Lokasu 1:24-62

²⁴Ruknoginitka walegognekaka, kamshirotkani ganunro Gilisaweti. Pamyo ksuru tyogimatnawa. Wane china,

²⁵“Giyagni wane rixno Gitsrukaachi, wa walegogne retyano konpatetyapatkano yine getanuya.”

²⁶Patsrujire ksuru chininri Goyakalu yokanatlu gitowreru Kawrili. Satu pokchi Nasare giwakatletachri, Kalilesreta, yokanatlu.

²⁷Makloji jeji metkatowa yegi yokanatlu. Satu jeji gipiratanrotka, Gosi giwakatletachri, Tawiklopisha. Wala makloji giwaka Mariyni.

²⁸Wala yegi jigloka Goyakalutowreru. Wane china, “Mariya, gimutkalurpotyi. Pixaymalu Gitsrukaachi.”

²⁹Tkojwakanshinikanutnanwa wale tokanu chinanu. Tnutanshinikanuta gi pixkalutuknige wa tye galuklewlu.

³⁰Giyagni wa Goyakalutowreru wane chinro, “Mariya, gi pikanu. Gi rixanu Goyakalu gimutatkayi.

³¹Xani pmushiwatanu. Pushpaakakanru puturu. Pgiwakatanru Geso.

³²Tyepni wa tsru. Teno potu Gajeru Wgene chinko. Gitsrukaachi Goyakalu genekanru rutsrukatni Tawi pogirewatyawaka.

³³Gakowniklopishane yegi pogirewgognenatini. Pogirewatyawaka gike rixiniko nikawnanu.”

³⁴Giyagni Mariya wane chinru Goyakalutowreru, “¿Gi rixpokotanu wa tye? Gi rixanu gi jeji numatawa.”

³⁵Goyakalutowreru gigita. Wane chinro, “Giwekikaluru Kpashiri ginyegitanyi. Teno potu Gajeru giyakle chikletyegitanyi. Giyagkoxni kpashiripni gishpakachripa wane chinko Goyakalu Wgene.

³⁶Ga wa petanro. Pumole koxa Gilisaweti wala koxa tutsroginiko tmushiwata. Toturupni. Patsrujire ksuryegitkalo wa migato chinkaluronanu.

³⁷Gi rixanu Goyakalu gi satuna ma mumkatanutni.”

³⁸Giyagni Mariya wane china, “Gitsrukaachi wayegrerno. Wane nixikolupa pixa chinyawakpotuko.” Wala yegi yiyatka Goyakalutowreru.

³⁹Walegognekaka tpalnamta Mariya. Kmagkatewaka tya. Teyakawamta. Gotechijne gajeru pokchi tya.

⁴⁰Sakariyapji tjiglokamta. Taluklo Gilisaweti.

⁴¹Wane tixatka. Wa Gilisaweti yijnaka galukletinitkalo wa Mariya, wa mturu tonanwaka gajeru ruptekapa. Wa Gilisaweti Giwekikaluru Kpashiri gwagajitanro potu gixachrotkani.

⁴²Tsru saple tixa. Wane china sapleta, “Giglenshinikanyegitkaluryi pixje suxonyegiya. Giglenshinikanyegitkaluru punanwaka gishpakyachripa.

⁴³¿Gi nixge gita wa tye giknogyapno, wa Nutsrukate ginro ginyegityawakno?

⁴⁴Gi rixanu neyijnako galukletiniyakawayi, wa mturu nonanwaka gajeru ruptekapa rumuwle chinanu.

⁴⁵Giglenshinikanyegitkaluro galixachro, gi rixanu poyagkakikolupa wa tunkakikolupirana, wa Gitsrukaachi ginkakjixyalo.”

⁴⁶Mariya wane china, Numalwutlu Gitsrukaachi nonshinikanuya.

⁴⁷Ga wa numuwyegitlu Goyakalu, Nognetkakjeru.

⁴⁸Gi rixanu mpogireto retyano wayegrerno. Xaniyakawa giglenshinikanyegitkalurno Wane chinannona pejnurune gimuweekakgognenatachinepa gapkatatachineshaklumnunanukapa.

⁴⁹Gi rixanu wa Kgiyaklewakleru tsrupirana kamruyegitno. Kpashiri giwakni.

⁵⁰Retwamonunanumtna pagwashlukaka gimuweekakgognenatachinmnunanuka wa pikjene.

⁵¹Muchkowamyota. Galixkotnachinewa rajiyna ga wa ginshinikanuyna kopalatna.

⁵²Pogirewatyawakna tsrukakalune ruknokya. Mpogirene tsrune rutaka.

⁵³Kiglerkakaya jinanu rixkakna nachichachine. Ga wa ponikolune maleshayalune yokanatna.

⁵⁴Rupxaklu wayegreru Gisrayili, gi rixanu rushiniklu retwamonrewle,

⁵⁵Chinyawakpotukna wutsrukatenni, Gawra ga wa giklopishane rushinityawakpotuko.

⁵⁶Mapa ksuru Gilisawetiyma wane twa Mariya. Wanepnute topji tsatokatnaka.

⁵⁷Ga wa Gilisaweti poyagkakatkalu togogne tushpakawgenetinripatka, rushpakatka toturu.

⁵⁸Yijnakotinitkana tumwastsitanune ga wa tomolene wa tsru getwamonre rixyalo Gitsrukaachi, rumuwatna walayma.

⁵⁹Wane rixatka. Yokgipgogne chininri runna wa sajruka gistakletyapatkaluna wa mturu. Ruru giwakmaka rutakluna, Sakariya.

⁶⁰Tugita runro. Wane china, “Gike. Seyni Gwa giwakatko.”

⁶¹Wane chinrona, “Gi satuna pumole wane tye giwaka giwakatletachri.”

⁶²Rutsejrigjeyegitluna ruru klu giwaka ralukyalu wale.