Luukaṉu 22:47-69

⁴⁷Yiitjunya panyapa tjanala wangkanytjala, Tjuutatjanya, palumpa kutunguḻu ngalyanangi. Tjuutatjalu tjananya tjikipaka tjuṯa ngalya katingi. Paluru yankula Yiitjunya ngulytju nguwanpa nyunytjuṉu.

⁴⁸Palulanguru Yiitjulu palunya tjapiṉu, “Nyaakitja nyuntu ngayunya nyunytjuṉu?, tjinguru tjikipaka tjuṯa nintilkitjangku, tjana ngayunya ngalyankula witintjaku, yilta?”

⁴⁹Tjikipaka tjuṯangkuya Yiitjunya witilkitjangka, tjana palumpa kutunguḻu tjuṯangku nyakula Yiitjunya tjapiṉu, “Mayutju. Wakalkulatju tjananya, tjuuḻa waṯawaratjarrangku?”

⁵⁰Palulanguru palumpa kutunguḻu kutjungku tjuuḻa waṯawaratjarrangku yurrkura pina wakutjayiṯi kuntara waṉingu, tuḻkuku mayutju tiṉaku waarrkana.

⁵¹Yiitjulu palumpa kutunguḻu tjuṯa tjananya watjaṉu, “Wiya, wakalwiyangkuya wanti!” Paluru pina mantjira tjunkula palunya palyaṉu.

⁵²Paluru tjana tjikipaka tjuṯa ngarala waṉingi, tuḻkuku mayutju tiṉa tjuṯa, pulitjimana tjuṯaṯarra tjiḻpi tjuṯaṯarraya. Pulitjimana paluru tjana Tjuwuku tjaatjingka waarrkarripayi. Tjikipaka palunya tjananya Yiitjulu watjaṉu, “Ngayulu mulyaṯangku mantjilpayi nguwanpa, witilkitjanyurra ngalyanu, tjuuḻa waṯawaratjarra, kuṯurutjarraṯarra.

⁵³Tjiṉṯu kutjupangka tjiṉṯungkaṉa nyurrangarrinya kutu nintiṉingi tjaatji tiṉangka. Nyurrangarri ngurra palula ngayunya witinmara. Ngurra palula wiyaṉinyurra witiṉu, ngayulu wiya kuya palyalpayi nyinanyi, wiya. Palunyatjanu nyurrangarri ngayunya wantimara witilwiyangku. Kala, kuwarriṉinyurra witilku. Mamuku mayutjungku nyurrangarrinya tjingapungu ngayunya witintjaku. Katutjalu yirriṯi watjaṉu, nyurrangarri ngayunya witintjaku.”

⁵⁴Palulanguruya Yiitjunya witira katingu tuḻkuku mayutju tiṉaku waaḻakutu. Yiitjunya tjana katirra waaḻangka tjarrpatjunu. Piitalu Yiitjunya ngaṉṯiwanangku wanarinangi, mayutju tiṉaku waaḻakutu.

⁵⁵Yaṉangu tjuṯangku waaḻa palulaya yaatjayiṯi waru kutjaṉu. Yaṉangu tjuṯaya Piitanyaṯarra tjunguya nyinarra warungka wuumpirringangi.

⁵⁶Ngurra palula kungka waarrkanangku Piitanya nyakula nuuwimilara watjaṉu, “Wati palatjaṯarra, Yiitjulawana tjungu yankupayi.”

⁵⁷Piitalu ngunytjilyinu yalatji, “Kungka, nyuntu wiyawana wangkanyi. Wati palumpaṉara ngurrpa.”

⁵⁸Palunyatjanu wati kutjupangku Piitanya nyakula watjaṉu, “Nyuntuṯarra yilta palumpa walytja nyinanyi.” Piitalu ngunytjilyinu, “Wiya, ngayulu wiya palumpa walytja.”

⁵⁹Palunyatjanu piyuku wati kutjupangku Piitanya nyakula watjaṉu, “Wati ngaatjanya yilta palumpa walytja nyinanyi, Kaliliyinya ngurrara, wangka kutjupa wangkapayi. Yiitjunyaṯarra Kaliliyinya ngurrara.”

⁶⁰Piitalu wati palunya ngunytjinytjunu, “Nyuntupa wangkakuṉa ngurrpa.” Piitanya panyapa wangkanytjala tjuḻpu lukuluku mirrangu.

⁶¹Yiitjulu nguṉṯilangarala Piitanya nyangu. Piitalulpi kuliṉu Yiitjulu yurrunpa watjaṉutja yalatji, “Kuwarri tilayiti tjuḻpu mirranytjala yurrunpa nyuntu tjirripalangara ngurrpa wangkaku, ‘Ngayulu Yiitjuku ngurrpa.’”

⁶²Yankula wantirra Piitanya aatjayiṯi puntura yulangu, Yiitjuku ngurrpa wangkarra.

⁶³Yiitjunya kanyilpayi tjuṯangkuya, yinkarra yalatji ngunytji watjaṉingi, “Nyuntu Tjuwu tjuṯaku mayutju tiṉa. Kana kutu nyinama!, mayutju tiṉa.” Yalatji wangkarraya Yiitjunya pungangi.

⁶⁴Yiitjunyaya kuru tjutuṉu mantarratjarrangku. Wati kutjungku marangku pungkula yinkarra tjapiṉu, “Tjukarurrulanyatju watjala! Nganalunta pungu?”

⁶⁵Wangka kutjupa kutjupaya wangkarra Yiitjunya panypurangkula pungangi.

⁶⁶Tjiṉṯurringkulaya tuḻkuku mayutju tiṉa tjuṯa, Muutjaku wangka nintilpayi tjuṯaṯarra, tjiḻpi tjuṯaṯarraya tjungurringu. Yalatjiya Tjuwu tjuṯaku mayutju tjuṯa tjungurringu. Kutjupa tjuṯangkuya Yiitjunya katirra ngaratjunu, mayutju palunya tjuṯangka.

⁶⁷Yiitjunyaya watjaṉu, “Nganaṉanyatju watjala! Tjinguru nyuntu Kurayitjanya nyinanyi, Katutjalu yirriṯi watjara iyaṉutja.” Yiitjulu tjananya watjaṉu, “Tjinguru ngayulu nyurrangarrinya yuwa watjantjala, ngayuku wangkaṉinyurra kulira wantiku.

⁶⁸Tjinguru ngayulu nyurrangarrinya nintilku Katutjaku wangka watjalpayingku watjaṉutja, Kurayitjanya yalatji nguwanpa nyinaku. Wangka palunyanyurra kulira wantiku.

⁶⁹Ngula, ngayulu yaṉanguku katjaṉa yankula tjungulitju nyinamalpa, Katutjanya, ngayuluṯarra. Ngangkari kutjutjarralitju nyinamalpa.”