ሉቃሴ 22:47-69

⁴⁷ዬሱሴ ዬያ ኬኤዛ ጎይሣ ዓኣንቴ ዒማ''ና ሚርጌ ዓሲ ሙኬኔ፤ ዬያ ዓሶ ዔኪ ሙኬሢ ታጶ ላምዖንሢዳፓ ፔቴ''ሢ ማዔ፥ ዪሁዳኬ፤ ዒዚያ ዬሱሴ ሄርቃኒ ዬሱሴ ባንሢ ዶጬኔ።

⁴⁸ዬሱሴ ጋዓንቴ፦ «ዔዞ፥ ዪሁዳ! ዓሲኮ ናዓሢ ሄርቂሢና ዓኣሢ ኔ ዒንጋ?» ጌዔኔ።

⁴⁹ዬሱሴና ዎላ'' ዓኣ ጊንፆ ሃንታዞንሢ ዬያ ዛጋዖ፦ «ጎዳ! ዓፓሮና ኑ ዔያቶ ቆፆ''ንዶ?» ጌዔኔ።

⁵⁰ዔያቶይዳፓ ፔቴ''ስኬይ ቄኤሶ ቢያኮ ሱኡጋሢም ዓይሢንቲ ማዻሢኮ ሚዛቆ ዋዮ ዓፓሮና ቆፂ'' ቲቄኔ።

⁵¹ዬሱሴ ጋዓንቴ፦ «ማይ ጊዴኔ! ሃሼ''!» ጋዓዖ፥ ዓሢኮ ዋዮ ኩቻ ዓርቂ ካንሢ ፓሤኔ።

⁵²ዬካፓ ዬሱሴ ዒዛ ዓርቃኒ ሙኬዞንሢና ቄኤሶኮ ሱኡጎና ሓሣ ጌኤዦ ማኣሮኮ ዓይሣዞንሢና ዴሮ''ኮ ጪሞና ኮራ፦ «ታና ዒንሢ ሱላጉዲ ዓርቃኒ ጬንቻ ዓፓሮና ኮኦሎ''ና ዔኪ ሙኪያ?

⁵³ቢያ ኬሊ'' ጌኤዦ ማኣሮይዳ ዒንሢና ዎላ'' ታ ዓኣንቴ ዒንሢ ታና ዓርቂባኣሴ፤ ሃሢ ጋዓንቴ ዒንሢና ዹማሢናኮ ቢታንቶ ዎዶ''ኬ» ጌዔኔ።

⁵⁴ዬካፓ ዓሳ ዬሱሴ ዔኪ ቄኤሶ ቢያኮ ሱኡጋሢ ማኣሪ ዴንዴኔ፤ ዒማ''ና ጴፂሮሴ ዻካ'' ዒዛይዳፓ ሃኬ ሃኬ ጊንፆ ዓኣዻኔ።

⁵⁵ዓሳ ዬያ ዓሢኮ ዲሮ ጋራ ታሚ ዔኤሢ ፔቴ''ይዳ ዴዒ ካሽታንቴ ጴፂሮሴ ሙኪ ዔያቶና ዎላ'' ዴዔኔ።

⁵⁶ጴፂሮሴ ታሞ ዓጫ ዴዒ ዓኣንቴ ፔቴ'' ዉዱሮ ናይስኬና ዒዛ ዴንቂ ኮሺ'' ዒዛ ዛጋዖ፦ «ሃይያ ዬሱሴና ዎላ'' ዓኣያኬ!» ጌዔኔ።

⁵⁷ጴፂሮሴ ጋዓንቴ፦ «ሃና ዓሴላ! ታኣኒ ዒዛ ዔሩዋሴ» ጌዔኔ።

⁵⁸ዻካ'' ናጌስካፓ ፔቴ'' ዓሲ ሃሣ ጴፂሮሴ ዛጋዖ፦ «ኔኤኒያ ዔያቶይዳፓ ፔቴ''ሢኬ!» ጋዓዛ፥ ጴፂሮሴ ጋዓንቴ፦ «ሃይ ዓሢ ኔ! ታ ዔያቶና ዎላ'' ዓኣያቱዋሴ!» ጌዔኔ።

⁵⁹ፔቴ ሳኣቴጉዴያ ሃሣ ኔጋዖ ፔቴ'' ሜሌ'' ዓሲ፦ «ሃይ ዓሢ ጌሊላ ዓሲኬ፤ ጎኔ ዒዛና ዎላ'' ዓኣያኬ» ጌዒ ኮሺ'' ዶዲሺ ኬኤዜኔ።

⁶⁰ጴፂሮሴ ጋዓንቴ፦ «ሃይ ዓሢ ኔ! ኔ ጋዓ ዓሢ ታ ዔሩዋሴ!» ጌዔኔ። ዬኖ ዒ ጋዓ ጎይሣ ዓኣንቴ ኮይዳ ቂኢቄኔ።

⁶¹ዬማና ጎዳ ዬሱሴ ሺሪ ጴፂሮሴ ዛጋዛ፥ ጴፂሮሴም፦ «ሃኖ'' ኮይዳ ቂኢቁዋንቴ ሃይሢ ማይንቲ ‹ታ ዒዛ ዔሩዋሴ› ኔ ታና ጋዓንዳኔ» ጌይ ጎዳ ዬሱሴ ቤርታ ዒዛም ኬኤዜሢ ጶቃዛ፥

⁶²ካሮ'' ኬስካዖ ኮሺ'' ዒናፓ ዖዪ ዒዚ ዬኤኬኔ።

⁶³ዒማ''ና ዬሱሴ ዓርቄ ዓሳ ዒዛ ቦሂ ቦሂ ጳርቂያ ጳርቃኔ።

⁶⁴ዓኣፖ ካሮ''ዋ ዒዛኮ ካንቂ ካንቂ፦ «ዖናዳይ ኔና ባዔሢ? ሂንዳ ኔ ፆኦሲ ማሊሢ ኬኤዛያታቴ ዔሬ» ጋዓኔ።

⁶⁵ዬያጉዲ ሃሣ ሚርጌ ባኣዚ'' ጌዒ ጌዒ ዒዛ ጫሽካኔ።

⁶⁶ሳዓ ካራዛ ዴሮ''ኮ ጪሞና ቄኤሶኮ ሱኡጎና ሙሴ ዔርዜ ዎጎ ዔርዛ ዓሶና ፔቴ''ይዳ ቡኪንቴኔ፤ ዬሱሴያ ዔያታ ቡኪንቶ ቤዞ ዔኪ ሙካዖ፥

⁶⁷ዒዛ ኮራ፦ «ሂንዳ ኑም ኬኤዜ! ኔኤኒ ሜሲሔዳ?» ጋዓዛ፥ ዒዚ ጋዓንቴ ዔያቶም፦ «ታ ዒንሢም ኬኤዛዛ ዒንሢ ጎኔኬ ጎውዋሴ፤

⁶⁸ሃሣ ታ ዒንሢ ዖኦጫዛኣ ታኣም ዒንሢ ማሂ ኬኤዙዋሴ፤

⁶⁹ጋዓንቴ ሃይማፓ ዓርቃዖ ዓሲኮ ናዓሢ ዼኤፖ ፆኦዛሢኮ ሚዛቆ ዛላ'' ቦንቺንቲ ዴዓንዳኔ» ጌዔኔ።