Marcos 5:12-37

¹²ojron e mabꞌambꞌan meinobꞌ y chenobꞌ: —Tzacrenon chicon tuaꞌ cochoy tama e sian chitamobꞌ era, che e mabꞌambꞌan meinobꞌ.

¹³Entonces ojron e Jesús y che: —Erer ixixin, che e Jesús. Entonces locꞌoyobꞌ e sian mabꞌambꞌan meinobꞌ tama e winic y ixin ochoyobꞌ tama e sian chitam. Y tama e lugar era ayan 2,000 chitam y tunorobꞌ cꞌapa satpa usasobꞌ y cay ajniobꞌ y ixin uyojres ubꞌobꞌ tama inteꞌ chꞌen y cꞌaxiobꞌ tama e nuxi jaꞌ y cꞌapa cuchpobꞌ tama e jaꞌ y ya cꞌapa chamayobꞌ.

¹⁴Pero conda tin e war ucojcobꞌ e chitamobꞌ cay uwirobꞌ lo que numuy, bꞌactobꞌ y locꞌoy ixiobꞌ ajner y cay uyareobꞌ e gente xeꞌ turobꞌ tama e chinam y xeꞌ turobꞌ tama e aldea tama tunor era. Entonces e gente tama e chinam locꞌoyobꞌ tuaꞌ uwirobꞌ lo que numuy.

¹⁵Y conda cꞌotoyobꞌ tut e Jesús uwirobꞌ e winic xeꞌ chucur ani umen e sian mabꞌambꞌan mein que war aturuan tzꞌustaca y que bꞌujcsebꞌir y que turu ixto usasaꞌ yaꞌ. Y tamar era bꞌactobꞌ.

¹⁶Y tin e uwirobꞌ tunor lo que numuy era cay uyareobꞌ tunor e gente xeꞌ cꞌotoyobꞌ lo que numuy taca e winic xeꞌ chucur ani umen e sian mabꞌambꞌan mein y tamar lo que numuy taca e sian chitam.

¹⁷Y tamar era tunor e gente cay uyareobꞌ e Jesús tuaꞌ alocꞌoy tama e lugar era.

¹⁸Entonces conda tꞌabꞌay e Jesús otronyajr tama e barco tari e winic xeꞌ chucur ani umen e sian mabꞌambꞌan mein y cay uyubꞌi tuaꞌ e Jesús jay erer axin tacar.

¹⁹Pero e Jesús machi uyacta tuaꞌ axin tacar sino que uyare y che: —Quiqui tama oꞌtot tiaꞌ turu atata y atuꞌ y arenicobꞌ tunor lo que Cadiosir uche tuaꞌ utacret y que jaxir war uyajta oit, che e Jesús.

²⁰Entonces ixin e winic y cay xana tama e diez chinamobꞌ lo que ayan teinxejr e xucur Jordán y cay uyare tunor e gente ixin tunor lo que e Jesús cay uche tacar, y tunor e gente ubꞌijnu uwirobꞌ tama tunor lo que cay uche e Jesús.

²¹Entonces sutpa ixin e Jesús tor e jaꞌ tama e barco esto teinxejr e nuxi jaꞌ era, y conda wartocto acꞌotoy cay umorojse ubꞌobꞌ meyra gente tut e Jesús, y jaxir quetpa tacarobꞌ tutiꞌ e nuxi jaꞌ era.

²²Entonces cꞌotoy inteꞌ winic tuyejtzꞌer e Jesús xeꞌ ucꞌabꞌa Jairo xeꞌ jax inteꞌ ajcꞌampar tama inteꞌ sinagoga. Y conda uwira ut e Jesús uyacta ubꞌa acotuan tut.

²³Y cay ucꞌajti meyra taca e Jesús y che: —Niwijchꞌoc cꞌanix achamay. Lar pacpun acꞌabꞌ tamar tuaꞌ atzꞌacpa y tuaꞌ machi achamay, che e ajcꞌampar era.

²⁴Entonces cay ixin e Jesús tuaꞌ acꞌotoy tama uyotot e Jairo, pero ayan meyra gente xeꞌ war axin tacar ubꞌan este que war utacsu ubꞌobꞌ axin.

²⁵Y ayan inteꞌ ixic tujam e sian gente era xeꞌ ajmuac que intaca anumuy uchꞌichꞌer, y ayix doce año que war unumse ubꞌa cocha era.

²⁶Y cay cꞌotoy meyra tut e sian ajtzꞌaconer y tamar era cay unumse ubꞌa meyra ubꞌan, pero intaca cꞌapa usati tunor utumin, y ma tiaꞌ tacarna tamar, sino que más cay erpa ixin umuaquir.

²⁷Y conda cay uyubꞌi que war anumuy e Jesús, cay ixin tupat tuaꞌ acꞌotoy tut este que ixin upijchꞌi ubꞌujc.

²⁸Porque jaxir war ubꞌijnu cocha era: “Jay erer taca impijchꞌi ubꞌujc e Jesús, nen inxin intzꞌacpa”, xeꞌ war ubꞌijnu e ixic era jax taca.

²⁹Entonces tama e momento era quetruma uchꞌichꞌer y cay unata tama ucuerpo que tzꞌacpesna ixto tama tunor e muaquir era.

³⁰Y wacchetaca unata e Jesús que locꞌoy e cꞌotorer tamar y que ayan chi xeꞌ tzꞌacpesna umener era. Entonces sutpa uwira e sian gente xeꞌ war axanobꞌ tupat y che: —¿Chi upijchꞌien tama nibꞌujc? che e Jesús.

³¹Entonces ojron uyajcanuarobꞌ y che: —¿Y tucꞌa tuaꞌ war aware que ‘¿chi upijchꞌien?’ ¿Machi ca awira que ayan meyra gente xeꞌ war uquejquetobꞌ cora cora axin? che e uyajcanuarobꞌ.

³²Pero e Jesús sutpa uwira ut e gente, war usicbꞌa chi umen xeꞌ pijchna ubꞌujc.

³³Entonces e ixic, cocha unata ixto yaꞌ que tzꞌacpesna, tari tut e Jesús y war achincha umen e bꞌajcꞌut y uyacta ubꞌa cotuan tut y cay uchecsu tut e Jesús tunor lo que uche era.

³⁴Y e Jesús uyare e ixic y che: —Ijchꞌoc, tzꞌacpet era umen que war icꞌupseyan tamaren. Quiqui tama oꞌtot taca ujiriar e Dios, y quetpaquet tzꞌacpesbꞌir inyajrer tama tunor amuaquir era, che e Jesús.

³⁵Pues entonces conda warto oꞌjron e Jesús taca e ixic cꞌotoyobꞌ cora winicobꞌ tuaꞌ uyotot e ajcꞌampar tuaꞌ e sinagoga xeꞌ cay ojronobꞌ taca utata e ijchꞌoc y chenobꞌ: —Chamay awijchꞌoc. ¿Tucꞌato tuaꞌ warto aware Cawajcanseyaj tuaꞌ axin tama oꞌtot? che e winicobꞌ xeꞌ tariobꞌ tama uyotot e ajcꞌampar era.

³⁶Pero e Jesús machi ubꞌijnu tamar uyojronerobꞌ era. Intaca sutpa uyare e ajcꞌampar tuaꞌ e sinagoga xeꞌ jax e Jairo y che: —Ira ibꞌacta. Cꞌupseyanen tamaren taca, che e Jesús.

³⁷Entonces e Jesús uyare tunor e sian gente era tuaꞌ machi axiobꞌ tacar, sino que ajtaca tuaꞌ axiobꞌ e Pedro y e Santiago taca uwijtzꞌin xeꞌ jax e Juan.