Marcos 5:12-37

¹²Nemoyò se menge bosaw diyà ki Jesus, kagi dan, “Aw mepakay diyà kamno, malin kay doton te menge osa sìyan.”

¹³Yan impealin din dan. Limowà se menge bosaw lekat te otaw aw minalin dan doton te osa. Penga niyan, kimagnan se kedita te osa pesalo te keba, aw kimahang dan doton te lanaw. Nelemes se kedita dan menge dowa melalan.

¹⁴Penga niyan, kimadas se menge telediyaga te osa aw mig-indan dan tepad kenyan doton te lonsod aw kedepagan niyan. Penga niyan, dimoton se menge otaw inindanan dan amon komità dan kenyan.

¹⁵Pegdateng dan doton ki Jesus, kinità dan se otaw pinelowaan te minelalan se bosaw. Nenenoo sikandin, aw nenelowal den, aw migkèpiya den. Pegkità dan kenyan, nelemitan dan.

¹⁶Inindanan dan heman te menge otaw kimità kenyan tepad te neinang diyà te otaw sìyan aw menge osa.

¹⁷Lekat niyan, nemoyò dan te mesayo si Jesus lekat te ogpeanan dan.

¹⁸Penga niyan, te pegsakay i Jesus te belangay, nemoyò se otaw pinelowaan te bosaw aw mepakay sikandin tomaking.

¹⁹Meneng wedà din petekingi, so inikegiyan i Jesus, “Olì ka den doton te menge kedomaan nikaw, aw peg-indan ka kandan tepad te mèpiya ininang te Pengolo kamno, aw keido din kamno.”

²⁰Penga niyan, nesayo sikandin aw mig-indan doton te Dikapolis tepad te mèpiya ininang i Jesus diyà kandin. Yan se doun te nepela se kedita te otaw inindanan din.

²¹Pegbatas i Jesus doton dipag te lanaw, ontò medita se otaw netipon diyà kandin doton te kilid te lanaw.

²²Penga niyan, dimoton ki Jesus se sebad obanen te simbahan te Judiyo, ngadan din si Jairo. Pegkità din ki Jesus, limongken sikandin

²³aw nemoyò, kagi din, “Ontò netigdaan se deitek batà ko bayi. Peg-ayas ka bag, aw pemàdi sikandin amon kegolian aw eked kematay.”

²⁴Penga niyan, timaking si Jesus kandin. Ontò medita se doma otaw timaking ki Jesus aw migpesegsegay dan kidoen te dalan.

²⁵Nayan, doen heman sebad bayi timaking kandin pigdipenogan te sempolò den teg dowa se omay.

²⁶Medita se doktor migbolong kandin, aw neamin se kedakel te kwarta din. Ontò sikandin ineleg, so pengkey eden se imbolong dan kandin, meneng labi den beling medaet se mesakit din.

²⁷Pegdineg din tepad te eg-inangen i Jesus, dimoton sikandin aw migpedapag diyà te getan din aw nemaed te saol din,

²⁸so tapay sikandin mig-aneng-aneng te megolì se mesakit din aw pemàdan din olò se saol i Jesus.

²⁹Pegketà, negolì se mesakit din, aw mig-imanman sikandin te mèpiya den se lawa din.

³⁰Pegketaga-taga i Jesus te doen neinang pineokit te tolos din, miniling sikandin aw timengteng diyà te menge otaw timaking kandin, aw minikagi, “Sinu lay se nemaed te saol ko?”

³¹Minikagi se menge tinoledaan din, “Ikà eg-insà aw sinu se nemaed kamno, so pigdenganan ka te medita otaw.”

³²Meneng gayed timengteng si Jesus diyà te kedita dan amon kitaen din aw sinu se nemaed kandin.

³³Nelemitan se bayi sìyan, so netegahan din te negolì den se mesakit din. Yan migpedapag sikandin diyà ki Jesus aw tinegangtang tandà te lamit din. Limongken sikandin diyà ki Jesus aw mig-indan kandin te kedita tepad te mesakit din aw pegkegolì niyan.

³⁴Penga niyan, minikagi si Jesus, “Atà, simalig ka diyà kanak, aw yan se doun te negolian ka. Olì ka den. Mèpiya den se pedowan aw lawa nikaw.”

³⁵Telobo pa minikagi si Jesus diyà te bayi, dimateng se otaw lekat te balay te obanen te simbahan, aw minikagi diyà ki Jairo, “Nematay den se batà nikaw. Wedad den kekemowan te pegpedeleg no te Menenoladà doton te balay nikaw.”

³⁶Meneng wedà segmani i Jesus se inikagi dan. Minikagi sikandin diyà ki Jairo, “Ikà egkepuluk, meneng salig ka diyà kanak.”

³⁷Wedad doma otaw impetaking i Jesus doton te balay, meneng olò si Pedro, aw si Santiago, aw adi i Santiago si Juan.