Lukas 1:24-62

²⁴Á ari kuruk nga nabayák, á nangáguk si Elisabet nga atáwa na. Á yáyù nga naggián lâ ta bale ra ta límá nga bulán.

²⁵Ta kinagi na, “Nepallà yù allà ni Apu nikán, ta inabbágán nangà, tapè aringà mappasirán sù ira kábuluk ku,” kun na.

²⁶Á sù mekánnam nga bulán nayù kabussì ni Elisabet, jinok ni Namarò si Gabriel nga daroban na ta umay ta ili na Nasaret sù purubinsia na Galilia.

²⁷Ta inibilin ni Namarò kuna yù kagian na sù magingánay nga naggián tán, nga mangngágan ta Maria. Nakitarátu si Maria sù laláki nga mangngágan ta Kusè. Á si Kusè yù ginaká nayù ngaw Patul Dabid.

²⁸Á limibbè yù daroban sù gián ni Maria, á kinagi nayù daroban kuna, “Ye, Maria, nga meddù ni Apu! Mapagayáyâ ka, ta mepulù nikaw si Apu,” kun na.

²⁹Á pakaginná ni Maria sù kinagi na, nerallà yù bagal na. Á ninononò na nu anni yù kebalinán na.

³⁰Á kinagi nayù daroban kuna, “Ari ka maganássing, Maria, ta nepallà yù pangikállà ni Namarò nikaw.

³¹Á yáyù nga mangáguk ka sangaw, á maganâ ka ta laláki nga ingágam mu ta Kesu.

³²Aggina yù Kotunán, á ingágad da ta Anâ ni Namarò. Á pabbalinan ni Apu Namarò ta patul, nga táli nayù ngaw Patul Dabid nga naggaká kuna.

³³Á mammaguray ta áddè ta áddè sù ira ginaká ni Akup. Á awán ta áddè nayù pammagure na.” Yáyù kinagi nayù daroban kâ Maria.

³⁴Á kinagi ni Maria sù daroban, “Kunnasi yù kesimmu na yaw, ta awánà ta atáwa?”

³⁵Á kinagi nayù daroban kuna, “Umay nikaw yù Mangilin nga Ikararuá, ánna malirúmán naka nayù pakáwayyá ni Namarò nga mamagaddátu. Á yáyù nga mangilin yù assítay nga meyanâ, á ingágad da ta Mangilin nga Anâ ni Namarò.

³⁶Á mabussì gapay si Elisabet nga kanakanáyum mu, mássiki nu bakabákakin, nga kagiad da ta mabbalá. Á annam nga bulánin yù bussì na. Á maganâ sangaw ta laláki.

³⁷Ta awán ta arán na makuá ni Namarò,” kun nayù daroban.

³⁸Á kinagi ni Maria, “Sikán yù masserbi kâ Apu. Parè bì ta mesimmu nikán ngámin danniaw nga kinagim,” kun na. Á nánaw yù daroban.

³⁹Á ari nabayák, á naggagannuâ si Maria, á nánaw ta inapurán na nga umay ta ili sù puddul sù purubinsia na Judiya.

⁴⁰Á minay sù bale ri Sakariâ. Á kinagi ni Maria kâ Elisabet, “Et taka tullúnán, Elisabet. Kunnasi ka?”

⁴¹Pakaginná ni Elisabet sù ubobuk ni Maria, inikáddagâ na lâ nagguyu ta nasikan yù assítay sù sán na. Á dagarágâ nga minay yù Ikararuá ni Namarò kâ Elisabet.

⁴²Á yáyù nga iniyássikan ni Elisabet yù ngárál na, á kinagi na kâ Maria: “Mapagayáyâ ka ánnè sù ira ngámin nga bábbay, gapu ta piníli naka ni Namarò. Á mapagayáyâ gapay yù abbing nga iyanâ mu sangaw!

⁴³Á magayáyákà megapu sù ángngiparáyom nikán, ta em mà sinullúnán, sikaw nga yená nayù yápù!

⁴⁴Á ta pakaginnâ sù ubobuk mu, matagenà ku yù pagayáyâ nayù anâ ku, ta nasikan yù pagguyu na sù sák ku.

⁴⁵Á pagayáyatan na ka ni Namarò gapay, gapu ta panguruk mu ta palurotan ni Namarò yù ngámin nga kinagi na nikaw.” Yáyù kinagi ni Elisabet.

⁴⁶Á kinagi ni Maria, “Dayáwak ku si Apu Namarò, á nepallà yù paddáyò kuna.

⁴⁷Á ayatánà kâ Namarò, ta aggina yù mangiyígù nikán.

⁴⁸Á kemámmatán nangà, nga tumulù nga masserbi kuna. Á ta áddè kunangan ta áddè noka, iparámak nayù ira ngámin nga tatolay ta sikán yù piníli ni Namarò nga pagayáyatan na.

⁴⁹Si Namarò yù makáwayyá ta ngámin, á makapállâ yù kingnguá na megapu nikán. Aggina yù kotunán nga mangilin.

⁵⁰Á ikállà na yù ira ngámin nga tatolay nga makimoray kuna, yù ira ngaw olu nga tatolay ánna yù ira ginaká ra ta áddè noka.

⁵¹Ipasingan ni Namarò yù pakáwayyá na nga mamagaddátu, á pawwarawaratan na yù ira tatolay nga mappeddaráyaw, nga notun yù nonò da.

⁵²Irián na yù ira motun nga patul sù pammagure ra, á ipotun na yù ira kagukábán nga tumulù, tapè meparáyaw ira.

⁵³Pakáppagan na ta magannagannuk nga napiá yù ira magáwák. Ngam yù ira maríku, papanáwan na ira nga awán bulubugá ta ipáno ra.

⁵⁴Abbágán na yù ira masserbi kuna, nga ginaká nayù ngaw Kákay Israel, ta arán na káttamán yù initabbá na, nga allà na nittam nga tatole na ta áddè ta áddè.

⁵⁵Tuppálan na yù initabbá na ngaw kâ Kákay Abrakam ánna yù ira ngaw naggaká nittam, ta ikákkállà na ittam nga ginaká ni Kákay Abrakam ta áddè ta áddè.” Yáyù kinagi ni Maria sù paddáyo na kâ Apu Namarò.

⁵⁶Á naggián si Maria ta bale ni Elisabet ta tallu bulán. Á pappasá na tallu bulán, nánaw nga nanoli ta gián na.

⁵⁷Á jimittál yù paganâ ni Elisabet. Á laláki yù iyanâ na.

⁵⁸Á pakaginná nayù ira karúbá ra ánna kanakanáyud da ta meyannung sù makapállâ nga pinalurò ni Apu Namarò megapu kâ Elisabet, mepagayáyâ ira gapay nira.

⁵⁹Á sù mekawalu nga ággaw nayù abbing, naggagammung yù ira kábulud da ta bale ra, ta tuppálad da yù kustombare ra nga mangugì sù abbing. Á ingágad da nakuan ta Sakariâ, nga ngágan nayù yáma na.

⁶⁰Ngam kinagi nayù yená na, “Ari! Ari mangngágan ta Sakariâ, ngam si Kuan yù ngágan na.”

⁶¹Á kinagi ra kuna, “Ngattá, ta awán gemma ta kanakanáyun naw nga mangngágan ta Kuan!” kud da.

⁶²Á sinenniasád da laguk yù yáma nayù abbing, ta iyabbû da nu anni yù ikáyâ na nga ingágan sù abbing.