Luka 23:29-45

²⁹Ngan awete pang nen, yesoo bong lal dook tiap atu yo be pombe i, in ole masngana mai la be pombe pang yang a igarungang i. Ye kene yo so tani in pombe nga, ngan ole di tooltool tiwete nen, ‘Ang garup yo kapasui touo pitiap nga, inbe ang garup yo taukamim natumim be kapayin di nga, ngan lomim ponana, yesoo Maro iyei urata dook mata pang.’

³⁰Inbe ye kene tani in nga, ngan ole di tooltool tiwete pang di kawal nen, ‘Atoo, kaduku a kamol si poomam!’ Inbe ole tiwete pang di arono yo bussukana nga, ngan nen, ‘Atoo, kamol a si kakaltoo am!’

³¹Ngan au i dawa ben kai yo lalana i, inbe la di tooltool be tiyeie dada dook tiap nen pau nga. E ang ngan dawa ben kai yo bodene i, bong be pang dama ni nga, ngan ole tiyeie soo so pang na?”

³²Ye kene tani yo tikaua Yesu be la tiraumate ye in nga, ngan le tikap di tooltool talnga dikidiki ru yo tiyei dada dook tiap nga, ngan lapau, la du tiraumata di le tipa ye Yesu nga.

³³Ngan tipa a tilo pombe ye ni yo tiwete ene ye Tool Kutono Ruruana i, motong la di tooltool ke patokongo tina nga tipatoto Yesu ilo kai palasingi kaini le ipa ye di tooltool talnga dikidiki ru tina. Le atu ituku ke Yesu madini oonoo, inbe san ke madini ngas.

³⁴Motong la tiyepe, inbe Yesu iyei ne, “Tamak, lom pang di a kugiri noonoo kidi, yesoo bong di nga lodi galanga dook tiap ngan la le tiyei dada nen nga.” Motong la di tooltool ke patokongo tina ngan di tapdi tiparsu ye sousoungu le so ki, le nga tikatte madamada a be tipuske sema tooltool yo be ole tikap so ki tina nga.

³⁵Di tooltool malala mai tina ngan tikododo a matadi kenen ye Yesu, inbe di kuto maimai yo matadi kala di Yuda nga, ngan tiyei sere ye. Tiyei ne, “Kakamata, kanakana ngan ilon di tooltool kapala, e nga yelei be ya taunu iloni tiap nga? Kumata be ya ni Kirisi moolmool yo Maro ipootoo panga ya taunu be si ikap di tooltool ki a ipamulu di in nga, ngan matin nga le ya taunu iloni oo.”

³⁶Ngan di tooltool ke patokongo lapau tikan paseme Yesu a tiyei sere ye, inbe timan man tikap ooroo wain surunu yo malingene ngan panga.

³⁷Inbe tiyei ne, “Kumata le be ong in tool kuto mai kidi Yuda moolmool nga, ngan ong taum kulonong e too.”

³⁸Motong la tiwodo betanga pattu a tirauu lo ye kai palasingi ke Yesu kutono ke ete. Ngan betanga tina ngan tiwodo nen: I TOOL KUTO MAI YO MATAN KALA DI YUDA LE IMOT I.

³⁹Inbe di tooltool talnga dikidiki ru yo tituku di le tipa ye Yesu nga, ngan atu in ikan paseme Yesu, le nga iwete panga nen, “Ai, be kuwete ong in Kirisi nga, ngan ong taum kulonong, inbe kulonam amru lapau!”

⁴⁰Bong ngan tool talnga dikidiki tina san in ipasak pang ene tani a ilele, inbe iwete panga nen, “Ong in lapau kouo masngana gaongo leu ben ya i, e nga yelei, kutattadaia Maro tiap, too?

⁴¹Aru nga moolmool, tiyemenai idi ye urata dook tiap kidi tina yo tayei, ngan kootoonoo. Bong tool i iyei touo dada sa dook tiap, ngan tiap.”

⁴²Motong la tool tani in iwete pang Yesu nen, “Yesu, kene yo be kulo malala kiong lo kuyei kuto mai a matam kala di tooltool kiong ye in nga, ngan kin lom tutau.”

⁴³Ngan Yesu iwete panga nen, “Awete pong moolmool nen, katai nga ole ayong tayepe ye malala ke Maro yo yepongo ki dook mata i.”

⁴⁴Ye kene tani in kemai ye ke matana sangaul be ru, ngan todo iduku tana mai i le imot, a iken nen le du rrai ye so ben ke matana tol.

⁴⁵Le nga ke matan igumugumu, inbe wam matolene yo tituka bareme mai ke sungunu lono i, in imassarak le iyei paru.