Rookashi 22:47-69

⁴⁷Eenirowa ikenkithatakagaeyawitarini Jesoshi riyotaanewo, areeteeyapaakani osheki atziri, reewateeyapaakirini Joorashi. Rirowitaka riyotaanewo Jesoshi, omaanta iroñaaka ikowaki raakaanteeri. Ipokashitapaakiri rirori, ithowootapaakiri.

⁴⁸Ikantawakiri: —Ro pithowootantanari, paakaananteenari. Tema piyotaki naaka riraga atziriperotapaentsiri riraga poñeenchari jenokinta.

⁴⁹Ikanta iñaakowentawakirira okaatzi awijimotakiriri Jesoshi. Rojampiteeyirini: —Nowinkatharite, ¿pikowakima nochekiri?

⁵⁰Rootaki ichekaetakiri ikempitapero apaani ronampiri riraga iwinkatharite ñaanakowenantatsiri, thatzik.

⁵¹Ikantakiri Jesoshi: —Ari okantakaata, eero pikoshekari. Roojatzi roepiyeeniri ikempita, rowithagaeniri.

⁵²Irira itsipateeyapaakarini Joorashi riraga jewatayiririni ñaanakowenantatsiripaeni, eejatzi riraga jewatakaantatsiri janta ipankokinta Tajorentsi, eejatzi aataperoteenchari. Ikantawakiri Jesoshi: —¿Iitaka pamashitantanari pichekamentopaeni eejatzi pompojamentopaeni? ¿Naakama koshintzi?

⁵³Tema notsipatapiinteeyawitzimini janta Tajorentsipankoki, omaanta tee pikoshekaeyanani. Omaantakya iroñaaka monkaataka paantakinarika: rooma ipinkathariwenteeyakimini iwinkatharite kamaari.

⁵⁴Roojatzi roteyanteetakari Jesoshi, shepik. Ragaeyanakirini janta ipankoki iwinkatharite ñaanakowenantatsiri. Ikantaka rimpaetanaki Peetero itapiiki Jesoshi.

⁵⁵Janta pankotsiki, okaankiityeera, ari roeshita paamari. Ijeekaeyapaakini, rakitsiteeyapaakani riraga agaeyakiririni Jesoshi. Ari itsipateeyapaakarini Peetero.

⁵⁶Roojatzi opokapaaki ronampiri ñaanakowenantatsiri. Okatziyapaaka, aminapaakiri Peetero, joreririri. Roojatzi okantanaki: —Eejatzi irika rirotaki oyaatziriri Jesoshi.

⁵⁷Ikantawakiro: —Tee niyotziri rirori.

⁵⁸Roojatzi paashini aminakiriri, ikantakiri: —Tema eeroka oyaatziriri Jesoshi. Ikantakiri: —Teewee. Tee noyaatziri.

⁵⁹Ari ojamanitapaentzi, roojatzi ikantaki paashini: —Kyaaryo, rirotaki oyaatakiriri irika shirampari, tema eejatzi ipoñaaka Karireeyaki.

⁶⁰Ikantanakiri riraga Peetero: —Tee niyotzi oetarika pikantakinari. Roojatzi iñaantanaka tyaapa, anterekooo.

⁶¹Riraga Jesoshi ipithokashitanakari Peetero, raminanakiri. Roojatzi ikenkithashiryaantanakawo ikantzitakariri inkaaganki: “Tekiraatarika iñee tyaapa, okaate 3 pikante: ‘Tee niyotziri Jesoshi’ ”.

⁶²Ari ishitowanaki Peetero, riraaperotanaka, jmmm, jmmm. Osheki retakoperotanaka.

⁶³Riraga shenteeyakiririni Jesoshi ishirontawenteeyakarini, eejatzi ipajapajaatakiri, tak, tak.

⁶⁴Roojatzi ipashikapootantakari eejatzi ipajapootakiri, ikantakiri: —Pikamantenaata ninka pajapootakimiri. Injii, injii.

⁶⁵Osheki rowashironkaeyakirini, tema itheenkakiri, ishirontawenteeyakarini.

⁶⁶Okantaka okitejitanaki ipiyoteeyani riraga aataperoteenchari, riraga jewatayitziririni ñaanakowenantatsiripaeni, riraga iyotaantzirori Iwaperite Tajorentsi, maawaeni. Ragaeyanakirini Jesoshi janta ikantakowentapiinteeyirininta atziri.

⁶⁷Rojampiteeyakirini: —Pikamantenaata: ¿eerokama Rotyaantanewo Tajorentsi naamagaeyakarini? Rakanakiri: —Nokantemirikami: “Jee, naaka Jesokirishito”, eero paapatziyawo nokantemiri.

⁶⁸Eejatzi, nojampitemirikami oetarikapaeni, eero pakana.

⁶⁹Omaanta nokantemi iroñaaka riraga atziriperotapaentsiri ijeekimotapaeriita Pawa rakoperoki, notsipatapaeyaariita notajorentsitaperotapae.