Luka 1:24-62

²⁴Vani degomoleau uoholisege mahinaveu tobuaime oai tiholisito bata ada mole ke uvumo o unahamo ua.

²⁵Isi loui avoe, “Vagana moaga di eseholiale kemo Dilavau di tedahonu. Iale ataeau di elehage di eseholiale mati kena uoholisi.”

²⁶Ke iae bata igae uoholisege Dilavau anelu nehe Geibiliolo hanavoge keu Galili vatae tialeu o mole Nasaletae velemanu.

²⁷O keve velemage ma mole Meli keu ua. Ma ke abu Diosebaho kokovalu. Dioseba keu Deividi valadamo lohonu.

²⁸Ige anelu keu lohoale avuho loui avoe, “Ana duave. Kosiveu aiti ui a hoesehavoge au nivemo duave.”

²⁹Kateige Meliu hoto ke evisi vikobaluganu. Isi huhuai avoe, “Hoto oleteike ko.”

³⁰Ige anelu keu avuho loui avoe, “Vabu hale. Dilavau a eahalenu.

³¹Ialemo ana bae eseane. Ese keu uge ivihai loui kosea, ‘Iesu.’

³²Kena uniege kosi baluga holige Dilava ehue umale kena bae loui kosea, ‘Keu di moike.’ Dilavana ebagemage auna vatae kosive holisi au haoka Deividiu ugulamomale telonamo ugulamoi.

³³Iale auna bae vani baita Diekobo valada kebia nalievegei. Isi kateige vuvuneveu bae ata kebiamo uoholilivebene.”

³⁴Aneluu hoto kateale louge Meliu namihai loui avoe, “Dau koliaholinu. Iale dana oleve kateai eseai.”

³⁵Ige aneluu avuho loui avoe, “Munana Tumutena aemo dobai lohoge Dilava vuvune kena a bamuge ana ese ke manela. Katealemo Dilavana au mo ke ivihai kosea, ‘Di mo tumuteike.’

³⁶Ana a neina mole Elisabeti ke hilokanu. Ataeau loui avoe, ‘Keu eseholisito mabata holisi ua.’ Hoto kateale louito keu tobuta uale aike bata ada mole isi igae uoholinu.

³⁷Dolodolo halenela. Dilava kemo onobeu bae anekialivebene.”

³⁸Kateige Meliu loui avoe, “Dau Kosive esemu daliko. A hoto bahata louale kena daemo lohoge keu duave.” Kateai louge aneluu halei tinu.

³⁹Vani kemo Meliu solekai au kunai bevuai malei tanae o moleve Diudia vatae tinu.

⁴⁰Isime Sekalaia oe tiale mahinave Elisabeti namihai loui avoe, “Ana duave.”

⁴¹Ige Elisabetiu hoto ke evige unive uvue eseveu kibianu. Ige Dilava Munanae Tumuu avuemo lohoaleu mai vuvunetinu.

⁴²Ige Elisabetiu tovuai avuho loui avoe, “Dilavau a ebagemage a keate bahatae vigomo keate baluga. Iale ese kena uge Dilavana ebagemai hoesehavoi.

⁴³A keu di Kosive neina. Iale a dae deiai lohoale kou duave baua.

⁴⁴Di a hoto louale ke evisege di ese unita uale keu kibiai vahaehoanu.

⁴⁵Iale vahaeho baluga. A hilokage Dilavau aho hoto louale kena seleve holisi.”

⁴⁶Kateige Meliu avoe, “Di di uvumo vahaehoai di Kosive hoesehavoma.

⁴⁷Dilavau di tedahomale kemo di vahaeho baluganu.

⁴⁸Dau Dilava nimo iviholinu. Isito keu di huhuanu. Nova komo ata bahataeabuna loui kosea, ‘Dilavau keate ke hoesehavonu.’

⁴⁹Kosealemo Kosive ivi balugate keu dahoe vaveve baluga vanu. Ivive keu tumute.

⁵⁰Katealemo oleuoleu Dilava vabuhavoge uvuvena abuemo ui. Ige auna vani bahata kebiata eseabeta tedaevegei.

⁵¹Ige adave keu vaveve negote vanu. Isime auna oleuoleu abu ebika tabagevaho huhuimale kebia huhuihuhui bahata malei evihai.

⁵²Keu vatae kosive baluga kebia tatolemagevenu. Isito au ata uvevete kebia tabagevenu.

⁵³Keu lovie dua ata vaete kebia ovege uniabeu hanilahalu. Isito ata kunaite kebia iovege abu ada unahala tilu.

⁵⁴Dilavau au ata Iselala tedaevenu. Au kebia haleveholisito kebiaho uvuale kemo au tedaevenu.

⁵⁵Kosealemo Dilavau subuta nahie buluveho lounu. Isi Ebalahamuho loui avoe, ‘A valada isi a ese kebia dana vani bahata huhuevei hoesegevegei.’”

⁵⁶Meliu hoto kateale louime Elisabeti oe uale bata abuita igaetaeau uoholisege au halei au oe tinu.

⁵⁷Vani mole Elisabeti eseu uveve vaniu lohoge moveu ua.

⁵⁸Moveu uge valadaeabeau isi haokuvuiabeau ke evisi vahaeho balugalu. Abu hilokage Dilavaike keate ke huhuaime ese ke mai ominu.

⁵⁹Bula igaeu uoholige haokuvuiabeau lohoale mo ke hoesehavoi vudive vate etulei isiviale ataeau kemo hilokage keu Ebalahamu valadae ese. Kebia vaveveu kateanu. Vateve etulege uoholige abu isiviai mamave Sekalaia ivita ivihai.

⁶⁰Isito neinaveu loui avoe, “Kate halevave. Iviveike Dioni.”

⁶¹Kateai louge abu keate keho loui avoe, “Au a valada kemo ivi katealebeu uoholinu.”

⁶²Isi kateaime abu ada unahata deiada mamave haivuma. Isiviale mamaveu ivi oleteale mo ke ivihai.