Luk 1:24-62

²⁴Emuli tale isaa o nau, me vausenna ateva ta Elisabet ang ghe suusunuku, me ghe tam aotuotu poila ghe roola ghalima ulana.

²⁵Ghe uela va, “Vau eteva ghe alousiusi teeieghila, me ang ghele gheleila ia oia voto ateva ange lutu etaghi, tani ghaa velu nipalata ateva etaghi ta mataira taumattu ngatoa.”

²⁶Tale aiaaghaonomina ateva (6) ulanina Elisabet nau ghe suusunuku, Vau eteva ghe suula ensol Gabriel tani sio tale natu masaliki erighi eGalilii, ararina ateae ta Nasareti.

²⁷Ghe lao sio tani tara aliki vause ateva, karika ghe aso tee poi teva taita, ararina ateae ta Meri. Laghe aseainiela va elai ta Josep, tuvuna ia Deivit.

²⁸Ensolo ateva ghe lao sio etana me ghe uela va, “Elue talaua etam! God ang ghe arangiseiola, me Vau eteva etokatoka teeio.”

²⁹Meri ghe soghiaala tani nongo isaa o inangari, me ghe annangailiila va tani saa inangari llo oia.

³⁰Me ensolo ateva ghe uela va, “Meri, urou mene matautu. Vau eteva aue eghelei masi voto etam.

³¹Unongo! Aue ukkaai aliki eteva taita ia, me uase ararina ateae ta Iesu.

³²Ia aue enamuu, me aue la koloa va Natuna ateva Lo ateva Iaaili Epona. Me Vau eteva God aue egheleia ekingi nongina tuvuna ta Deivit.

³³Ia aue namuu tale ararimangalina ateva Jekop nau ekapa atoa, me ninamu ngateae etana karika aue ekapa.”

³⁴Me Meri ghe kolomila ensolo ateva va, “Isaa o voto, vaalua aue elutu, poli karika aghe aso tee poi teva taita?”

³⁵Me ensolo ateva ghe liula inangarina me ghe uela va, “Aue Spirit Manga ateva emae toka etam, me sarasarakaniaane Lo ateva Iaaili Epona aue eakouo. Ia o aliki eteva aue umolenainia aue emanga, me aue la koloa va Natuna ia God.

³⁶Unongo, mangalim ta Elisabet ang ghe vause namuula, me ia oia ekakkaai me aue emolenaa, aliki eteva taita ia. Nau to ang ghe lao sio, laghe ue va karika erooroo tani ghaa aliki. Me ia oia esuusunuku ang ghele ghaonomola (6) ulanina.

³⁷Poli karika teva voto God etam rooroo tani ghelei.”

³⁸Me Meri ghe uela va, “Unongo, aghi kapuna vause tau ngai uungu ieghi Vau ngepona ateva. Erooroo tani ghelei etaghi voto nongina uauliaa.” Vara me ensolo ateva ghe kasu vuliela.

³⁹Kasina nau ghe lange sio tale isaa o nau, Meri ghe ailuiluila tani lao tale voto ateva oroi motouru etana tale kateae ppae natu masaliki tale masaliki eteae eJiudia.

⁴⁰Me ghe kupi ssola tanganuena Sekaraea me ghe tarala Elisabet me ghe uela va, “Elo alai etam.”

⁴¹Nau Elisabet ghe nongola Meri ghe samasama teeia, aliki eteva ta kovane namungaili ta ghe aisiisiaala, me Spirit Manga ateva ghe pasula ta Elisabet.

⁴²Me ghe sama anamungailiila tani ue va, “Vau eteva ang ghe tau aatu sio niarangise elaulau niarangise etautau ta mene katoa vause. Ia ona aliki eteva ukaakaaia aue eghaa niarangise ta Vau eteva.

⁴³Kalughu sa ateva me kinna ateva Vaughu eteva ange mae sio tani taraieghi?

⁴⁴Nau eteva anongola ta usamala, arovaeaata ta aliki eteva ta kovaghi emasimasila me eaisiisiaala.

⁴⁵God aue earangiseio poli ughe aiesoaala voto Vau eteva ghe uela va aue elutu ta ngetam.”

⁴⁶Meri ghe uela va, “Maamauluaaghi etautau sae ararina ateae Vau eteva,

⁴⁷me urunguitanighi eteva emasimasiangaili God ta eaasaangieghi.

⁴⁸Aghi nim tau ngai uungu ieghi etana, karika teae ararighi, me ghe taraieghila tale maamasinaane. Ia oia vituu eteva me llo auena vituu aue la ue va Vau eteva ghe arangiseieghila,

⁴⁹Lo ateva sarasarakanaaili ia ghe gheleila voto namungaili etaghi, me ararina ateae manga ia.

⁵⁰Eaapasunga masi aalousiusiaane ta lo atoa la oneoneainia aue etoka gheelei evalua o tale ia oia vituu eteva me llo auena vituu.

⁵¹Ghe gheleila kinatama voto ta nimana, me ta lo atoa la tautau sae nannaaira, aue egheleila la ghaitiuaa see.

⁵²Ghe atoka siola lo atoa taumattu namu ngila me sarasarakanaaili ila me ghe atingina saela lo atoa taumattu karika righi arariira.

⁵³Ghe tautau masi voto ta lo atoa taumattu maloona ila, me lo atoa tau peipeiena ila, ghe sungisungi vella, nim ila laghe kasukasu karika laghe ghaaghaa righi voto.

⁵⁴Ghe sausila kapuna tau ngai nongonongo anna atoa ta Israeli etoa, poli eannaa alousiusiaane

⁵⁵ta Abraham me lo atoa tuvuna auena la lutu, nongina ghe auliaala ta tuvuita atoa.”

⁵⁶Meri ghe toka teela Elisabet ghe roola kotolu ulana me ghe vira mene kiriaa lao sio tanganuena.

⁵⁷Nauna Elisabet tani molenaa, me ghe molenaala aliki eteva taita ia.

⁵⁸Lo atoa taumattu tanganueira aitauaa me kapuna atoa, laghe nongola kiukiu vaalua Vau eteva aalousiusiaane ta Elisabet. Laghe masimasi eitauaa teeiela.

⁵⁹Aiaaghaoaluna (8) ateva nau, taumattu ngatoa laghe mae sio tani velu eitauaa tani iso aliki eteva, me laghe aloanna tani ase ararina ateae ta Sekaraea, poli ararina ia tamane.

⁶⁰Kinna aliki eteva ghe uela va, “Karika! Ararina ateae ta Jon.”

⁶¹Me laghe uela etana va, “Karika teva kapuimim ararina ia arari eteae ona.”

⁶²Me laghe aaimatoonga ta nimaira tani kolomi tamana aliki eteva va saa arari eteae eaaloannaia.