SAN LUCAS 1:24-62

²⁴Rkontûví ne, ñadɨꞌɨ̄ ñá, Isabeé ne, ñúꞌū iꞌxá ña. Uꞌun xóō é ntē ña vádā mí ni ñēꞌe ña é dé kuení ña:

²⁵“Dóo váꞌā o dé Xuva ko nī kó vevii e táꞌxi ña é kōo iꞌxá ko vata koo é ña nantii níꞌnī ká ñaꞌa sán ko”, kaꞌan ña.

²⁶Dā kúvi iñu xoó ne, Xuva kō né, taxnūu ña uun ánjē, ñá nani Grābiee é kɨ̄ꞌɨn ña uun ñuu é nani Nazāree, é kāduku ntée ñuú Galilea,

²⁷é kīkoto níꞌni ña uun ñadɨ̄ꞌɨ kuétsi, ñá nani Māria. Dɨvi ñā ne, e tuví ntetu ña é kani víꞌi ña ni uun ñatīi, ñá nani Jōsee, tatá viꞌi rei Davii.

²⁸Kúkɨ̄ꞌvi ánjē san mí tuví ñadɨ̄ꞌɨ́ san ne, kakaꞌan ñá ni ñā: —¡Ntiusi o! Dɨvīn é nakaxnúu Xuva ko ō é naxnuu viko ña o. Dɨvīn ne, dóo nuu méꞌñu Xuva ko ō —kaꞌan ña.

²⁹Koó dā kúduꞌva ña é kākaꞌan ánjē san ni ña. Da dé kuení mii ñā: “¿Nté kui kuān ó kakaꞌan ñá sāꞌá nī ko?”, kaꞌan ña.

³⁰Kidáā ne, kakaꞌan ánjē san ni ña: —Ñá ku uꞌvī ó, Maria, tsí niꞌi o é vāꞌá ntaꞌa Xuva kō.

³¹Viꞌi a vé ne, kuꞌun iꞌxá o. Koo uun iꞌxá o, iꞌxá tii é kunani Jēsuu.

³²Dɨvī né, dōó kaꞌnu ñaꞌa kúvi. Kunani īꞌxá Xuva kō, ña e dóo kaꞌnu kueꞌen. Xéꞌe Xuva kō é kuvi ña rei, vata kaa uvata ika ña, rei Dāvii,

³³é kodo nuū ñá iña tatá viꞌi ñá Israeé san ntii dañu ntūvi, é ntē ña ntɨ́ꞌɨ —kaꞌan ánjē san ni ña.

³⁴Kidáā ne, katsixeꞌe Mariá san ánjē san: —¿Nté ntu koo kuvi sáꞌā? Tsí xuꞌú ne, ñá te tūvi níꞌi ú ñatīi —kaꞌan Máriá san.

³⁵Kidáa kākaꞌan ánjē san ni ña: —Kiꞌxi Espíritū Sántū méꞌñu ō. Xuva kō e dóo kaꞌnu ñaꞌa ña ne, kūnuu méꞌñu kunuu dava ña o. Dāꞌví nuu ña o ntatɨ ñā vata kaa viko san. Dukuān ne, iꞌxa é kaku sán ne, dóo vaꞌa kúvi. Kunani iꞌxá Xuva kō.

³⁶Viꞌi a vé ne, ñaviꞌi o Isabeé ne, koo iꞌxá ña dɨ, kuān te dóo ata ñā. Dɨvi ñā e ntákaꞌan ñaꞌa san é ña kuvi koo iꞌxá ña ne, é kīꞌi iñu xoo é ñuꞌu iꞌxá ña vevii.

³⁷Tsí Xuva kō ne, ña túvī nee iña é ña kuvi vií ña —kaꞌan ánjē san ni ña.

³⁸Kidáā ne, kakaꞌan Mária: —Xuꞌú ne, ña kade tsiñu iña Xuva ko kúvi u. Na vīi Xúva ko nī kó vatā ó kakaꞌan ntó nī ko —kaꞌan ña. Da kidáā ne, kuéꞌēn ánjē san.

³⁹Ntuvi tsikán ne, kantɨ́ꞌɨ tsi kueꞌen María, kúntāa ña ñuú mí kaduku ntée Judea.

⁴⁰Kidáā ne, xée ñā nú viꞌi Zacāriá ne, kakaꞌan ñá ni Isābeé ntiusi.

⁴¹Dā téku Isabeé san ntiusi ñá ne, kāntá nuu iꞌxá san ini iꞌxí ña kān. Isabeé san ne, nuu tsitu Espíritū Sántū san nima ña.

⁴²Kidáā ne, un nɨɨ kuéꞌen ini ña kakaꞌan ñá: —¡Dɨvīn e dií dií ka naxnuu víko Xuva ko ō é un ntɨɨ́ ntɨ̄ɨ́ ñadɨ̄ꞌɨ́ san! ¡É nāxnuu viko ña iꞌxá o é nuu ini iꞌxí o kān dɨ!

⁴³¿Xoó ntu ñaꞌa kúvi u é vēꞌxí dɨꞌɨ̄ Tóꞌō kó, vexkoto niꞌni ña ko?

⁴⁴Tsí ura tsí i da téku ko ntiusi ó ne, iꞌxá ko ne, kāntá nuu ini iꞌxí ko kān e dóo diní i.

⁴⁵¡Nché kuān nche váꞌā o é kākuinchiꞌxe o, tsi sáꞌā ne, kuntaa vátā ó kakaꞌan Xúva ko ni ō! —kaꞌan Ísabee ni ña.

⁴⁶Kidáā ne, kakaꞌan Mária: Dōó kaꞌnu kuiní ko kuenta iña Xuva ko.

⁴⁷Nimá ko ne, dōó nuu dîni kuenta iña Xuva ko, ña é nakākú ko.

⁴⁸Tsí Xuva kō né, ntūntaꞌví ini ña ko, xuꞌu é da kade tsiñu ú iña ña. Un tsi nché vevií ne, é nchii dañu ntūví kaꞌan ñáꞌa san tsi dóo váꞌa ntuvi ko.

⁴⁹Tsí Xuva kō né, dōó iō ña é viī ña; dōó kaꞌnu e táxnūu ña iñá ko. ¡Dɨvi ñā e dóo vaꞌá ña!

⁵⁰Nguentúvi tsi kantuntaꞌví ini ña ñaꞌa, da xōó ka ñaꞌa, ña é kānuní i ña.

⁵¹E nañéꞌe Xúva kō kó tsi dóo kaꞌnu ña; īde ña é ntɨꞌɨ miī é ncho vií ñaꞌa, ña e dóo naꞌnu ñaꞌa kuiní i;

⁵²naīnu ñá ña é naꞌnu ñaꞌa san, nántaa dūkun ñá ña ntāꞌví san.

⁵³Xéꞌe ña un ntɨꞌɨ̄ é vāꞌa é nchio ñaꞌa, ña é ntátaan núu i. Dá nakūnu ña ña kuiká san, koó da mii ntāꞌa ña.

⁵⁴Xnchii ña ñāꞌa ña, ñá Israee, ña kade tsiñu iña ña; ñá ni kūnáa ini ña é ntuntaꞌví ini ña ña.

⁵⁵Dukuan ō xeꞌé Xuva ko xūꞌu ñá ni ñata kō, ni Ābraan ni iꞌxá ña, nchii dañu ntūvi. Kuan ō kaꞌan Mária.

⁵⁶Kidáā ne, kátūví Maria ni Isábeé te ūni xoo. Rkontûví ne, kúnūꞌún ña nú viꞌi ña kān.

⁵⁷Dā kúntaa ntúvī é kāku iꞌxá Isabeé ne, xío ūun iꞌxa tii.

⁵⁸Kidáā ne, kuéꞌen ñaviꞌi ña, kūkoto níꞌni ña ña, tsi dóo kaꞌnu kuīni ña e káku iꞌxá Isabee. Ini ña tsí Tóꞌo kō né, dōo váꞌa ntuvi xéꞌe ña iña ña.

⁵⁹Dā kúvi una ntúvi ne, kueꞌen níꞌi ñā iꞌxá san é kāꞌnté nuu ña un siin kúñū é ixi i, vata ō kaꞌan Xúva kō. Ntīo ñaꞌa san é kunani vata nani uva i Zacāriá ne,

⁶⁰ntá tsi dɨꞌɨ ī né, kakaꞌan ña: —Ñáꞌā, tsí Juaan kunáni —kaꞌan Ísabee.

⁶¹Kidáā ne, ntákaꞌan ñáviꞌi ña: —Ntá tsi xoxó ñaviꞌi o, ña é kuan nanī —kaꞌan ñá ni ñā.

⁶²Dukuān ne, koó dā ntaꞌa ña kakuvi é tsixeꞌe ña ūva iꞌxá san vata koo é kūtuni ña nté koo kunani.