Luku 22:47-69

⁴⁷Jisasi'a anage huno nezmasamigeno, hakare vahe'mo'za eri hantage'za neazageno, ananpina 12fu'a amagema nentaza disaipol nagapintira magozamimo, Judasi'ema nehaza ne'mo zmavreno ne-eno, eama huno Jisasina agi'antako hu'naku e'ne.

⁴⁸Hianagi Jisasi'a amanage huno Judasina asami'ne, Judasiga nagi antako nehunka, komoru hunka ha' vahe zmazampi, Vahe'mofo Mofavre avrente'za nehampi?

⁴⁹Anama hige'za, Jisasi'enema mani'namo'za fore'ma hunaku'ma hiazana nege'za, Ramoka, bainati kazinkanonu zamantagi sanune? nehzageno,

⁵⁰magozmimo kazinkno erino ugagota prisi nemofo kazokzo eri'za nera tmaga kaziga agesa antagi akre'ne.

⁵¹Hianagi Jisasi'a anage hu'ne, atro, amanahuzana mago'ane osuo nehuno, agesare avako higeno so'e hu'ne.

⁵²Anante Jisasi'a ugota prisi vaheku'ene, mono nompi kegva nehaza vaheku'ene, mono kva vahe'mo'za azerinakuma aza vahekura anage huno zmasami'ne, Tamagra bainati kazinknonu'ene kumpa kanonu kumzafa vahema azerinakuma hiaza hutma hara renantenaku neazo?

⁵³Hakare zupa kna'ane kna'ane ra mono nompi tamagrane magopi mani'noana nazeori'naze. Hanki ama kna tamagrizane. Hanizamofo hanavemo'a agatere.

⁵⁴Jisasina azerite'za avre'za ugota prisi ne'mofo nonte nevazageno, Pita'a zmavaririno ogamu'a e'ne.

⁵⁵Ugota prisi nemofo kuma amunompi teve hugrete'za, mni'nageno, anampi Pita'a zamagrane umani'ne.

⁵⁶Mago eri'za mofamo'a Pita'a teve anefate mni'negeno ke'nene huno negeno, ama nera Jisasi'ene nemnia nere.

⁵⁷Hianagi Pita'a anage hu'ne, ama a'moka nagra antahina kena osunoa neku nehane huno vahane hu'ne.

⁵⁸Anante osi'agna evigeno, mago nemo negeno Pitanku huno, kagranena mago zmimoke! Hianagi Pita'a huno, ama ne'moka nagra ana nera omani'noe! Hu'ne.

⁵⁹Mago'a osi'a knama evigeno, mago ne'mo eno mago'ane hankavetino, ama nera agrane vano nehigena kenoa nere. Na'ankure agranena Galili ne' mani'ne.

⁶⁰Hianagi Pita'a anage hu'ne, ama nemoka, nagra kena antahina osu'noa neku nehane nehigeno, kokorege hu'ne.

⁶¹Ramo'a rukrahe huno Pita negegeno, kokoremo ageru orunenigenka, 3'a zupa vahane hugahane huno, Ramoma asami'nea kegu Pita'a agesa antahine.

⁶²Pita'a megi'a vuno tusiza huno zavi ome ate'ne.

⁶³Hagi Jisasima azeri'namo'za azanava ke hunenteza kano nemiza,

⁶⁴avua kisu hunente'za, iza negehefi kasnampa ke hunka huama huo hu'za antahige'naze.

⁶⁵Mago'ane hakare azanava ke hunente'za, huhaviza hunte'naze.

⁶⁶Nanterama segeno'a, kva vahezgane, ugota prisi vahe'ene, kasegere ugota hu'naza vahe'mo'za, Jisasina avare'za mono kanisol vahete vu'za anage hu'naze,

⁶⁷Kagra Kraisiga maninenunka, tasamio hazanagi, Jisasi'a anage huno zmasami'ne, Nagrama tmasamisugetma, tamentintia osugahaze.

⁶⁸Hanki Nagrama tmantahiganena, tamagra kenonani'a osugahaze. hu'ne.

⁶⁹Hianagi amaretima vniana, Vahe'mofo Mofavremo'a, Anumzamofo hanavefi azantmaga'a kaziga manigahie. (Sam-Zga 110:1)