San Marcos 5:12-37

¹²parzi banlas de bɨndxabqui lo Jesús, raipdey laany: —Bxiaaldbiu dunnɨ rut zuguaa de cuchre par idxúun láandem.

¹³Chiyru bsaan Jesús par bdiia de bɨndxabqui láani bnietqui ax biiudengui láani de cuchqui. De cuchqui zecti tiop mily nádem. Chiy guzulo rlluuindem ax güeyabdem ruu tuby barranc axtquɨ lo nis rut guaapy nis quiadem ax gutydem.

¹⁴Chiy de bniety ni cacualo de cuchqui, blluuindeb güetixteedeb lo bɨnguɨdx ne iduibte de nezqui. Parzi zieny bniety güeguiaa ni guc.

¹⁵Chi bdzɨndeb rut zuguaa Jesús, gunádeb dec anazaac nguiu ni guu de bɨndxabqui láanni anacubɨ de xabbɨ, ax bdxibdeb.

¹⁶Chiy de bniety ni guná xa guc cun nguiu ni guu de bɨndxabqui láanni ne cun de cuch, laadeb ruenédeb iraru de bnietqui diidx xa guc.

¹⁷Parzi guzulo runlasdeb lo Jesús par idiiany ladxdeb.

¹⁸Deni zeyiiu Jesús láani barcu, bniety nguiu ni guu de bɨndxabqui láanni runlasbɨ lony par chanény laab.

¹⁹Per Jesús quɨt guzigueldtiny sino que raipny laab: —Quebia lizu. Güena de xfamiliu. Chiy gudixtee lodeb irate ni baany Dios cun liú, ne xa xquel blaslaazny liú.

²⁰Chiyru zégac bnietqui, guzulo rguixteeb lo de ni rbez nez Decápolis irate de ni baany Jesús cun laab, ax rdxalo iratedeb.

²¹Deni biecqui Jesús láani barcuqui par stuby lad dets nisqui, zieny bniety bdxasaa ruy, parzi ruxchu nistisqui biianny.

²²Chiy bdzɨny tuby bniety ni rnabee láani tuby yudoo xte de bniety Israel, laab láb Jairo. Chi gunáb Jesús guzullibbɨ lony

²³ne quesentiand banlasbɨ lony, raipbɨ laany: —A llindxaapa acayaty. Dazubnaabiu quiaby par yacby ax ibányby.

²⁴Chiyru zéne Jesús laab, ne zieny de bniety guzanald laany axtpacza rtaagudebny.

²⁵Chiy lo de bnietqui, nuuch tuby bniety gunaa ni racxú, aguc tsɨbtiop iz quɨt rbezti racbɨ guelguzan.

²⁶Quesentiand guelzii agudeedbɨ, lo zienzi doctor agüeb ax abra de xixtenbɨ rtóob. Per quɨt xi baanti de rmɨdyqui sino que lalza mazru guzulluub.

²⁷Ningui, chi bindiagbɨ pur Jesús, chiy güebiib nez detsny glay de bnietqui ax bguaaldbɨ xabny.

²⁸Te pur laab baanbɨ xgab cun iguaaldbɨ xabny abiacacbɨ.

²⁹Ne hóracqui gulez guelguzanqui ax bziienbɨ dec abiacbɨ.

³⁰Chiy Jesús gucbeegacny dec nuu ni absiacny cun guelrnabee xtenny, ax bziecquilony lo de bnietqui. Chiy gunabdiidxny laadeb: —¿Túngui bguaald xaba?

³¹Ax gunii de xpɨnny: —Laabiu rguiaabiu dec zieny bniety rtaagu laabiu. Chiy rnabdiidxzacbiu: “¿Túngui bguaald xabbiu?”

³²Per Jesús iranezte bguiaany par iniány ni bguaald xabny.

³³Parzi racdxaaich gunaaqui rdxibbɨ pur ni nánbɨ xa guc. Chiyru gubiib lo Jesús ax guzullibbɨ ne bziruub irate.

³⁴Chiyru raipy Jesús laab: —Llindxaapa, pur ni güeldilaazu nare ningui abiacu. Quegüe. Quɨtru rdxibiu, abiacu xte guelguidx ni gucu.

³⁵Zeczi canii Jesús ziy, chi bdzɨny de bniety ni nuu liz Jairo, chiy raipdeb Jairo: —A llindxaapbiu aguty, quɨtru runbiu storbɨ Maistrɨ.

³⁶Per Jesús chi bindiagny ni caniideb, chiy raipny Jairo: —Quɨt idxibtibiu. Cuntisy güeldilaazbiu nare.

³⁷Per quɨt bsaantiny nianény irate de bnietqui sino que Bedzi, cun Jacob ne Juany bets Jacob.