Mareko 5:12-37

¹²Demoni gamagaridi se awanorilau ia arinai, si ene, “U hetamarimai abo ai lulau tenei sarai eawoidi ne boeadi eai.”

¹³Iesu ie eari, Earua biibiidi gamagaridi abo se pesa se lulau sarai eawoidi boeadi eai: isi abo se aitautau, se leta, se dobi padipadi eai, se beugogo gabogabo eai, abo se galamosi. Isi tausani labui.

¹⁴Sarai wa tauheaheaidi abo se dago wasa wa se wasaduaiei eanua eai, eo gougou eai. Eanua tataodi abo se lau, laulau ne bena abo se ita.

¹⁵Isi Iesu arinai se lage, tau wa demoni se lui wa se ita ie bawabigabiga, eo lulu ie lui, hinage ie sabaauei; isi abo se matausi.

¹⁶Isi tauitana enadi se wasaduai, ia ena abiabina demoni tauluina wa arinai, eo sarai eawoidi wasana hinage.

¹⁷Isi abo se awanorilau Iesu arinai, edi eanua ne bena i laugabaei.

¹⁸Ia waga eai ie awasae, demoni tauluina wa i awanorilau bena ia maena.

¹⁹Iesu nige ie eari, na ie ribalau ia arinai, i ene, “U lau em asa ehamyao aridi eai Eaubada ena gigibori i hemasaraha oa arim eai, eo i nuatoatoaim hinage, u heribadi.”

²⁰Ia abo i lau, Dekapoli eai Iesu ena gigibori i wasaduaiei, eo tatao gamagaridi se noo ariri.

²¹Iesu ie geru waga eai ie uio hari sana awasi eai, tatao gamagaridi se tupagogoma ia arinai: ia gabogabo hasarina eai.

²²Sunago tanuagana esau i laoma ia arinai esana Iairo; ia Iesu ie ita, ia abo i gurisalaoba Iesu aena eai.

²³Ia ie riba gadogadoralau ia arinai, i ene, “Natugu siu gagirina hanahanau ata ie mate; u laoma nimam u saolaei ia potana eai abo i lolo, ia abo i mauri.”

²⁴Iesu maena se lau. Eo tatao gamagaridi ia se hemuriwatai, ia se heduheduiahalai.

²⁵Sine esau ana asiebo osina i laulau miana borimai saudoudoi‐labui.

²⁶Doketa gamagaridi se laoma ia arinai, arinai ena moni se heohi, ana asiebo nige i lautom, i laulaubodauioi hinage i helai.

²⁷Ia Iesu wasana i ataieyao, ia tatao moutuadi muridi eai i laoma, ia ana lulu i abiita.

²⁸Ia ena nuatu i ene, “Taba ena lulu mo ea abiita abo ea lolo.”

²⁹Maesega ana asiebo osina i lautom; tauna eai amnana i ataiei ana iwala i tatapesa.

³⁰Iesu i nuatulobai gigiborina i laulaei, i sinibuiuio tatao moutuadi aridi eai, i ene, “Agu lulu ta eai i abiitayama?”

³¹Ena heaheatayao abo se ribalau ia arinai, si ene, “Tatao moutuadi ue itadi se aiheduheduiahalaim, saha ede u hesioi, u ene, ‘Eai ede i abiitaguma?’”

³²Iesu abo i itahetaiiri sine wa ena laulau nei doha ie ita.

³³Na, sine ne ie ita ena abiabi ia arinai i nuatulobai i matausi, eo i tabutabubu, ia abo i laoma i gurisalaobadobi Iesu nuanuana eai, ena laulau i ribahemasaraha.

³⁴Iesu ie ribalau ia arinai, i ene, “Natugu sine e, oa em sunuma eai arinai ede u lolo; u lau ma nuabigam am iwala me it tatapesao.”

³⁵Ma ribaribana headi sunago tanuagana ena numa eai se laoma, si ene, “Natum siu wa i mateo; Tanuagada sahana u hemode?”

³⁶Iesu teina riba ta i ataiei, ie ribalau sunago guiauna arinai, i ene, “Tabu u matausi, u awamamohoiei mo.”

³⁷Ia tatao ie ribanuahidi ia tabu se hemuriwatai, Petero mo, eo Iamesi, eo Iamesi ena tau, Ioane.