Luka 1:24-62

²⁴Kubokapenia Elizabeti aanaba Zakalia ngabapata ndumbo. Nambu ngibikiiya unyumba kwa myei nhwano.

²⁵Ngalenga, “Ngoe Angwana banyangite, bamoite oni jango nnongi ja bandu!”

²⁶Mwei gwa sita gwa ndumbo ja Elizabeti, Nnoongo ngankinga mpakachi Gabulieli kuboka kumbengu ajende kukilambo cha ku Nazaleti okwo Ku Galilaya,

²⁷kwa kamwale jumwe, ojwalagine kutolana na mundu jumwe ojwa kemigwa Yusufu jwa lungolo lwa Daudi. Lina lya kamwale jwenio Maliamu.

²⁸Mpakachi kuboka Kumbengu ngannyendela ngannengela, “Tengela jibe pamwe namwe! Angwana babi pamwe na mwenga na bampi upeele muno!”

²⁹Maliamu pajoa malobe genia ngaechuka muno, kugaacha malobe genia mana gakwe nike?

³⁰Mpakachi kuboka kumbengu ngannengela, “Makajogopaje Maliamu, Nnoongo ampi upeele.

³¹Mampata ndumbo, mampotola mwana munalome na mampa liina lyakwe Yesu.

³²Jwenio maba nkolongwa na akemigwa Mwana jwa Nnoongo ojwabi kunani muno. Angwana ana Nnoongo mabampa kitebu cha Nngwana Daudi aoko mundu,

³³jwenio nga nngwana ju lungolo lwa Yakobo machoba goa pangapela, kingwana chakwe kiba cha machoba goa pangapela!”

³⁴Maliamu ngannengela mpakachi kuboka kumbengu, “Kilebe chenie kiba bole? Nanenga nanabeje na munulome tangu nabelekwa?”

³⁵Mpakachi kuboka kumbengu ngajanga, “Uhuke jwa Nnoongo manhwikilila, na makakala ga Nnoongo maganhwekelela kwa magambu genia Mwana ojwapa kubelekwa akemigwa Nchwapi, akemigwa Mwana jwa Nnoongo.

³⁶Nkombokela nnongo gwinu Elizabeti, aganu kube mbuja, akweti ndumbo gongo mwei gwa sita ojwamanyakine na bandu kube ntonga.

³⁷Kwa magambu libije lyangaotola Nnoongo.”

³⁸Maliamu ngalenga, “Nenga napakachi ba Angwana, ibe anda apannengite.” Na mpakachi kuboka kumbengu nganneka.

³⁹Kuboka pamachoba machoko, Maliamu ngaboka mwanja ngajenda chokwe mpaka kilambo echikibi kuitombi ya Yudea.

⁴⁰Kwenio ngajingi unyumba ja Zakalia ngampata abali Elizabeti.

⁴¹Elizabeti apajoa abali ja Maliamu, kingota cha mulutumbo mwa Elizabeti ngikiina. Elizabeti nganhwikili Uhuke jwa Chwapi,

⁴²ngalongela kwa lilobe likolongwa, “Nkweti kindimba kupeta akikege boa na mwana ojwapakubelekwa akoigwe.

⁴³Kunike kilebe kikolongwa kipitilile kwango, ata amama ba Angwana bango baike kwango nenga?

⁴⁴Apanyoina abali jinu, mwana mulutumbo lwango ngainaina kukuala mojo.

⁴⁵Mbaya mwe manhwamine kutenda kilebe chibalenga Angwana kwinu makilenganila.”

⁴⁶Maliamu ngalenga, “Mwojo gwango gwalumba Angwana,

⁴⁷uhuke gwango ubi nalaa magambu Nnoongo Nkomboi jwango.

⁴⁸Magambu bandekungombokela nammanda gwabe nachoko! Kuboka ngoe bandu boa bangema mbaya,

⁴⁹kwa magambu ilebe ikolongwa eyandendi Nnoongo ojwabi Nkolongwa Angwana bandendi kilebe kikolongwa. Lina lyabe bachwapi,

⁵⁰kutumbu kibelei chimwe mpaka chenge alaya kia jakwe kwa bandu abannyali,

⁵¹batei ilebe ikolongwa kwa maboko gabe gina makakala bapechengine bandu bina uongwajagi muma wacho ga umojo jabe.

⁵²Bauluinge akangwana bina makakala muitebu yabe ngabatondobea bandu bina kunyenyepa.

⁵³Bina njala bapi ilebe ya mbone, bandu bina ela balekangite bajendange maboko jika

⁵⁴Akombakile malagano gakwe agalagana na akinanhota bito, bajangatinge akapakachi bakwe Isilaeli,

⁵⁵andi pabalengela akawabito, Ulaimu ni ibelei yakwe yoa pangapela!”

⁵⁶Maliamu ngatama na Elizabeti kwa myei mitatu kuboka penia ngabuja kachakwe.

⁵⁷Kingobu cha kukikombola kwa Elizabeti ngikiika, ngapotola mwana munalome.

⁵⁸Akandami ajabe na akalongamundu apabajoa kutenda Angwana bammoni kia Elizabeti, ngabaala mwojo pamwe.

⁵⁹Lichoba lya nane apalyaika, ngabajenda kunhina mwana, ngabapalanga kumpe liina lya awamundu, Zakalia.

⁶⁰Nambu amamundu ngabalenga, “Lyeneje nambu akemigwe Yohana.”

⁶¹Bandu ngabannengela Elizabeti, “Abije mundu mulungolo lwakwe juna liina andi lyenele?”

⁶²Kuboka penia bandu ngababeke kiingi awamundu bapala balenge liina lya mwana lebilipala.