Lucas 22:47-69

⁴⁷Telobo pa minikagi si Jesus, dimateng se medita otaw kidoen. Inibing dan i Judas, sìyan tinoledaan i Jesus. Migpedapag sikandin diyà ki Jesus amon mengadek kandin.

⁴⁸Meneng minikagi si Jesus diyà kandin, “Tay law, elew. Mengadek ka kedì kanak amon itolok a no Timanem Migpekeotaw.”

⁴⁹Pegketaga-taga te menge tinoledaan i Jesus te dekepen sikandin, minikagi dan, “Pengolo, tigbasen day sikandan aw isogò kay nikaw.”

⁵⁰Pegketà nenigbas se sebad tinoledaan diyà te sineligan te ontò pengolo te simbahan, aw nepalot se telinga din lenged te kowanan.

⁵¹Meneng minikagi si Jesus, “Ikà niyo.” Penga niyan, nemaed sikandin te telinga te sineligan, aw negolì iyan.

⁵²Se menge otaw dimoton amon megdakep dan ki Jesus, yan se menge pengolo te simbahan, aw menge kapitan te otaw egtonggò te dakel simbahan, aw menge obanen te Judiyo. Minikagi si Jesus diyà kandan, “Kolang se pegkekamang niyo te podok aw batota amon megdakep kaw kanak, so eden niyo aw megdedempasay a.

⁵³Gayed a migtoladà kidoen te dakel simbahan, meneng wedà a niyo dekepi doton. Meneng mekedakep kaw den kanak, so seini se aldaw pinemallì te Timanem aw meg-inang si Satanas te medaet.”

⁵⁴Penga niyan, dinakep dan si Jesus aw inibing dan sikandin doton te balay te ontò pengolo te simbahan. Timelokon heman si Pedro meneng migpekediyò.

⁵⁵Doen apoy kidoen te dowangen inantay te menge otaw migtonggò, aw migdoma heman si Pedro te menge otaw mig-ingadang kidoen.

⁵⁶Peg-anyag te apoy diyà te bawa din, doen bayi kimità kandin aw minikagi, “Egdoma se otaw seini te otaw sida dinakep.”

⁵⁷Meneng migbolon si Pedro, aw minikagi sikandin, “Tay law, atà. Wedà ko sikandin kilelai.”

⁵⁸Penga niyan te wedà kenamay, doen heman doma otaw kimità kandin, aw minikagi, “Sikona heman se tinoledaan din.” Meneng minikagi si Pedro, “Kenà ko, elew.”

⁵⁹Penga te sebad oras minokit, doen heman doma otaw migtedò kandin, aw minikagi, “Benal sikandin se egdoma te otaw sida, so sikandin heman se tege probinsya te Galiliya.”

⁶⁰Meneng minikagi si Pedro, “Tay law, elew. Wedà ko ketegahi se inikagi nikaw.” Nayan, dalem pa te peg-ikagi i Pedro, migkolaak se manok.

⁶¹Miniling si Jesus aw timengteng diyà ki Pedro. Yan neeneng-enengan din se tapay inikagi te Pengolo te ibolon din sikandin te meketelo te eked pa pegkolaak se manok te iselem.

⁶²Penga niyan, nesayo si Pedro aw ontò migkelag.

⁶³Nayan, se otaw migtonggò ki Jesus, gayed dan nebebayat kandin aw nemadas dan kandin.

⁶⁴Sinempengan dan heman se mata din, aw minikagi dan, “Etoki aw sinu se nenombag kamno.”

⁶⁵Gayed dan migtompuyus kandin aw minikagi dan te medaet.

⁶⁶Nayan, peglibtak te aldaw sìyan, netipon se kedita te obanen te Judiyo, aw menge pengolo te simbahan, aw menenoladà te punù ingkeliwat i Moises. Impeangay dan si Jesus, aw minikagi dan,

⁶⁷“Sikona ekon se Misiyas egpelimanan day. Indani kay den aw benal iyan.” Meneng minikagi si Jesus, “Pengkey indanan ko sikiyo te kebenalan, meneng eked kaw pemenal kanak.

⁶⁸Pengkey doen peden insà ko kenyo, meneng eked kaw heman taba kenyan.

⁶⁹Meneng te eked kenamay, menenoo a Timanem Migpekeotaw kidoen te tangkil te Timanem metolos amon lomowan a doma din.”