MAAKU 5:12-37

¹²Ben zĩn pìnↄ wɛ́ɛ kɛ̀ Yesua wà bè: Ǹ wa gbarɛ alɛdɛnↄ tɛ́ wà gɛ̃ ń guu.

¹³Yesu ń gbá zɛ́, ben zĩn pìnↄ gòa wà gɛ̃̀ alɛdɛ pìnↄ guu. Ben alɛdɛ kpàsa kɛ̀ kà bↄrↄ plaa taka pìnↄ wì bào aↄ̃ sòro sĩ̀sĩgɛɛzi aↄ̃ sì sɛ̀bɛn, ben aↄ̃ gàga gwe.

¹⁴Ben alɛdɛdãrinↄ bàa lɛ̀ wà gàa yã pì tↄ̃kɛ̃̀ńnɛ wɛ́tɛ guu kↄ̃n buraanↄ. Ben gbɛ̃nↄ bↄ̀ɛ wà gàa yã kɛ̀ kɛ̀ pì gwa.

¹⁵Kɛ̀ aↄ̃ mↄ̀ Yesu kiia, aↄ̃ gↄ̃gbɛ̃ kɛ̀ zĩn kú à guu pari yãa pì è vɛ̃ɛna gwe, à uta dana à bã̀n pì wèrea, ben vĩa ń kũ.

¹⁶Gbɛ̃ kɛ̀ aↄ̃ yã pì è wɛ́ɛonↄ yã kɛ̀ zĩndee pì lè tↄ̃kɛ̃̀ńnɛ kↄ̃n alɛdɛnↄ yão.

¹⁷Ben aↄ̃ agbaa kpà Yesunɛ kɛ̀ à bↄńnɛ ń bùsun.

¹⁸Kɛ̀ Yesu e gɛ̃ɛ góro'itɛ guu, gↄ̃gbɛ̃ kɛ̀ zĩnnↄ vĩ yãa pì wɛ́ɛ kɛ̀a lɛ à táo.

¹⁹Yesu e wero à bènɛ: Ǹ tá n bɛ n gbɛ̃nↄ kiia, ǹ yã kɛ̀ Dii kɛ̀nnɛɛ ońnɛ píngi, dia à n wɛ̃nda bò nà.

²⁰Ben gↄ̃gbɛ̃ pì tà, èe yã kɛ̀ Yesu kɛ̀nɛ kpàakpa kɛɛ Wɛ́tɛmɛnkuri bùsun, ben yã pì bↄ̀ gbɛ̃ píngi saɛ.

²¹Yesu lìara à bikũ̀ sɛ̀bɛ baa kãa kpa kↄ̃n góroo, ben parii kàkↄ̃azi sɛ̀bɛ lɛ́a.

²²Aduakɛkpɛ gbɛ̃nsi kɛ̀ wè benɛ Yairu mↄ̀ gwe. Kɛ̀ à Yesu è, à dàɛ a puua à gbá saɛ,

²³ben à kúɛ kɛ̀nɛ maamaa à bè: Ma nɛ́nↄgbɛ̃ kú gaa lɛ́zĩ. Ǹ mↄ́ ǹ ↄ kɛa, lɛ à gbãa kũ àgↄ̃ kú wɛ̃̀ndio.

²⁴Ben Yesu dào zɛ́n. Parii tɛ́zi aↄ̃ↄe nakↄ̃rɛɛa.

²⁵Nↄgbɛ̃ kee kú gwe aru è bↄɛa à kà wɛ̃̀ kuri awɛɛplaa.

²⁶Ɛ̃zɛ̃deenↄ à kɛ̀ takaasidee ũ maamaa, à a ↄↄ blè píngi. Èe aafia ero, è kɛkɛ àgↄ̃ kaaramɛ.

²⁷Kɛ̀ à Yesu baaru mà, ben à sↄ̃̀ Yesuzi parii guu kpɛɛ kpa. Ben à ↄ kɛ̀ à utaa,

²⁸zaakɛ à bè: Baa tó ma ↄ kɛ̀ à utaa dé, mɛ́ kɛ̃kↄ̃a.

²⁹Ben à arubↄɛna pì zɛ̀ gↄ̃ↄ. À dↄ̃̀ a mɛ̀ guu kɛ̀ à kɛ̃̀kↄ̃a kↄ̃n a gyãa pìo.

³⁰Zaa gwe gↄ̃ↄ Yesu dↄ̃̀ a mɛ̀ guu kɛ̀ gbãa ke bↄ̀agu, ben à lìɛ parii guu à bè: Dé bé à ↄ kɛ̀ ma utaa?

³¹Ben à ìbanↄ bènɛ: Ń è lán gbɛ̃nↄↄ e nakↄ̃rɛɛmma nà, ben n bè dé bé à ↄ kɛ̀mmaↄ́?

³²Ben Yesu gbɛ̃nↄ gwà à lìgazi lɛ à gbɛ̃ kɛ̀ yã pì kɛ̀ e.

³³Vĩa nↄgbɛ̃ pì kũ̀ èe lugalugaa, zaakɛ à dↄ̃ yã kɛ̀ à à lè a mɛ̀ guu, ben à mↄ̀ à dàɛ a puua à gbá saɛ à à yãpuraa ònɛ píngi.

³⁴Ben Yesu bènɛ: Nↄgbɛ̃, ma náanɛ kɛ̀ ń kɛ̀ bé à n kɛ̃kↄ̃a. Ǹ tá bɛ aafia, n gyãa pì kɛ̃̀mman gwe.

³⁵Kɛ̀ Yesu kpɛ́ èe yã oo, wà bↄ̀ aduakɛkpɛ gbɛ̃nsi pì bɛ wà mↄ̀ wà bènɛ: N nɛ́ pì kɛ̀ sai, ǹton ĩa da dannɛria dↄro.

³⁶Yesu e swã kpá ń yãnziro, ben à bè gbɛ̃nsi pìnɛ: Ǹton tó swɛ̃̀ kɛ̃nguro, ǹ ma náanɛ kɛ dé.

³⁷Èe we gbɛ̃ke gá zɛarero, sé Pita kↄ̃n Yemisio kↄ̃n Yemisi dãaro Yohanao.