Luk 23:29-45

²⁹Du nun du kel kadang na baling man dad to, ‘Fye nawa i dad to là lmen maltien, dunan i dad libun là lmen mngà na tnutù ngà.’

³⁰Na di bang ayé, baling man i dad to di dad malbang bulul, ‘Tankanyu gami.’ Na manla di dad malnak bulul, ‘Lnimunyu gami fye mati gami.’

³¹Du ku gaganla mbek i kayu matà, matnù fa kgaganla mbek i dad kayu ta dafuk.”

³²Na lê nun lwe sasè to, nebela ale ditù du fnatila salngan di kfatila ku Dyisas.

³³Na ta kel ale di bulul dnagit Banwe Klakub Ulu, na fnatakla Dyisas di krus gagin dad lwe sasè to ayé, satu gsen di bibengan na satu gsen di kwananan.

³⁴Na dnasal Dyisas i dad to fmati kenen, manan, “E Mà, fnasinsyam i salàla, du là glabatla i nimòla.” Na sansalel i dad sundalu i klawehan fagu di kasbunut.

³⁵Na nun dee dad to tadag déé du damweng ale, na balù i dad ganlal, nadoyla kenen, manla, “Ta falwàan i dademe dad to. Fye ku lêan falwà i kton ku kenen sa Krayst, i Mgalék Dwata.”

³⁶Na lê fdadong déé i dad sundalu, na nadoyla kenen. Na fsafla kenen binu masam,

³⁷na manla, “Ku ge i Harì dad Dyu, falwàam i ktom.”

³⁸Na nun sulatla gsen tah i ulun, manan, “Ani i Harì i dad Dyu.”

³⁹Na satu di dad sasè to gagin fnatak di krus, nadoyan Dyisas, manan, “Ise ge kè Mgalék Dwata? Falwàam i ktom na lê man gami.”

⁴⁰Na mdà i satu, nngakan, na manan, “Kan? Landè klikòam di Dwata? Tlu ato slame nukum di fati.

⁴¹Na gite i gablà fnati salngad ani du nun salàta. Bay i to ani, landè salàan.”

⁴²Na lê kenen talù di ku Dyisas, manan, “Dyisas, begam agu fandam ku ta kel ge di banwe nagotam.”

⁴³Na tmimel Dyisas, manan, “Tulenta ge i kaglutan. Di mdu ani, ta mnè ge di safédgu di Paraiso, dunan i fan-gu gusalu.”

⁴⁴Na di kaltu i du, tadè kmifuh i klamang banwe kel di tngà masol i du,

⁴⁵du ta là mneng i du. Na i bong kurtina di gutngà i Bong Gumnè Gal Gumangamfù di Dwata, tadè kasê di gutngàan.