Luk 1:24-62

²⁴Ma numur, o Elisabet anun a ino i tianan, ma a limo na kalang ke wan gisen pas gusun a rumu.

²⁵Ra i watungi lena, “A Labino i sa warut tar iau, ma uniri maragom i los ru asau ra a maimai nami umatan a taro.”

²⁶Ra i sa wonomnin kalang anun o Elisabet, o God i tulu ru a ensel Gebriel utong o Galili un ara tamon a risano o Nasaret.

²⁷I wan torom ara toraro ra ke inep tomo nam tu musano. A risano o Maria, ra di sa ubek bat tari sur anun o Josep, i tagun a kabotaro anun o Dewid.

²⁸A ensel i ruk torom o Maria ma i watungi tano lena, “Un gas, u dan doko! A Labino i kis tomo nam ui.”

²⁹A nuknukin o Maria i purpuruon ma i nuknuk doko una wasiso ri lena asau a kukuraino.

³⁰Ikut a ensel i watungi tano lena, “Maria, gong u ngara, uni o God i gas doko nam ui.

³¹Tama i! Un tianan, un usus pas a nat musano, ra un pasor tar a risano nam o Iesu.

³²Ma a risano in rereng, ma din watungi a Nutun o God a Labino Sakit. Ma a Labino o God, in ukis tari una kiskis na king anun o tubunu o Dewid,

³³ma in warkurai tukum sur a kabotaro anun o Jekop, ma anun a matanitu ken rop.”

³⁴O Maria i ting a ensel lena, “In pepetlai ri? Uni ka nolin utmakai nam tu musano.”

³⁵A ensel i balu i lena, “A Tokodos na Nion in kis un ui, ma a dekdekin o God a Labino Sakit in pulus bat ui. Ra a Tasur na Musano ra un usus pasi, din watungi a Nutun o God.

³⁶Tama i, a kukum o Elisabet i sa takano laulau, ra di watungi lena ken usus mo, ikut uniri i sa tianan, ma i sa wonomnin kalang anunu.

³⁷Uni katu utna i ngangitin torom o God.”

³⁸Ra o Maria i watungi lena, “Iau a tultul anun a Labino. I wakak ut sur din pami un iau elar ut nama num a wasiso.” Ra a ensel i wan gusuni.

³⁹Numur o Maria i waninar pas, ra i wan lakit usapat una kum tangai sur ara tamon ra i kis una papor Judia.

⁴⁰I ruk una rumu anun o Sekaraia, ra i kabo na gasgas pas o Elisabet.

⁴¹Ra o Elisabet i longoro pas a kakabo na gasgas anun o Maria toromi, a nat i milu unin balano, ma o Elisabet i bukus nama Tokodos na Nion.

⁴²Ra i watungi namin labino walngano lena, “Ui u dan tan a kum wardain rop, ma a nat kai ra un ususi i dan.

⁴³Iau osi na ngas na ino ri, ra a nan anung a Labino i wan torom iau?

⁴⁴Ra a longoro anum a kakabo na gasgas torom iau, a nat i gas, ma i milu unin balang.

⁴⁵U dan, uni u nurnur lena, a wasiso anun a Labino torom ui in nanpat mulus.”

⁴⁶O Maria i watungi lena, “A niong i watung ulabo pas a Labino,

⁴⁷ma in balang i gas un o God, anung a Tene Ulaun,

⁴⁸uni i maris iau anun a tultul na ino, a ino oros kut iau. Turpasi uniri a kum taun taro rop det in watungi un iau lena a dan,

⁴⁹uni i ra i Dekdek, i sa pam tar a kum labino utna un iau, a risano i tasur.

⁵⁰Anun a marmaris i kis torom det ra det ngara suri, a kum taun taro rop.

⁵¹I pam a kum dekdek na pinapam nama lamano, i lu susuaro ru det ra det uman labino una nuknukin det.

⁵²I woro pirso ru a kum king gusun anundet a kum kiskis na labino, ma i ulabo pas det ra det unatino pas det.

⁵³I tabor masur a taro ra det murak nama kum wakak na utna, ikut i tulu ru a kum tene gongon nama gowono lamandet.

⁵⁴I warut anun a kum tultul, a taro Israel, ra i nuk pas anun a marmaris

⁵⁵torom o Abaram ma anun a kabotaro tukum, elar nami ra i sa watung tari torom anundat a kabotaro tagun numugu.”

⁵⁶Ra o Maria i kis nisan o Elisabet elar nama tulin kalang, ra numur i milet melet sur anun a tamon.

⁵⁷Ra a bung anun o Elisabet i sot sur in usus uni, i usus pas a nat musano.

⁵⁸A kum paspasano ma a kum kukunu det longoro i lena a Labino i maris doko o Elisabet, ma det gas tomo nami.

⁵⁹Ra i sa tiwal na bung anun a nat, det waninar sur din tok talilis a pinino, ma det nemi sur det in pasor tar a risan o tamano o Sekaraia uni.

⁶⁰Ikut o nano i watungi lena, “Gong! Din pasori ut nam o Jon.”

⁶¹Det watungi tano lena, “Katu kukum i los a rising ra.”

⁶²Numur det pam a kum ukinalong nama lamandet torom o tamano, ra det tingi lena, “Osi na rising u nemi sur din pasor a nat ri nami?”