LUKU 23:29-45

²⁹Zaakɛ à gurↄↄ e mↄↄ kɛ̀ weé be: Aubarikadeenↄn pãaa kɛ̀ aↄ̃ↄe nɛ́ iro, nɛ́ e yↄ̃ miḿmaroonↄ ũ.

³⁰Gurↄ beeea weé be kpiiinↄ lɛ́ɛ à siḿma, sĩ̀sĩnↄ lɛ́ɛ à dańla.

³¹Kɛ̀ wèe yã kɛ̀ taka kɛɛ kↄ̃n lí búsuo, lí kori pↄ́ égↄ̃ dɛ diamɛ?

³²Wèe gaa kↄ̃n dàpãsĩkɛri gↄ̃ↄn plaa kenↄ dↄ, lɛ wà ń dɛdɛ kↄ̃n Yesuo lɛdo.

³³Kɛ̀ aↄ̃ kà guu kɛ̀ wè be Mìwatorokiia, ben aↄ̃ à pà lía gwe kↄ̃n dàpãsĩkɛri pìnↄ, gbɛ̃ doo à ↄplaazi, gbɛ̃ doo à ↄzɛɛzi.

³⁴Ben Yesu bè: Baa, ǹ ń kɛ̃, zaakɛ aↄ̃ↄ dↄ̃ pↄ́ kɛ̀ wèe kɛɛro. Ben aↄ̃ kàbankpɛ kɛ̀ wà à pↄ́kãsãanↄ kpàatɛtɛkↄ̃nɛ.

³⁵Gbɛ̃nↄↄ zɛna gwe wà wɛ́ɛ kà wèe à gwaa, ben Yuda gbãadeenↄↄ e lɛ́zukii kɛɛa wà bè: A gbɛ̃ pãndenↄ mì sì. Tó Mɛsaya kɛ̀ Ludaa dìɛn à ũ, à a zĩnda mì símɛɛ!

³⁶Sozanↄↄ e à faboo dↄ. Ben aↄ̃ sↄ̃̀zi aↄ̃ geepiwɛ̃ kpã̀kpã dↄ̀nɛ

³⁷aↄ̃ bè: Tó Yudanↄ kínan n ũ, ǹ n zĩnda mì sí.

³⁸Sèeda kee na à mìla wà kɛ̃̀a:

³⁹Dàkɛri kɛ̀ aↄ̃ↄ logona lía pìnↄ doke dↄkɛna yã ònɛ à bè: Mɛsayan n ũroo? Ǹ n zĩnda mì sí kↄ̃n wapinↄo lɛdo.

⁴⁰Ben à gbɛ̃ndoo kpã̀kɛ̃zi à bè: Nɛ́ɛ vĩa kɛɛ Ludanɛroo? Yã dↄ̃nkↄ̃ bé à vɛ̃̀ɛwa.

⁴¹Wapinↄ, wa pↄ́ kú a zɛ́amɛ. Pↄ́ kɛ̀ wá tↄ̃̀ bé à bↄ̀ɛwe, mↄde gↄ̃gbɛ̃ kɛ̀ daa e yã zaa ke kɛro.

⁴²Ben à bè: Yesu, tó n mↄ kpata ble, ǹ dↄ ma yãn.

⁴³Ben à wèàla à bè: Yãpuraan mɛ́ɛ oonnɛ, gbã̀a nɛ́gↄ̃ kúmao auzɛnna.

⁴⁴Kɛ̀ ↄfãntɛ̃ kà mìdangura, ben gusiaa dà bùsu pìla píngi ai fãantɛ̃ mↄ̀ aagↄ̃.

⁴⁵Luda kpɛ́ lábure kɛ̃̀kↄ̃rɛ plaa.