1Igaw akweiy yam mo Kaltuwon Sigeilin bisagals, makava bled beikams. Tage tanuwges lun situwa̱vek sisiyas takatimlakeins kaleiwag sivines kid beiweiys Yeisuw, idokes kid anmwa̱neta biba̱nes mo biyousis; mapuna ilansa, “Awoum bitayousis sagal wanuwan, mata ge gamag bikayuses mo bikawpwanaws adok.”
3Yeisuw gog nises Betaniy, ikamkwam wanbunatum toulepel teitan, yagan Saymon, mo na̱tan vin isiw im, ikokew nabotol bwanabwein. Wanuwan nabotol tagon nises yagan nad, maysan singay avakaein. Ikatuv nabotol, mo ilgubok kunun Yeisuw.
4Mwasanin gog mo ivtokays livan, idibakes sisiyas, ilansa, “Aveiyag wawun iyamkwen tagon towen? Kadiloka bitayamiyis, bitakow lakatutoun kina, mo bitavgen tasekes tasiyas tasimavs.” E, singaya ikawkunes mana̱wen vin.
6Yeisuw gog idibakes, ilana, “Deis! Awoum kutawyages mana̱wen vin; nawotet singaya bwanabwein waseg yey. Tasimavs tut babaw simiyas kusesus, asina̱vin sivinamiy bweina bukulabes. Yey gog kweitan, nag simiy yey bitasesun-wan tut babaw, nag.
8“Wotet towen ikadilok mana̱wen waseg mo niwtel waseg yey. Bo iptum woug nanawan, silma̱nin alawag.
9“Adibakeimiy igaw ven babaw bigeiguys liva̱neig bwanabwein waseg, mo nawotet mana̱wen vin biliva̱nes va̱gan gamag babaw mo bininuways.”
10Mtowen gum-Iskaliyot yagan Yudas, Yeisuw navamul teitan, mo inekes siyas tanuwgwes lun situwa̱veks, sivinan kid bisilkod Yeisuw.
11Iliganes Yudas anilivan, mo ikalin nuwes, ilivnakes namoney bisekes, maysan nawotet towen. Itam, mo ikayamat tut bwanabwein va̱gan basilkod Yeisuw.
12Yam towen bisilamaws makava bled bikamkwams, o biwaweiys Kaltuwon bulukwan, navamul idibakes Yeisuw, ilansa, “Nanoum yak, avanuy bakan bakakatineg va̱gan Kaltuwon Sigeilin bitakams?”
13Yeisuw iligen, ikayabes navamul asteiy, ilana, “Kuneis waven, bukulivatus taw teitan ikokew nakunasoup, kwabkunis taw towen.
14“Kwabkunis, kukines avei-bwan beisiw, kunekes tanuwagan bwan towen, kulansa, ‘Matovek ilana: Avanuy bwabwal mabunatum va̱gan baka̱kam Kaltuwon Sigeilin sigwey gunavamul.’
15“Mtowen taw mo bikatimlakeimiy bukukines bunavakaein wanuwan nabunatum, wanakaew nises, bo ikatinages nanawan silma̱nin amkwam; towen waseg kuva̱ges kads.”
16Navamul asteiy inounas ineis waven iba̱nes taw towen ibukunis, mo iba̱nes bunatum ma̱wana Yeisuw nilivnek, mo ikatinages Kaltuwon Sigeilin.
17Kwayav waseg Yeisuw mo isap siney navamul.
18Isiws bunatum towen, isinis ikamkwams, Yeisuw mo ilana, “Tawaw, tasilkodeig teitan sods nitakamkwams.”
19Iliganes tasiyas, singaya igeg ninous, tatanok tatanok idibakes sitovek, ilansa, “Kal? Yey?”
20Iw to Yeisuw, ilana, “Yakamiy sinwatan amiteiy. Teitan yakamiy gog tasilkodeig soug kasow amabled wanuwan loutan.
21“Gimgilitoun yey ba̱noy ked towen Bukitab nilivnek, tage mtowen tasilkodeig singay kalbaleb bilivet. Magat inan nag bikop bo bwein, togo bo ikop, imligamag mo singay kalbaleb bilivet.”
22Igaw ikamkwams, mo ikow bled kweitan, ikulul, ikalin nuwan Yowbad waseg, ikiv, isekes navamuls, ilana, “Kukwawes kukwams, peinan woug.”
23Wankuyeim mo ikow kwa̱vig, itapwa̱loul, isekes, imoums asibabaw-wan; mo idibakes, ilana, “Towen buya̱vig silma̱nin kaleiwag kweivaw, iwta̱wout pinamiy babaw yakamiy.
25“Adibakeimiy nag vayuwein ba̱moum gleip sipinen ee... Tamag nakabkaleiwag waseg mo sipinen kweivaw ba̱moum.”
26Ikams ikous, wous kweitan ikanweles, mo isaps, ikatulags ineis wa̱koy yagan Oliv.
27Yeisuw mo idibakes navamuls, ilana, “Babaw yakamiy bukulisaweigs, peinan Bukitab nilivnek mamagina: ‘Baweiy mtowen tamtakavatein sips, mo bikatigayays.’
28“Wankuyeim ba̱kit vayuwein mo bamgwayeimiy bitaneis waGaliliy.”
29Iw to Pita, idibek natovek, ilana, “Magat babaw tasiyas bilisaweims, tage yey nag.”
30Yeisuw idibek, ilana, “Adibakeimiy nagein, boug waseg bukukwaya̱neig siva̱toun, mo kolkolek beigel sivay nubweig ga̱boug.”
31Tage Pita anilivan tawtoun idibek, ilana, “Nag bakaya̱neim. Kukin bukumat, aditeiy soug yak bitamat.” Babaw asilivan ma̱wan.
32Inounas ines ven yagan Getsemaniy, idibakes navamuls, ilana, “Kusinis towen, yey ban anitoug Yowbad waseg.”
33Itokes Pita, Yemes, Yon, asteivas ineis palatan, mo singay igeg nanon, anpwa̱yat seikwan.
34Idibakes, ilana, “Singay igeg nanoug. Bo bakanig adok. Kusesus towen kukwaymateigs.”
35Inoun in kadiyakus, imasis kantukov wapwepway, initoug Taman waseg, idok kid bigidem youd kalbaleb wamatan, kakita bo bilouvat, ilana, “Tamag, bo ikadilokeim youda babaw. Kuyamen agukwa̱vig towen; awoum ba̱moum. Nanoug yey awoum; tage nanoum yak kuvag ma̱wan.”
37Iyum inekes navamul bo imasis, idibek Pita, ilana, “Bo kumasis, ne? Nag kadilokeimiy tut kadilakus-wan kwaymateigs. Kwaymateigs kunitougs; mata ge bukusiws abiyokon waseg. Ninoumiy waseg bukutawtouns; nag gog, woumiy tougweys.”
39Vayuwein mo in palatan initoug, anilivan ma̱wan nilivan.
40Iyum inekes, vayuwein bo imasis, peinan mites bo inanup. Nag ikakins ama̱wan bikatimapus aygan.
41Sivtounun inoun, initoug, iyum, ilana, “Bo kumasis, kuyeiwas, ne? Bo deis. Datuts bo ikous. Teitan gamag bo bisilkodeig Gimgilitoun yey; tasiyas takalbalebs bo biyousigs. Kukits, tanounas; tasilkodeig bo isap.”
43Igawa illivan, navamul teitan, Yudas, isaps siney tasiyas takaweins pulut son new; peinan tammwayas bo ikayabes nimeis. E, tammwayas sisiyas tanuwgwes lun situwa̱vek sisiyas takatimlakeins kaleiwag bo ikayabes nimeis.
44Tasilkodein bo idibakes kweitan sinap va̱gan bikakins kal Yeisuw, ilana, “Kukines kal bakamuloul soug, mtowen Yeisuw, kuyousis, kumtakavates beibwein.”
45Mto Yudas iwek Yeisuw, ilana, “Kalin nuwag guntovek yak,” mo ivayams son. Tasiyas ikines, ituts, iweis, iyousis, itawtouns waseg.
47Teitan gog nitet wadadan mo ikow napulut tanmunum, iweiy natouwat tanuwgwes lun sitovek avakaein, ibob teigan.
48Yeisuw gog idibakes, ilana, “Mipulut minew kukokews, kuyousigs ma̱wana tavveinaw yey. Yam katanok katanok Yowbad wanbunatum wamtamiy akatimlakes gamags, nag kuyousigs. Tage sinap ma̱wan va̱gan bikamat liva̱neig Bukitab waseg nilivnek.”
50Inavamul babaw bo isawls, ilisawes Yeisuw.
51Natabwa̱kun teitan anakweim mwayntanok nisikam, bisawl kid, tage bo iyousis; ilisow anakweim wanimes, sona mwadoyan mo isawl in.
53Itokes Yeisuw binawes tanuwgwes lun sitovek avakaein wamatan, biyateles. Ikatuyouns nimeis babaw siyas tanuwgwes lun situwa̱vek, sisiyas tammwayas, sisiyas takatimlakeins kaleiwag.
54Pita anmwa̱net ibwa̱kun kadiveiyov, nag in walisis, isap tanuwgwes lun sitovek avakaein wanven, mo isinis siney tasiyas tawwotets, ikamunuws wa̱kov.
55Iya̱tals. Tanuwgwes lun situwa̱vek sisiyas tammwayas babaw iyateles Yeisuw va̱gan kid bikatimates, tage silawun nag iba̱nes.
56Iyya̱tals, gamag babaw asilivan yaweid-wan, peinan asilivan nag ilatanes.
57Iyyokons ee... tayyaweids asteiy mo itamanaws, ilansa, “Yakamey nakaligen anilivan mamagina, ‘Yowbad nabunatum towen gamag niwlules, yey bo bagulek, ikous, kweitoun yam mo bawlulavaw, tage nag namag bawlul.’”
59Ilivans ma̱wan, tage asilivan nag ilatanes katanok-wan.
60Wankuyeim tanuwgwes lun sitovek avakaein mo itamanaw wanuwein, wamatan Yeisuw, ilana, “Nag aveiyag bukwatimop, ne? Aveiyag silawun asilivan tasiyas?”
61Yeisuw gog isesuna ikka̱pay. Vayuwein ikatigan, ilana, “Tabta ya̱koum Kelis, Tamwey bwanabwein natun yak, ne?”
62Iw to Yeisuw, ilana, “O, ma̱wan. Igaw bukukineigs Gimgilitoun yey bassin Tatawtoun wanaka̱tay, mo bam liba̱lab lov-nen waseg.”
63Tanuwgwes lun sitovek avakaein ikapasal nuwan, iksigeb anakweim, ilana, “Nag sivinads teitan gamag bikamtel ansinap kalbaleb; peinan bo taliganes anilivan kalbaleb. Aveiyag bitava̱ges?” Babaw itams, ilansa, “Kadiloka bitaweiys.”
65Mwasanis mo igusus, ilumwes magin, iwaweiys, ilansa, “Kulivan ma̱wana palopit ya̱koum.” Igawa iwaweiys, siyas tawwotets mo itokes Yeisuw, ineis.
66Pita igawa nises wamatan bunatum, tanuwagan lun natouwat kuda̱vin na̱tan inek Pita, ikin ikamunuw kov, iwtus, ilana, “Adok ya̱koum-vak soum gum-Nasalet Yeisuw ya̱koum, ne?”
68Ikayan, ilana, “Nag. Nag akakin aveiyag kulivan.” Mo inoun in wadunan ked.
69Vin mana̱wen ikin, idibakes tasiyas nitatos, ilana, “Mtowen Yeisuw nagamag teitan.”
70Vayuwein Pita ikayan. Tut kadiyakus wankuyeim siney nitabalawaws idibakes Pita, ilansa, “Mounid ya̱koum Yeisuw nagamag teitan, peinan gum-Galiliy yak.”
71Iw to Pita, ilana, “Nag. Awoum bayaweid; Yowbad beiweig. Nag akakin gamag to nukulivan.”
72Ilivan ikous, kolkolek mo igel sivay. Pita iligen, inuw Yeisuw anilivan mamagina, “Siva̱toun bukwaya̱neig mo kolkolek beigel sivay.” Anilivan nilivnek ma̱wan, inuw Pita, anmwasin mo iva̱lam.
