Maaruku 5:12-37

¹²Masheethwani apale khusala anvekela Yinsa yoori: “Onirume yoori neette nkuluwe mphule.”

¹³Yinsa khwinkha ruhusa masheethwani apale, khusaruwa khweetta nkuluwe. Liphanko laarina thamani ya alufu piiri za kuluwe, khwaaza otthira zilankhaka omwaako ziishukhelaka mpahari, zooshi khuzama khufwa.

¹⁴Apale aari oshukaaye kuluwe zaya epile, khutthira khulawa olupa vitthu epile zaarettikhaniyeeyo waaza nsitati mpakha mmashapa, atthu khulankha olawa woona epile zaarettikhaniyeeyo.

¹⁵Wakathi amwaattamiyeeyo Yinsa, khumoona mwinyi otule aamwitaliyeeyo masheethwani awaatta, eekhaliye awaliye saana na atthiiyemu akhili zawe, atthu apale khwiiya awoova.

¹⁶Apale aari attaaphale, khuwooza atthu zooshi epile zanrettikhaneliyeeyo mwinyi otule aariina masheethwani, na theenya khulupa monkoni wa kuluwe.

¹⁷Aphano atthu apale khusala anvekela Yinsa yoori aleemo mmuti mwaya mphule.

¹⁸Wakathi Yinsa aari owelaaye nkalawa, mwinyi otule aariina masheethwani khunvekela Yinsa yoori anlikhe alawe na ye.

¹⁹Yinsa khuhinkhupaleli, ila khumuuza yoori: “Olawe owawo wawuuze ajamaazo zooshi epile Mbwana ooretteliyeeyo na tthakaraka awooneliyeeyo.”

²⁰Aphano, mwinyi otule khulawa na khwaaza olupa nti wa Tekapoliishi etile Yinsa anretteliyeeyo. Atthu ooshi khwiiya ooshanka.

²¹Yinsa khupakhira theenya nkalawa alokhelaka kaapu kiina, khuntti khuluyeene khuta khwiitaala aphale aariivo Yinsa nshini wa nttima.

²²Aphano khuta attaaphale namalokozela mmote wa nsinakooka aari wiitthiwaaye Yaayiru, amooniyeevo Yinsa, khukokhora nshini wa moolu awe.

²³Khunvekela wookhanyarelavo yoori: “Mwanaka wankha onsaleela ofwa! Safwatali ote, wanttheele makhono yoori eeye woovona na eeye haayi.

²⁴Yinsa khusala alawa vamote na-ye, khuntti khuluyeene khusala enlotta na omphunya.

²⁵Attaaphale, aarivo muukha aariina nyaakha khumi na miwiri eettaka ohoowa mwaasa wa omwiittikha taamu.

²⁶Ye ahoowiye channu khwa oweekesa anamavonisa na khuharipu nzurukhu awe wooshi aariina, olikha ovona khusala eetta wootepa.

²⁷Asiiliyeevo ovuwa wa Yinsa, khuta nyuma wawe vahali wawaattiwavo na khusapa ajapi yawe.

²⁸Maana aari wuupuwela yoori: “Miiyo kisaparu paasi ajapi yawe, kintta ovona.”

²⁹Nasaapiru yeetta olikha wiittikha taamu etile na muukha otule khoona yoori mmwiili mwawe aari wootaphuliwa ohoowa opule.

³⁰Wakathi otthuupule, Yinsa khoona yoori wansaruwa owahi, khuzukuluwa khweekesa khuntti etile khuuzela yoori: “Paani asapiyeeyo ajapi yaka?”

³¹Anakhiyoni awe khujipu yoori: “Woonaka khuntti khuluyeene eti ekusanyeyiyeeyo, khusala wuuzela yoori: ‘Paani akisapiyeeyo?’”

³²Ila Yinsa nalelo khusala eekesaka vakatthi wa khuntti etile yoori amoone otule aarettiyeeyo etthu yaya etile.

³³Aphano muukha otule, ajuwiyeevo etthu yaarettikhaniyeeyo, khumwaattama khukokhora nshini wa moolu awe eettaka othukumela mwaasa wa woova, khulupa haakhi yooshi.

³⁴Yinsa khumuuza yoori: “Mwanaka, amini yawo yoovonisa. Olawe na heeri, na wiiye wootaphuliwa ohoowa wawo.”

³⁵Nalelo Yinsa eettaka ottakhula, khutavo atthu a owawe Yaayiru, namalokozela wa nsinakooka khumuuza yoori: “Mwanawo afwa. Khinihithajiya onwuti theenya Mwaaliimu!”

³⁶Yinsa khumuuza namalokozela wa nsinakooka mphule yoori: “Ohoove; okhupali paasi.”

³⁷Na khuhinlikhi hatha ntthu onlotta, woohiiyi Pheeturu, Tiyaaku na Yaahaya ttwiiye Tiyaaku.