Luke 1:24-62

²⁴Wurrugu marri ngijang malgadhaadharri, aḏaba ngarrubagi-yung nga-rangarrina-yung ngiga aḏaba ngi-gulmung-muṉḏurr-mayn. Nga anubanila-wala ngi-yanggi aḏaba warruburrala-wala.

²⁵Ngiga ngi-yamayn aḏaba, “Anaani ngaya na-Buunggawa ngani-man.galagana ngayawi-wuy. Yagi aḏaba ngaya anaani ngaambuli warruburru-wuy warra-mulung-arrgi-yung-guy warra-wurru-wurruj-guy anaani. Aadanu aḏaba ngaya nganii-garra-yarini niga.” Dani-yung ngi-yamaa. Ngarraagi-yung ngi-yanggi, nga ngi-bu-burri ngiga ngi-lhalga. Marri anubani-yung ngi-burri marang-aynjaabugij na-ḻabama.

²⁶Anubanila, nubagila-wala naaynbaj-gala na-ḻabama, nigaayung na-God ni-lharrgang anubani-yung ana-angel wubani-yung-guy aanga a-Nazareth, wubani a-runggal-uj a-lhal Galilee.

²⁷Ngarraagi-yung ngarra-ngaḻaynjinyung ngigaayung, ngarra-ngarrimuwaj-jung Mary. Naagi-yung niga wunu-lhalamayaa, na-waḻyinyung, na-nimuwaj-jung Joseph. Nigawi-nyinyung warru-mandag naagi-yung na-king-jinyung na-David. Naawiṉi-yung wurrugu waari ambini-yagaynjini wuguṉi.

²⁸Anaani-yung ana-angel wu-yanggi buguni ngigawi-wuy, marri nginggu-yamijgayn ngiga, wu-yamayn, “Mary, nagang aadanu na-Buunggawa aḏaba nini-walgaṉmaa, marri nagang aḏaba niiniinggarra-ngu-burraa nugawi-rruj,” wu-yamaa dani-yung.

²⁹Ngigaayung ngarraagi-yung aḏaba ngi-walharaguni. Ngi-yambini ngigaajbaj, “Anaani yuga wu-lhaawu-yaminggarrina anaani ana-lhaawu wugurru? A-yangi yungguyung anaani ngaya nganggu-magana?” Dani-yung ngi-yamayn.

³⁰Wugurraayung ana-angel nginggu-magayn, “Yagi ngaya anaani nimba-yami, Mary. Na-God niga ni-waḻaaḻarrii nugawi-wuy. Marri nagang aadanu nini-walgaṉmaa aḏaba.

³¹Nagang aadanu bamba-waṉagana daju gujuju lhirribala, nugawi-rruj. Nubagi-yung wirrinyung banu-yabang waḻyinyung na-nimarig. Marri nubagi-yung banu-mayang na-nimuwaj-jung Jesus.

³²Niga naadagu ani-runggal-windiyung. Marri ani-mayina niga na-niwiyayung naagila-yinyung anaarrwar-inyung. Naagi anaagajij-dharrmani aḏaba niga na-king David-jinyung, wubani yaga warra-mi…yn-ngambara-waj. Niga-waj yamba God naadagu anu-buunggawa-wana, ani-ragaana yungguyung.

³³Niga naadagu ani-ragaana, warruburru-yung-guy warra-Israel, burru-yung nga, na-Jacob-jinyung warru-mandag, anggu-wuguuguni aadanu aḏaba. Nigaaj-bugij ani-ragaana aḏaba, ani-wandha-wuguuguni, niga ambani-narrii yungguyung, warruburru-yung warra-wurru-wurruj, ani-wij-garrarra-gana yadhu, yagi ni-muḏaḏbi.” Dani-yung wu-yamaa anaani-yung ana-angel, nginggu-magaa ngiga.

³⁴Yagu ngigaayung ngi-yambalmayn, ngi-walharaguni yamba, ngi-yamayn “Marri yuga anaani anggiijaminggarrina anggu-waṉbina? Yagu ngaya anaani waari ngandaaynji-yaay warra-waḻya,” ngigaayung ngi-yamayn.

³⁵Wugurraayung ana-angel wu-yamayn nginggu-yamijgayn, “Anaani Maṉngulg Mawurr yamba wugurru anggu-yaarri nugawi-wuy, ana-lhuḏ nigawi-nyinyung na-runggal-yung-jinyung anggu-burraa nugawi-rruj. Aadanula-wala, naadagu na-wirrinyung ani-mayina ani-maṉngulg, marri na-God-jinyung na-niwiyayung niga.

³⁶Baawanggina nagang! Ngarrubagi ngaa-Elizabeth, nugawi-nyinyung niingiilgurmaynjiyn-jinyung, ngarra-ngajiwanggu-nyung, anubani-yung ana-wulhu-wulhurr wugurru wurru-yamaa, ‘Waari ngarrubagi ambangi-waṉagaa warra-wirrig ngiga,’ wurru-yamaa anaani-yung warruburru-yung warra-wurru-wurruj. Yagu ngigaayunggaj bawa aḏaba winyig wangi-waṉagana, anaanila-wala aḏaba marang-aynjaabugij marri jarranggay naagi na-ḻabama.

³⁷Na-God-maynji niga anubani ani-wijangayii, yagu bani-yung nga ani-waṉbina. Waari anaaynbaj ninggu-muḏaḏbijgi niga.” Dani-yung wu-yamaa anaani-yung ana-angel.

³⁸Ngigaayung ngarra-Mary ngi-yamayn, “Yii, yijgubulu, ngaya anaani na-Buunggawa-yinyung, marri nganu-yandhurrbangana-yinyung niga. Nigawi-nyinyung ana-lhaawu, anubani-yung anggu-waṉbina ngayawi-wuy,” ngi-yamayn ngiga. Marri anubani-yung ana-angel wu-yanggi aḏaba ngigawi-wala.

³⁹Anubanila-wala, ngarra-Mary ngi-ḻaḻagiiyn marri aḏaba ngi-yanggi yuuguni ama-ṉuga-wuy, maarra-ḻandhirrngindi-wuy, wubani aanga, wubani a-runggal a-lhal wugurru wu-mayini Judah.

⁴⁰Wubani ngiga ngi-yanggi buguni na-Zechariah-wuy. Ngi-yabiyn. Nga Mary-wala ngiga ngaa-gaḏiyn ngaa-Elizabeth-guy.

⁴¹Ngigaayung ngaa-Elizabeth ngi-wawanggini. Nga warrubawi-yung warra-gujuju wu-wirbirini ana-lhirribala ngigawi-rruj aḏaba. Anubani-yung aḏaba Maṉngulg Mawurr ngarraagi-yung ngiga ngiindharwiiyn, ngaa-Elizabeth.

⁴²Marri ngiiḏangi yanggarrwar-mirri, “Nagang aadanu yamba na-God nagang nini-walgaṉmaa, waari warruburru-yung-jii wugurru warra-maṉaṉung-jii-magaa. Marri naagi-yung niga nu-walgaṉmaa, na-gujuju-nyung anubagu ana-lhirribala ni-burri-yinyung.

⁴³Anaani ngaya mamanunggu-windiyung nganiini ngayawi-wuy, nagang aadanu nuynjanggi anubagala, nimba-wagarangi, nagang yamba aadanu nga-rriibi-yung nagang na-Buunggawa-yinyung marri ngayawi-nyinyung niga.

⁴⁴Marri baawanggina, aadanu aḏaba anubani-yunggaj ngunu-yaynjangani, nigaayung na-gujuju-nyung ni-wirbirini ngayawi-rruj, niga yamba ni-wawanggini, marri ni-waḻaaḻarrangi niga.

⁴⁵Na-Buunggawa niga naniigajij-majgaa, nagang yamba aadanu nu-ngu-jambarrgiiyn nigawi-nyinyung ana-lhaawu, ani-waṉbina-yinyung.” Dani-yung yigaj ngi-yamaa ngarra-Elizabeth ngarraagi-yung.

⁴⁶Ngigaayung ngarra-Mary ngi-yamayn, ngu-yambalmayn, “Ngaya aḏaba nganu-warraarriwana na-Buunggawa, ngaya nga-yamana, ni-runggal niga, ni-Buunggawa.

⁴⁷Marri ngaya anaani nga-ḏinggina aḏaba, niga yamba na-God, niga ngani-wiri-gana-yinyung.

⁴⁸Ngaya anaani nga-burraa nga-wirrig-bindiyung, marri ngaya anaani nganu-yandhurrbangana-yinyung. Yagu God nigaaj-bugij niga ni-wawanggina ngayawi-wuy, marri ngani-man.galagana. Wugurru warruburru warra-wurru-wurruj amburru-lhamarrii-yinyung, marri amburru-yambina-yinyung ngayawi-nyinyung ana-lhaawu, niga na-God, ngaya ngaaniigajij-majgaa, wugurru amburru-yamana yungguyung.

⁴⁹Yagu yamba nigaaj-bugij na-waḏa-waḏaḏ-jung. Marri ni-waṉbina yij-mamaaḻang-galawaj ngayawi-wuy. Ana-muwaj nigawi-nyinyung, wu-maṉngulg.

⁵⁰Ngagurru warra-wurru-wurruj ngaanu-yandhurrbangana-yinyung ngagurru nigawaj-bugij aḏaba, na-God niga ngarrani-man.galagana anaani ngagurru. Marri ngagurri-nyinyung warruburru warra-mijburrayung marri warruburru-yung anaadhaadharri-yinyung wugurraayunggaj.

⁵¹Na-God niga ni-waṉbina yij-mamaaḻang-galawaj, niga yamba ni-waḏa-waḏaḏ. Marri warruburru-yung wugurraayung wuu-lhama-lhamina-yinyung, wugurru yamba wurru-wawanggina anaani wiij-galadi. Yagu na-God niga ambani-man-jarramijgang warruburru-yung, marri ambani-manda-ḻibi-ḻibawana niga waadurru-yung.

⁵²Yagu warruburru-yung wugurraayung waa-runggu-runggal, wurru-waḏa-waḏaḏ-gina-yinyung, warruburru-yung ambani-barawudang wugurru. Yagu warruburru-yung wugurraayung wurru-yaal-murramurra-yinyung, marri wugurru ambani-runggal-wang wugurru.

⁵³Marri warruburru wugurraayung wurru-marryaadii-yinyung, ambaniiyii mamanunggu ana-marrya wugurru. Yagu warruburru-yung wugurraayung warraambaambalal, ambani-lharrgang amburru-mamar wugurru.

⁵⁴Yagu ngagurru anaani warra-wurru-wurruj warra-Israel, nigawi-nyinyung warru-mandag, nguunu-yandhurrbangana-yinyung niga, ngarrani-maṉmani ngagurru. Niga yamba ni-wawanggina-wugij ngagurri-wuy anaani, ngarrani-man.galagana-wugij ngagurru niga.

⁵⁵Anaani wiij-nguynju wugurru, ni-yambini-yinyung anu…bani-yunggaj, warruburru-yung-wuy warra-miyn.ngambara-wuy, marri na-Abraham-guy marri warruburru-yung wuu-lhamarrangi-yinyung. Danu nga ana-lhaawu anaani anggu-burraa anggiij-buguuguni-wugij wugurru.” Dani-yung nga, ngi-yamaa ngarraagi-yung ngarra-Mary.

⁵⁶Anubanila-wala aḏaba, ngarraagi-yung ngarra-Mary ngi-burri ni-wulaynbaj-gala na-ḻabama, anubagu wugurrngi wingiinggarra-ngu-burri ngarraagi-yung ngaa-Elizabeth. Anubanila-wala aḏaba ngiga ngiigiyn ngigawi-wuy aanga-wuy.

⁵⁷Anubanila-wala aḏaba malgadhaadharri, ngarraagi-yung ngaa-Elizabeth ngunu-yabayn ngigawi-nyinyung naagi-yung na-wirrinyung, na-ni-marayung.

⁵⁸Ngigawi-nyinyung warra-mijgalgur-yung marri warruburru wurraanggarra-yagaynjini-yinyung, anaani-yung wurraawanggini ana-lhaawu aḏaba, naagi-yung na-Buunggawa ngu-man.galagaa windiyung ngarraagi-yinyung ngiga. Marri anubanila wugurru wurru-waḻaaḻarrangi windiyung ngigawi-wuy aḏaba.

⁵⁹Manubama-yung mana-miyn.nganga marang-aynjaabugij marri muulawaa wurrugu, warruburru wurru-burri-yinyung wurru-muṉḏugaa, naagi-yung aḏaba wunu-wulmurr-gaa, na-wirrinyung niga. Wurru-yamaa-wugij wugurru wurraandha-wuguuguni. Naagi-yung wunaa-ngaynbandangi niga ambunu-mijguni Zechariah, wurru-yamaa, nguynju yaga na-ninyarra-yung-jii wubani yaga a-muwaj, ambini-miyn-nguynju-magaa wuguṉi.

⁶⁰Yagu ngigaayung ngaa-rriibi-yung ngiga ngi-yamayn, “Yagi yagi aadanu! Naagi ani-mayina John, niga.” Dani-yung ngi-yamayn.

⁶¹Yagu wugurraayung wurru-yamayn, “Anaaji nagang waari amburru-mayini aadani-yung-jii ana-muwaj, nurraalgurmaynjini-yinyung.” Dani-yung wurru-yamayn wugurraayung.

⁶²Marri wunu-yandhawiwandi naagi-yung marang-mirri wurru-yamaa, nigawi-wuy na-ninyarra-yung-guy, “Aniga-yung yuga ana-muwaj ngaanu-mij-giyn naagi?” wurru-yamayn.