1Iesu i vikarei ma awanainei awari i babani i pa, “Mara tagogi oroto, ana wapu i kauei ma grape i paewi ma i gari ma grape anigudana ma violaḡa numana i voai. Ma tauipi ḡelaui i verei da ita nolei taui anatapui aubai. Ma i vaḡai au dobu ḡela.
2Tuaruta ana mara i ḡetai ma taniwaga, ana taunola i paritawanei tauipi awarii da ana ḡuta ita vaia.
3Wate tauipi, tauna i vojijini ma i kwapui ma kwakwavina i paritawanei.
4Ma taniwaga, taunola ḡelauna i paritawanei. Ma taui, kolana i viaibauni ma i vitepaubaubai.
5Ma taunola ḡelauna i paritawanei ma tauna i viraḡeni ma i maḡa ḡelaui i paritawanei, ḡelaui i kwapui ma ḡelaui i viraḡeni.
6Ma tagogi ava e mamae da ina paritawanei. Lamna natuna orotona tagotago ana nuavainana. Ma tauna au murioina i paritawanei ma i pa, ‘Taui, natu ina vivirei.’
7Wate taui, tauna i ʼnanai ma i riwa vivira i pa, ‘Wei taniwaga natuna. Ona nei, tana viraḡeni ma ana buderi ina viḡaritaiei!’
8Ma i vunui ma i viraḡeni ma tupuana wapuei i tawanana-opunei.
9—Wapu taniwagana marina aiwai ina kauei taui awarii? Tauna ina nei ma tauipi ina viraḡeni ma grape wapuna ina veredamanei tauipi ḡelaui awari.
10Wei girumana o iavi bo eḡa? ‘Wei ḡaimana, tauvoa i geduaiei, wate muriai i nelaḡai da tauna ḡaima kaua.
11Wei lamna, Bada ana kaua ma inanana i vinualaulauna.”
12Jew babadai i aramanei da awanaina lamna taui i bababaniei ma i ḡoei da ita pani. Wate taui patara i rovoei, lamna aubaina Iesu i voterei ma i nae.
13Ma Pharisi ḡelaui ma Herod ana rava ḡelaui i nae Iesu awarina da riwei ita waroi.
14Taui i nei ma i riwa, “Tauviararamana, tauai aramanei da tam rava jijimanim. Ma rava wavai naenaei ma rava labalababa eḡa uta vibainaenaei ma anatapui e vaivaia da tagogi. Wate tam God ana babani riwa kauei e viararamani. Ma riwelai tax tana terei Rome gulauna wavana Caesar awarina, i aii bo eḡa?”
15Wate Iesu, ai moru i ʼnana-bauni ma i riwei, “Aiwai aubaina o raudadaniu? Mani tagogi ona neiai da ana inanai!”
16Denarius tagogi i neiai Iesu awarina ma taui i vitara-virevirei, “Wei aiai aruana ma wavana?” I paribelei, “Caesar.”
17Iesu i riwa, “Aiwai Caesar ḡarinei, Caesar ona verei. Ma aiwai God ḡarinei, God ona verei!” Ma taui i baiei.
18Mai Sadusi ai vitumaḡana da rava eḡa ita vovomairi-me maranai e irairaḡe. Anina ma ḡelaui i nei Iesu awarina ma i paridadanei,
19“Tauviararamana! God ana tarawatu, Moses wenanare i girumi: Mepa da oroto iʼraḡe ma kaiababana i netawanei ma eḡa natunatui. Oroto vareina kaiababana ina ravaḡi ma roaroa ina ḡuni vareina aubaina.
20Mara tagogi varevarei seven i mae. Ma natuevou i tavine ma eḡa natunatuna ma oroto i ʼraḡe.
21Vareina viruaina kaiababa i ravaḡi ma tauna maiteni eḡa natuna ma i ʼraḡe. Ma nanare vareina vitonuina.
22Ma nanare anatapui seven, wavinena i ravaḡi ma eḡa natunatui. Au muriai wavine iʼraḡe.
23Anatapui seven, wavinena i ravaḡi. Vomairi me au marana, lamna aiai awana?”
24Iesu, taui i riwei, “Aiwai Moses i girumi ma God ana rewapana eḡa ota aramanei.
25Maranai taui iraḡelei ina vomairi, taui eḡa ina tavine bo ina vitavinei. Wate ina mae me anela au mara.
26Ma rava iraḡelei ai vomairi babanina, Moses ana tarawatu eḡa ota iavi bo? Mepa ai i ararata lana, kampa God Moses i riwei: Tau Abraham ana God ma Isaac ana God ma Jacob ana God.
27Tauna eḡa rava irairaḡei ai God, wate rava lawalawai ai God. Taumi o moru kaua!”
28Ma tarawatu badana tagogi i nae ma ai vitarapiri i nonori. Ma i nonori da Iesu i babani kaua, lamna aubaina tauna i vitara-viravira, “God ana tarawatu metauna i ḡetelara?”
29Iesu i paribelei, “Ḡeḡetelarana tagogi lamna wei: Ona rautaniḡana Israel! Bada ata God, tauna ava Bada.
30Bada ami God nuanuami ina vaia orami anatapunei ma aruami anatapunei ma ami nota anatapunei ma ami rewapana anatapunei!
31Ma viruaina lamna wei: Rava ḡelaui nuanuam ina vaia me tam nuanuam e vaivai-melei! Wei tarawatui ruaḡa i ḡetelara, eḡa me ḡelaui nanare.”
32Tarawatu badana i riwa, “Tauviararamana u babani kaua! Riwa kaua u babaniei, Bada Tauna ava God ma eḡa mepa ḡelauna.
33Ma nuanuami ina vaia orami anatapunei ma ami nota anatapunei ma ami rewapana anatapunei. Ma, Rava turam nuanuam ina vaia me tam nuanuam e vaivai-melei. Wei tarawatui ruaḡa lamna i ḡetelera, eḡa me pulo apuapunana bo pulo ḡelaui.”
34Iesu i ʼnanai da tauna i paribelana kaua ma i riwei, “Tam, God ana vigulau au ḡereḡerena e ḡeḡeta.” Ma eḡa aiai tepana ita tora da Iesu ita vitara-viravirana-melei.
35Maranai Iesu au Tempol i viararamana ma i vitara-viravira i pa, “Aiwai aubaina Tarawatu Babadai e ririwa da Keriso tauna David natuna?
36Arua Vivivireina, David nota i verei ma tauna i riwa:
37—David, tauoina wei gulauna i ḡorei bada. Ma menanare da badana lamna, David natuna?” Patara ḡaeḡaena riwana i nonori ma i vinuaiai.
38Ma Iesu, taui i viararamani i pa, “Tarawatu babadai ona rovoei. Ai gara manamanai ma e bababara nae au deba da rava taui e vivivirei.
39Taui anikiala vinevinei pari au numana ma au torela, gabu aiaii e vaivaia.
40Taui, kaikaiababa e morumorui ma ai numa e kwalekwalei, e morumoru ma e raraupari-vai-manamanawa. Taui ai kovoḡa ina apoapoe guratana.”
41Ma Iesu, pulo aniterenana au baba ḡelauna i kiala ma rava i ʼnananai mane i tereterei. Rava maḡamaḡaui vivimanei, mane maḡamaḡaui i terei.
42Wate kaiababa molamolakana i nei ma mane muomuoi ruaḡa i terei, ruvana i aburu kaua.
43Ana tauvotaḡotaḡo i ḡorei ma i riwei, “Anina a ririwemi, wei kaiababa molamolakana i tere-guratei, eḡa me taui ḡelaui.
44Taui ḡelaui ai maurei i verena, wate wei kaiababa molaka ma ḡarinei anatapuna i terei, ana anilawana anatapuna.”
