džuvľi izdralas daratar – bo džanelas, so pes lake ačhiľa – peľa angle leste pro khoča a phenďa avri calo čačipen.

³⁴Ov lake phenďa: “Čhaje miri, tiro pačaben tut sasťarďa. Dža andro smirom. Av sasťi andral tiro nasvaľiben.”

³⁵Medik ov laha vakerelas, avle o nipi khatar o Jairoskero kher a phende leske: “Tiri čhajori imar muľa. De smirom le Učiťeľis.”

³⁶Sar o Ježiš šunďa, so le Jairoske vakerde, phenďa leske: “Ma dara tut, ča pača!”

³⁷Paľis na domukľa ňikaske pal peste te džal, ča le Peteriske, Jakoboske the leskere phraleske, le Janoske.