Luk 1:24-62

²⁴Nani murinai kawana Elisabet iropeya ma nawaravi miikovi gaburai imakai da ke ita baba.

²⁵Ma Elisabet ivona bo, “Weni berana Bada kubiiku iberai. Karako ivi kamyuyuweku da kaku vinimaya aku wawaya kamosiyai ivi koviya.”

²⁶Elisabet iropeya da kana nawaravi miikovimasago na God ina aneya Gebriyel ivonatawei ku meyagai sago. Meyagina kana vava Nasaret, Gariri dobuna kamonai.

²⁷Ivonatawei inae wiwike gubugubu sago kurina, wiwikena kana vava Meri ma kana vopapara Josepa, ma tuna na Kiivavo David tupurereghina.

²⁸Aneyina ivona bo, “Kiiwa kiiwa, tam Bada ina vigheghena ghamana. Bada gwabimuwai emakamakai.”

²⁹Ma Meri weni sisiyina ivi yanei na nuwanuwana ikarai ma ivi nuwanotanota da avi kubiine nakanani ivi kiikiiwei.

³⁰Ma aneyina ivona bo, “Meri, ke kuna yabumana. God ina agabiibai gwabimuwai irakata.

³¹Kuna ropeya ma kuni tuwa da natum tomowa, ma kevi vavei Yesu.

³²Ini wawayaghama ma wawaya kudubisi ina vonei da tuna na God Kiidamo Makamakiina Natuna. Rewapana Bada God gwabinai ina viiya da ini kiivavo ina kaekiki David nakanani.

³³Jeikap kana dam kamonai ini bada nonowa ma ina vikiivavona na ina makai nonowa.”

³⁴Ma Meri ivona bo, “Taku na ke meyani tomowa damina ata viiya. Tuna kubiine ikikava da weni berasi ina tupuwa kuriku?”

³⁵Ma aneyina ivonapotei bo, “Kanuma Vovokaravina ina towatepanim ma God ina rewapana ina rogum. Ma tuna kubiine pepeya vovokaravina kuni tuwei da tuna na God Natuna.

³⁶Ma bade am tuwa Elisabet ini tuwa. Imagura kirakai ma wawaya inotanotai da tuna na gagarina ma kegha da gisina kava ini tuwa da natuna tomowa. Wekarakava kana nawaravi na miikovimasago.

³⁷God kurina bera kudubina itekateka kirakai.”

³⁸Ma Meri ivonapotei bo, “Taku na God ina bigabiga. Aivaghinei da ikikava kuvoneku na nakanani ina tupuwa kuriku.” Ma vaghina, aneyina Meri inekuyowei.

³⁹Nani murinai Meri ivovunagha ma yaghiyaghinai ivomiiri, inumataya ku kwanatu sago Judiya kamonai.

⁴⁰Inekiibau ma Zekaraya ina ku numa irui da Elisabet ivi kiikiiwei.

⁴¹Elisabet, Meri ina vikiikiiwa ivivi yanei na pepeya manawina kamonai ikayopapara ma Kanuma Vovokaravina itowatepani

⁴²da ikiirara, ivona bo, “Wivine kudubisi kamosiyai na tam gwabimuwai Bada ina vibiibiina irakata kirakai. Ma bade wawaya kikei kuni tuwei, tuna yavata na Bada ina vibiibiina kamonai.

⁴³Ma anota meyeku da taku na ke wavine kiimatana da aku Bada ina maduwa ita pisi da ita kitiku.

⁴⁴Kuvi kiikiiweku na wawaya kikei manawiku kamonai nuwabiibiiyai ikayopapara.

⁴⁵Bada ivi biibiinim iyamna aviyavisina ivi sisiyei kurim na kuvi tumaghanei da berasi ina tupuwa.”

⁴⁶Ma Meri ivona bo, “Nuwanuwaku Bada evovokavakavari da kana kadara ina rakata,

⁴⁷Ma kanumiku inuwabiibai da God na kaku Viviyawa,

⁴⁸Iyamna taku ina bigabiga vovokuwayiku na enotanotiku. Kimta kudubisi karako ma mara nonowa ini sisiyeku, ina vona da taku na ina vibiibiina kamonai.

⁴⁹Tuna na God Rewapana Kirakiina ma kubiiku bera ghamaghamasi eberaberai. Ma kana vava na vovokaravina.

⁵⁰Iyavo kava God eyabuyabumanei na ini kamyuyuwesi, Kimta ma kimta kurisi ina vikamyuyuwa ini debei.

⁵¹Imana rewapaninai na bera ghamaghamasi eberaberai. Iyavo kava i nota gavugavusi kamonai ekayokayotata na ikugerisi.

⁵²Kiikiivavo eteretereoruwesi ma wawaya vovokuwayisi na etereterepisi.

⁵³Iyavo kava vitonara ikarakarisi na ikanikanisi, ma mumurisi na imasi kwebukwebusi ma evonavonatawesi.

⁵⁴Ina bigabiga Israel damsi ini vitesi, ke nuwanuwana ita wapa da iti kamyuyuwesi.

⁵⁵Vonakiiyapa bagibagina iterei Abraham ma tupurereghina kurisi, Tuna sisiyina ita kaekiki mau kurisi iberai na enununuri.”

⁵⁶Ma vaghina, Meri nawaravi aroba Elisabet yavata imakai ma muriyai ivovira ina ku dobu.

⁵⁷Elisabet ina mara ipisi da iti tuwa na ivi tuwa da natuna tomowa.

⁵⁸Ma ina rakaraka ma turaturana sisiyina ivi yanei da Elisabet yavata ivi nuwabiibii kirakai da Bada ivi kamyuyuwei da ivi tuwa.

⁵⁹Ivi tuwa murinai na mara 8 ikovi na wawaya iriyei da tomowa kikei kwimata bekana ita tuviviratawei ma kana vava ita verei. Ma iti vavei Zekaraya, ina mamai yavata iti varigheya.

⁶⁰Ma ina maduwa ivona bo, “Kegha, kana vava Jon.”

⁶¹Ma wawayisi ivonapotei bo, “Am rakaraka kamonai ke sago iyai da kana vava nakanani.”

⁶²Ma wawayisi tomowa kikei ina mamai kurina imasiyai irurutawei, akova ita viiya da ina kayowana ikikava natuna kana vava kubiine.