Luka 22:47-69

⁴⁷Iŋuc muhuc domahame mi râsi guru ututuŋ fisinʒepieŋ i! Eme motec jaŋere âgo moc ʒâŋene Juda, eki micne bajarehuc Jesurao rarâ muduckewec.

⁴⁸Muduckeme Jesuzi ʒiŋuc âzâcnewec: “Juda, go wemocte Ŋic Fâri Wâtuŋne e muduckehuc doc bakomec?”

⁴⁹Eme Jesure kikefuŋfâc jaŋe wiac fuazo eme honerâ mumbiŋ, “Wofuŋ, ʒikazi jopanaŋ me?”

⁵⁰Iŋuc murâ jaŋeraonec moczi taha bapa sâkore kiŋaŋ motec ʒikazi qaocte hazecne fâreopec i qatarawec.

⁵¹Eme Jesuzi i honerâ muwec: “Ŋoŋe beheniŋ.” Iŋuc muhuc ŋic hazec‐ticne bâuahuc bâsomiewec.

⁵²Erâ taha bapa micne â ufuŋte polisman micne â soŋaŋ e roniŋte fisimbiŋ jaŋe ʒiŋuc jazawec: “Ŋoŋe nore manapie ʒika qaqa eme ʒika qaruc‐ŋeŋichec fisirâ rocnuŋgopieŋ me?

⁵³No ʒoaŋne ʒoaŋne taha ufuŋko ŋoŋehec juekopac, ehame ŋoŋe ira mi rocnumbieŋ. Ʒi ine ŋoŋere dameŋ maickekac â dapâcte tâpiri fua tâcnekac.”

⁵⁴Eme jaŋe Jesu rorâ bararâ taha bapa sâkore ficko bafembiŋ. Ehame Petoro e fisi fâresuc ehuc ʒâhec rawec.

⁵⁵Eme momori jaŋe sacmaŋko raʒirâ ʒoc ruqerâ ruahuc ŋehapie Petoro e iŋuc jaha raʒirâ ŋondeŋ‐jeŋicko ŋewec.

⁵⁶Ŋehame kiŋaŋ naru moczi fisirâ hone dedeŋnehuc muwec, “Ŋic keci ehec juekac wâc.”

⁵⁷Eme Petorozi mic bahuc muwec, “Ŋokac, no e mi honeekopac.”

⁵⁸Iŋuc murâ ŋeme mi ʒorahame ŋic moczi honerâ muwec, “Go hâcne jaŋere guruonec.” Eme Petorozi muwec, “Ŋic go, no aricne.”

⁵⁹Eme ʒâhec ŋic moczi fisirâ musanaŋkehuc muwec: “Â ŋic kecʒi jâmbomac ehec juekac, e Galilaia ŋic jaha.”

⁶⁰Mume Petorozi muwec, “Ŋic go dâŋ mutec kâuc bakopac.” Muhame izia qâqâczi dâŋewec.

⁶¹Eme Wofuŋzi forisierâ Petororao ʒâŋe fime Petoro e Wofuŋzi dâŋ ʒiŋuc âzâcnewec i manasuwec: “Qâqâczi mi dâŋehame go jahec â moc mic bacnucmu.”

⁶²Dâŋ i manasurâ bune herickeme ra kio sâqorewec.

⁶³Jesu soŋaŋkehuc domambiŋ ŋic i jaŋe mu ʒerec ecnehuc

⁶⁴ʒâŋe maine bâsoŋkerâ qahuc mumbiŋ, “Go porofete jukomeczi ŋic gukac ere ʒâŋe muc.”

⁶⁵Erâ âke sisic wiac gâcne mâmâc ecnembiŋ.

⁶⁶Ehapie hae fureme micne guru, taha bapa micne â miti qaqazu hâcne, jaŋe sasawa tumaŋne‐fârerâ mupie Jesu guru‐jeŋicko bafepie dâŋ ʒiŋuc âzâcnembiŋ:

⁶⁷“Go Kristo jukomecko mufua‐nârec.” Mupie ʒiŋuc jazawec: “No ŋazape mi mananiŋmu,

⁶⁸me indiŋ‐ŋopape ŋifecne sâcne wâc mi nazaniŋmu.

⁶⁹Ʒi ine Ŋic Fâri Wâtuŋne e Anutu tâpiri rune fârenao ŋeocmurâ dameŋne maickekac.”