Luka 23:29-45

²⁹Mazaḡa aduga boro hidiꞌuma madaḡa ꞌai onaiꞌuma. Eꞌe madaḡano vazevazeꞌa ꞌahige reꞌuma, raenaꞌa, 'Gabani roḡaeḡa zu ene ize ꞌizema mouga roḡaeḡaniꞌe manoḡa tauḡi!'

³⁰Eꞌe madaḡano ze maḡamaḡa komeꞌa boro zinaꞌa, 'Fahanadu emeḡe ḡahifoꞌi!'

³¹Eꞌe ire ḡaboḡa heuḡa, rehano zaꞌa sataurohiꞌohe. ꞌOugine zaꞌe, ire roḡa azaḡa heuḡa, aduga ufeta boro hidiꞌuma.”

³²Ḡonore boro vazeḡa ꞌaheu zuni Iesu teite zemoga radu tutuze onamiro.

³³Ebu zeꞌe haba ꞌahoga niḡa Vadini Isiga feuriro. Eꞌea Iesu ebu ḡonore vazeḡa ꞌaheu satauroziro, vaze ꞌahogaꞌe edaꞌe moneo zu ꞌahogaꞌe kauri moneo.

³⁴Ebu Iesuꞌa satauronoꞌo reiro, raenaꞌa, “Mama, zeḡe haḡai sauꞌa aḡutu modoꞌi, mazaḡa zeꞌe nagini haḡaeꞌetaꞌaꞌe aḡuꞌa.” Zeꞌa iniuꞌe Iesu dabua meꞌuma radu kaḡusi arahoḡa arahiro.

³⁵Vazevazeꞌe edanadu muririnu. U vaze ibitoziniꞌeteꞌe azaḡaꞌe Iesu ḡirihoharo, raenaꞌa, “Ani vaze ꞌahogaꞌahogaꞌe ḡaboziro. Aniꞌe Keriso, Badiꞌaꞌa ohotiroteꞌe vazeḡa reine, aneꞌa bare ḡaboniꞌuma!”

³⁶Uti azaḡaniꞌa zuni arahoharo ebu vaini vuḡa ḡiḡiꞌa gagoharo.

³⁷Ebu ze ninaꞌa, “Ḡaꞌe Iuda azaḡa kini roꞌidene, ḡaeꞌa ḡae bare ḡaboꞌoꞌi!”

³⁸Iesu satauro hitaganoꞌe ꞌahige mirihiro, 'Iuda Azaḡa Kini'.

³⁹Satauro ranaꞌonoꞌo ḡonore boro vazeḡa ꞌahoganiꞌa Iesu roniro, raenaꞌa, “Ḡaꞌe Keriso roꞌidene, ḡaeꞌa ḡae bare ḡaboꞌoꞌi ebu emeḡe zuni ḡabofoꞌi!”

⁴⁰Rehano ḡonore boro vazeḡa ꞌahoganiꞌa ḡonore boro vazeḡa omo ḡoere riḡa hina naenaeninaꞌa, “Ḡa Badiꞌa mene rihoneꞌehehe? Ḡae zuni ane teite idaḡa rudaꞌuma ebu Badiꞌa hidiꞌuma.

⁴¹Emetaneꞌe emeḡe sauꞌa uꞌano rudauꞌohe, rehano vaze ꞌadiꞌe haḡai sauꞌa ꞌahogani mene haḡairo.”

⁴²Ebu aneꞌa Iesu niro, raenaꞌa, “Iesu, ḡaeꞌa ibitohauꞌeteꞌe habaꞌa onaꞌidene eḡe zuni zamaroꞌi!”

⁴³Iesuꞌa naenaeninaꞌa, “Hube hune ḡaꞌohe, izidi ḡaꞌe eḡe teite Badiꞌa habao radiꞌuma.”

⁴⁴Madai kirikiri meirotene, haba niduꞌa uzaboꞌa ꞌuiro onamo ḡorava mone mada uḡidu.

⁴⁵Mada mene hiaro ebu kuru neḡa dabuaḡaniꞌa nemao zigau ꞌaꞌadaro.