1Tuḻku Patjuwupangkaya Tjuwu tjuṯa tjungurringkupayi Katutjanya waḻkulkitja. Tjana wiika kutjungka mangarri pikinpawutuwiya ngalkupayi. Tuḻku Patjuwupa palulaya yurrunpa tjiṉṯu kutjarrangka Muutjaku wangka nintilpayi tjuṯa, tuḻkuku mayutju tiṉa tjuṯaṯarra tjungurringkula wangkangu, “Yaalytjiyaalytji nganaṉa tjananya tjingapungku, Yiitjunyaya witira mirrintankunytjaku?”
2Piyukuya wangkangu yalatji, “Tuḻku Patjuwupanya ngaranytjala wiyala tjananya waarrkana tjuṯa watjalku Yiitjunya witira mirrintankunytjaku, yaṉangu tjuṯangkulanya pikarringkula ngaparrtji pungkupayingkamarra.”
3Palulanguru Yiitjunyangarriya tawunu Piitjaniyila nyinangu, wati Tjaamanaku ngurrangka. Tjaamana paluru pangki pikatjarra yirriṯi nyinangu. Yiitjunya tiipulangka nyinanytjala, kungka yukarrangku ngalya yankula wuyila paṉṯi palyatjarrangku nyapara wiyaṉu Yiitjula katangka, paatula alytjurankula. Wuyila palunya yurrunpa mani tiṉangka payimilara kanyiṉingi.
4Palulanguruya yaṉangu tjuṯa pikarrirra wangkarra waṉingu, “Nyaaku kungka palangku nyapara wiyaṉu?
5Wuyila palunyalanya yungamara. Katirrala tjalamilara, mani tiṉalpi tjirri tjawutjuna tala nganaṉa mantjinmara. Mantjirala maralpa tjuṯakulpi yungamara.” Yalatji tjana watjara kungka palumpa pikarringu.
6Palulanguru Yiitjulu tjananya watjaṉu, “Kungka palatjaya wanti!, pikarringkunytjawiyangku. Palya paluru ngayula nyapara wiyaṉu.”
7Piyuku tjananya Yiitjulu marrkuṉu, “Maralpa tjuṯa nyurrangarrilawana kutu nyinamalpa, kanya ngayulu nyurrangarrilawana wiya kutu nyinamalpa. Maralpa tjuṯaku yunytjurringkula tjanampa nyurrangarri palya yungkunytjaku. Yilta kungka ngaangku wuyila ngayunya yungu nyapara wiyara.
8Paluru ngayula yurrunpa palya nyapaṉu, ngulytju tjuṯangkuya ngayunya tjiṉṯu kutjupangka mirri ngarritjunku.” Yalatji Yiitjulu tjananya watjaṉu. Tjuwu tjuṯangkuya mirri ngarrinytjala kututja wuyila paṉṯi palyatjarra nyapalpayi, ngarritjunkukitjangku. Kungka palangku yalatji kulira ngayula yurrunpa nyapaṉu.
9Yiitjulu tjananya piyuku watjaṉu, “Wangka ngaatjanyaya kulila! Tjakulpa ngayunyatjarra, manta tjuṯawanaya tjakultjurinamalpa. Tjakulpa kutjupaṯarraya yalatji tjakultjurinamalpa, kungka palangku ngayula nyapaṉutjangka. Yuwa, ngurra tjuṯawanaya kulilku, kungka palangku ngayunya nyapaṉutjangka.”
10Tjuutatjanya Yitjikarriyatanya ngurrara Yiitjuku kutunguḻu tuwalpalangka nyinapayi. Tjuutatjalu tjananya tuḻkuku mayutju tiṉa tjuṯa yankula watjaṉu, “Ngayulu nyurranya nintilku Yiitjunya kutunguḻu maṉkurrpatjarra nyinanytjala, nyurrangarri waarrkana tjuṯa wantirriyantjaku, Yiitjunya tjana witintjaku.”
11Kuliraya tjana yunyparringkula mani ngula yungkukitjangku watjaṉu. Palulanguru mani ngula mantjilkitjangku Tjuutatjalu kutu kulirinangi yalatji, “Yiitjunya, palumpa kutunguḻu maṉkurrpaṯarra nyinanytjala, ngayuluṉa tjananya yankula watjalku, Yiitjunyaya yankula witintjaku.”
12Palulanguru tuḻku Patjuwupanya ngarangu. Tuḻku palula Tjuwu tjuṯangkuya mangarri pikinpawutuwiya ngalkulpayi. Yalatji ngalkura tjaatji ngurrara tjuṯangku tjana tjiipi tjawirrilyi tjuṯa pungkula tjunkupayi, yaṉangu tjuṯangkuya ngalyankula mantjintjaku. Yiitjuku kutunguḻu tjuṯangku kuliṉu tjiipi tjawirrilyi mantjira tjana katirra waaḻangka tjunkukitjangku, tjungungku ngalkukitjangku. Paluru tjanaya yankula Yiitjunya tjapiṉu yalatji, “Ngurra yaalytjingkalatju mangarri kukaṯarra tjunku, tuḻku Patjuwupanyala tjungungku ngalkunytjaku?”
13Mangarri kukaṯarra mantjira tjunkunytjaku Yiitjulu pulanya palumpa kutunguḻu kutjarra wantirriyalkitjangku watjaṉu yalatji, “Tawunungka ngururrwana nyupali yankula nyakuku, watingku turaama kapitjarra katiyananyingka.
14Wati palunya nyupali ngaṉṯiwana wanala! Wati paluru waaḻangka tjarrpanytjala, nyupali waaḻa palula tjarrpa! Tjarrparra nyupali waaḻaku mayutjungka yalatji tjapila!, ‘Nintilpayingkunta tjapiṉu yalatji. Tjiipi tjawirrilyi ngurra yaalytjingkalatju palumpa kutunguḻu tjuṯangku palulawana tjungungku ngalkulku?’”
15Yiitjulu pulanya palumpa kutunguḻu kutjarrangka piyuku watjaṉu, “Waaḻaku mayutjungku kaḻparra nyupalinya nintilku ruuma tiṉa kutjupa. Ngurra palulalampa mangarri kukaṯarra mantjira tjurra!” Yalatji Yiitjulu pulanya watjara wantirriyaṉu.
16Palulanguru palumpa kutunguḻu kutjarrangkupula yankula nyangu, Yiitjulu pulanya yurrunpa watjaṉutja. Ngurra palula paluru kutjarrangku mangarri kukaṯarra mantjira tjunu. Tjunkulapula yanu rayitpayiki Yiitjulakutu.
17Mungarrtjirrinyingkaya Yiitjunya, palumpa kutunguḻu tuwalpalaṯarra waaḻa palulakutu yanu.
18Nyinarraya waaḻa palula yunngu ngalkuṉangi. Yiitjulu tjananya watjaṉu, “Wangka ngaatjanyaya kulila! Wati kutju ngaangka nyinanyi. Paluru ankula mayutju tjuṯangka tjakultjunku, ngayunya tjana witintjaku.”
19Kuliraya tjuḻurrmankula wangkangu. Yiitjunyaya tjana nyakula kutjuṯu kutjuṯungku tjapiṉu, “Tjinguru ngayuluṉa tjakultjunku palunya?”
20Yiitjulu tjananya watjaṉu, “Paluru nyurrangarrilawana nyinanyi, ngayuku kutunguḻu. Tjungungkuli paluru tjulyulytjunkula ngalkuṉi, piitjinatjarrangka.
21Ngayunyaṉiya yaṉanguku katja yilta mirrintanku. Yalatjiṉiya mirrintankunytjaku Katutjaku walytja kutjungku yirriṯi piipangka wakaṉu. Wati kutjungku tjananya tjakultjunku, ngayunyaṉiya witintjaku. Wati palunya Katutjalu ngula puntura pikantanku. Paluru wati palunya puntura pikantankutjipingkamarra, yirriṯi palumpa maamangku paḻtjalwiyangku wantimara.”
22Ngurra palulaya mangarri ngalkura Yiitjululpi puriiti mantjira Katutjanya waḻkuṉu yalatji, “Palya nganaṉanya mangarri ngaatjanya nyuntu yungu.” Kilytjuntankula paluru tjananya yungkula watjaṉu, “Ma! Mangarri ngaatjanya yaṉangu ngayunya. Ngalkulaya!”
23Panikina wayinatjarralpi paluru mantjira Katutjanya waḻkuṉu, wayina paluru yungutjangka. Yiitjulu tjananya yungu tjikintjakuya. Yuwankarrangkuya tjikiṉu.
24Yiitjulu tjananya watjaṉu, “Wayina ngaatjanya ngurrka ngayunya. Kuwarri ngayulu nyurrangarrimpa watiyangka ngurrka yintirra mirrirriku tjawirrilyi nguwanpa, yaṉangu yuwankarraku kuya waṉikitja. Yalatjiṉa ngurrka yintinytjala, Katutjalu nyurrangarrinya watjalku kuya uwankarra nyurrangarrimpa kutu waṉinytjaku. Yirriṯiya kuka tjawirrilyi pungkula ngurrka yintilpayi, Katutjalu tjanampa kuya waṉinytjaku. Tjawirrilyi palunya nguwanpa Yiitjunya watiyangka waralyngarala ngurrka yintirra mirrirringu.
25Wangka ngaatjanyaya kulila! Wiyaṉa wayina ngaa nguwanpa mantangka piyuku tjikilku, wiya. Ngula Katutjalu tjananya palumpa walytja tjuṯa ngurra ilkaringka yaṉṯayaṉṯalku. Ngurra palula ngayulu tjanala tjungurringkula tjikilku.”
26Palulanguruya tuḻku warraralpiya pakara yanu, puḻi Yalipatjalakutu.
27Yiitjulu tjananya yalatji watjaṉu, “Nyurrangarri kuwarri ngayunya wantirra tjalkaḻungku. Palunya nguwanpa Katutjaku wangka ngaranyi yalatji, ‘Tjiipiku mayutjuya pungkunytjala, tjiipi tjuṯaya tjalkaḻungkula waṉiku.’”
28Yiitjulu tjananya piyuku watjaṉu, “Katutjaluṉi mirringuru pakaltjingantjala, palunyatjanu ngayulu yanku manta Kaliliyilakutu. Ngaṉṯiwananyurra ngurra palulakutu yanku.”
29Piitalu Yiitjukuṉu wangka palunya kulira watjaṉu, “Kutjupa tjuṯangkuntaya wantikatinyingka wiyaṉanta wantikatiku.”
30Yiitjulu Piitanya watjaṉu, “Wangka ngaatjanya kulila! Kuwarri mungangka tjuḻpu lukuluku kutjarrangara mirranytjala yurrunpa nyuntu nguḻurringkula tjirripalangara ngurrpa watjalku, ‘Ngayulu Yiitjuku ngurrpa.’”
31Piitalu pikarringkula watjaṉu, “Wiya ngayulu kutjupa tjuṯangka yalatji ngunytjinytjunku, ‘Ngayulu Yiitjuku ngurrpaṉa.’ Nyuntunya tjana pungkunytjala, tjunguli ngaraku, kutjarralinya tjana mirri pungkunytjaku.” Yiitjuku kutunguḻu kutjupa tjuṯangkuṯarraya Piitanya nguwanpa watjaṉu, “Nyuntunyantaya pungkunytjala, nganaṉaṯarra ngaraku, tjungu nganaṉanya tjana mirri pungkunytjaku.”
32Palulanguru Yiitjunyangarriya purikutu yanu, yini Katjamaniyilakutu. Yiitjulu palumpa kutunguḻu tjuṯanya watjaṉu, “Ngaangkatjuya paṯara nyinama!, ngayuluṉa yankula Katutjanya tjapintjala.”
33Yaḻṯirra tjananya maṉkurrpa katingu Piitanya, Tjayimitjanya, Tjaananya. Puntura Yiitjulu kulira tjananya watjaṉu, “Ngayuluṉa puntura tjilurutjilururrinyi, wiḻa kuyaṉa nyinanyi. Ngaangkaya nyinarra paṯanma, kana!, ngayulu ilangku yankula tjapintjala.”
35Yiitjunya kutju maa yankula pupakatirra Katutjanya tjapiṉu, “Paapa. Tjinguru nyuntu kuliṉi ngayunyaṉiya wiya pungkula mirrintankunytjaku. Palulanguru marrkula tjananya!, wiya ngayunyaṉiya witintjaku. Yalatji ngayuluṉanta yunytjurringkula nyuntunya tjapiṉi. Paapa, tjinguru nyuntu kuliṉi ngayunyaṉiya mirrintankunytjaku. Palulanguruṉiya palya pungkula mirrintankunytjaku.”
37Yiitjulu tjananya yankula nyangu yanku ngarrinyingka. Piitanya kanara tjapiṉu, “Tjaamana. Nyuntu yankurringu? Nyuntu kanangku nyakula nyinamara, rawawiyaṉa ngalya yanu.”
38Paluru piyuku tjananya watjaṉu, “Nyakulaya kana nyinama! Katutjanyaya tjapila!, kutjupalu nyurranya tjingapungkunytjala ngayunyaṉinyurra wantipayingkamarra. Ngayuku tjukarurru nyinakitjangkunyurra yilta kuliṉi. Katutjanyaya tjapinma!, kutjupangku nyurrangarrinya tjingapunganyingka ngayuku kutunyurra tjukarurru nyinanytjaku. Ngayulu nyurrangarrimpa ninti nyinanyi, kutjupangku nyurrangarrinya tjingapungkunytjala tjingurunyurra ngayuku wangka kulira wantiku.”
39Yiitjunya piyuku yanu Katutjanya tjapiṉangi, yara palulawana.
40Palulanguru paluru yankula nyangu tjananya, yanku ngarrinytjala. Wiyaya kana nyinangu, uwankarraya ankurringu. Yiitjulu tjananya kanara watjantjala kuṉṯarringkulaya wangkawiya nyinangu.
41Yiitjunya ngurra palulakutu piyuku yanu Katutjanya tjapintjaku. Tjapira panyapa tjuṯakutu yankula kanara tjananya watjaṉu, “Wiya nyurrangarri kutu yanku ngarrinytjaku. Kala, pakalaya! Waṯalpiya ngalya yananyi. Yaṉanguku katjaṉiya witira katirra mayutju kuya tjuṯangka ngaratjunku.
42Pakalaya! Nyawaya palatja ngayuku kutunguḻu ngalyananyingka! Paluru tjananya tjakultjunu, ngayunyaṉiya tjana witintjaku.”
43Yiitjunya panyapa tjanala wangkanytjala, Tjuutatja paluru ngalyanangi. Paluru Yiitjuku kutunguḻu nyinapayi. Tjuutatjalawanaya tjungu, ngalyanangi tjikipaka tjuṯa. Tjaampalaya tjuuḻa waṯawaratjarra ngalyanangi. Tjaampalaya kuṯurutjarra ngalyanangi. Tjikipaka palunya tjuṯa tjananya wantirriyaṉu, tuḻkuku mayutju tiṉa tjuṯangku, Muutjaku wangka nintilpayi tjuṯangkuṯarra tjiḻpi tjuṯangkuṯarra.
44Tjikipaka tjuṯangka Tjuutatjalu yurrunpa tjananya watjaṉu, Yiitjunya nintilkitjangku yalatji, “Yiitju palunya ngayulu ngulytju nguwanpangku nyunytjulku. Palulanguru nyurrangarri witira palunya purinytju katinytjaku, tjalkaḻungkupayingkamarra.”
45Tjuutatjanya Yiitjulakutu yankula wangkangu, “Mayutju.” Yalatji wangkarra Yiitjunya nyunytjuṉu. Kututjaya Tjuwu tjuṯangku nyunytjulpayiya yalatji tjungurringkula.
46Palulanguruya tjikipaka tjuṯangku witiṉu, Yiitjunya.
47Yiitjuku kutunguḻu kutjungku tjuuḻa waṯawaratjarrangku yurrkura pina kuntara waṉingu, tuḻkuku mayutju tiṉaku waarrkana.
48Yiitjulu tjananya tjikipaka tjuṯangka watjaṉu, “Ngayulu mulyaṯangku mantjilpayi nguwanpa, witilkitjanyurra ngalyanu, tjuuḻa waṯawaratjarra, kuṯurutjarraṯarra.
49Tjiṉṯu kutjupangka tjiṉṯungkaṉa nyurranya kutu nintiṉingi tjaatji tiṉangka. Nyurrangarri ngurra palula ngayunya witinmara. Ngurra palula wiyaṉinyurra witiṉu, ngayulu wiya kuya palyalpayi, wiya. Palunyatjanu nyurrangarri ngayunya wantimara witilwiyangku. Kala, palyaṉinyurra witira kanyiṉi, Katutjaku wangkawana yalatji ngaranyi. Katutjaku wangka watjalpayi tjuṯangku yirriṯi watjaṉu, nyurrangarri ngayunya witintjaku.”
50Palulanguruya Yiitjuku kutunguḻu tjuṯa Yiitjunya wantirraya tjalkaḻungu.
51Yiitjunyaya katinytjala yangupala kutjungku ngaṉṯiwanangku wanarinangi, pulangkititjarrangku.
52Yangupala palunya witilkitjangkuya pulangkiti palunya yarraṉu. Mantarrawiyalpi nikiti tjalkaḻungu.
53Yiitjunyaya witira katingu tuḻkuku mayutju tiṉakutu. Yurrunpa mayutju palumpa ngurrangka kutjupa tjuṯaya tjungurringkula paṯaṉingi. Waaḻa palulaya mayutjuku ngurrangka kuutawutju nguwanpangkaya Yiitjunya ngaratjunu. Yalatji paluru tjana paṯaṉingi tuḻkuku mayutju kutjupa tjuṯa, Muutjaku wangka nintilpayi tjuṯaṯarra, tjiḻpi mayutju tjuṯaṯarra.
54Piitalu Yiitjunya ngaṉṯiwanangku wanarankula piinytjingka tjarrpangu, tuḻkuku mayutju tiṉaku ngurrangka yaatjayiṯi. Tjarrparra tjuulytji tjuṯawana nyinangu. Tjunguya nyinarra warungka wuumpirringangi. Waaḻangka yunnguya tuḻkuku mayutju tjuṯa, kutjupa tjuṯaṯarra wangkarra waṉingi yalatji, “Nganalu nyangu?, palangku luwulampa kilytjuntananyingka. Nganalu nyakula nganaṉanya tjakultjunku?” Mayutju paluru tjanaya yalatji kuliṉangi, “Yaṉangu tjuṯangkuya tjakultjunanyingka nganaṉa Yiitjunya mirritjunku.”
56Tjukarurrungku tjakultjunkunytja nguwanpa, yaṉangu tjuṯangkuya wiyawanangku ngunytjinytjunangi. Wangka kutju wangkanytjawiyaya, wangka kutjupa kutjupaya wangkangu, tjukarurruwiya.
57Kutjupa tjuṯangkuya ngarala ngunytjinytjunu yalatji,
58“Kuliṉulatju paluru yalatji watjantjala, ‘Tjuwu tjuṯaku tjaatji tiṉa ngaatjanya marangku tjana palyara ngaratjunu. Ngayulukunyu tjaatji palunya yuḻpura wiyalku. Palulanguru tjiṉṯu tjirripalangkakunyu ngayulu kutjuṉa kutjupalpi palyara ngaratjunku.’”
59Tjukarurru tjakultjunkunytja nguwanpaya panyapa tjakultjunu. Wangka kutju wiya, wangka kutjupa kutjupaya wangkangu.
60Tuḻkuku mayutju tiṉangku pakara Yiitjunya tjapiṉu, “Nyaa tjana watjaṉu? Watjalalanyatju!”
61Yiitjunya yarrka ngarangi, watjantjawiya. Mayutju paluru Yiitjunya piyuku tjapiṉu, “Nganaṉanyatju watjala! Tjinguru nyuntu Kurayitjanya ngaranyi, Katutjaku katja?, tjinguru wiya.”
62Yiitjulu watjaṉu, “Yuwa, ngayulu Katutjakuṉu. Yaṉanguku katjaṉinyurra nyaku, Katutjanyalitju tjungu nyinanyingka. Mayutju ngangkari kutjutjarralitju nyinamalpa. Ilkaringuruṉinyurra nyaku yutuwariwana ngalya tjarukatinytjala.”
63Mayutju paluru pikarringkula tjaaṯa walytjangkunku wintarrpungu. Yalatjiya Tjuwu tjuṯangku kututja tjaaṯa wintarrpungkupayi pikarringkula, luwu tjanampa ngaranytjala. Mayutju paluru tjaaṯa walytjangkunku wintarrpungu, Yiitjulu yalatji watjantjala, “Paapa Katutjanyalitju mayutju tiṉa kutjarra nyinanyi.” Yalatji watjara Yiitjulu luwu tjanampa kilytjuntanu. Mayutju paluru tjaaṯa wintarrpungkula tjananya watjaṉu, “Ngaangku wiyawanangku watjaṉu, wiya paluru Katutjakuṉu, paluru manta ngurrara kutju nyinanyi. Wiyala kutjupa tjuṯanya yaḻṯinytjaku tjanaya tjakultjunkunytjaku. Kala, kuwarri nganaṉa kuliṉu. Paluru wiyawanangku watjaṉu Katutjanyapula tjungu nyinanytjala. Yilta luwulampa paluru kilytjuntanu. Nyaanyurra watjalku?” Yuwankarrangkuya mirritjunu yalatji, “Katirraya mirri puwa!”
65Palulanguru Yiitjulaya tjaampalangku nyunypatjunangi, mungutjakutjura kulira. Tjaaṯatjarrangkuya kuru tjutura yuṉpa pungangi. Yinkatjingaraya watjaṉingi, “Tjukarurrulanyatju watjala! Nganalunta marangku pungu?” Tjuulytji tjuṯangkuya Yiitjunya witira marangku pungangi.
66Tuḻkuku mayutju tiṉaku ngurrangka yaṉangu tjuṯa parra ngarangi. Piitanyaṯarra warungka wuumpirrirra nyinangi. Mayutju palumpa kungka waarrkana nyinapayi. Paluru Piitanya nyakula nuuwimilara watjaṉu, “Nyuntu Yiitju Natjaritjanya ngurraralawana tjungu yankupayi.”
68Piitalu ngunytjinytjunu yalatji, “Ngurrpaṉa palumpa, wati nyarraku.” Piitanya pakara kiiṯakutu yankula ngarangi. Palunyangka tjuḻpu lukuluku ila mirrangu.
69Kungka waarrkana paluru Piitanya piyuku nyakula tjanala watjaṉu, yila nyinanytja tjuṯangka, “Wati ngaatja yilta tjungu Yiitjulawana yankupayi.”
70Piitalu kulira piyuku tjananya ngurrpa wangkangu. Palunyatjanu yila nyinanytja tjuṯangkulpiya watjaṉu Piitanya, “Yilta, nyuntu Yiitjulawana yankupayi. Palumpa walytja tjuṯa Kaliliyinya ngurrara. Nyuntuṯarra Kaliliyinya ngurrara.”
71Piitalu tjananya piyuku ngurrpa wangkangu yalatji, “Katutjala kurungka, tjukarurru ngayulu wangkanyi. Wati nyarrakuṉara ngurrpa nyinanyi. Tjinguruṉara wiyawana ngurrpa wangkanytjala, Katutjalu ngayunya pungamara. Yiltaṉara ngayulu ngurrpa nyinanyi.”
72Palulanguru tjuḻpu piyuku mirrangu. Tjuḻpu mirranytjala Piitalulpi kuliṉu Yiitjulu yurrunpa watjaṉutjangka yalatji, “Tjuḻpu lukuluku kutjarrangara mirranytjala, yurrunpa nyuntu maṉkurrngara ngunytjinytjunku, ‘Ngayulu Yiitjukuṉa ngurrpa.’” Piitanya puntura yulangu, Yiitjuku ngurrpa wangkarra.
