1Goreŋ sowa juhuc aakic hombaŋ ŋeŋe irec dameŋ bembeŋkewec.
2Ehame taha bapa micne â miti qaqazu jaŋe ŋic araŋ bajarembiŋte Jesu weniŋuc ecnepene arictac ezejec muhuc hata basahuc jumbiŋ.
3Iŋuc ehuc juhapie Sataŋzi Jesure motec moc ʒâŋene Juda Karioto haeonec ere maŋko hume
4taha bapa micne â ufuŋte polismaŋ micne jaŋerao rarâ Jesu doc bame roniŋte dâŋ mumocke‐jarewec.
5Eme jaŋe manarâ bujeŋic biaŋkeme furine moneŋ râcneniŋte mujomirembiŋ.
6Mupie dâŋjeŋic reŋkehuc ŋic jaŋe hone manac mi ehapie soŋsoŋko doc bame roniŋte hone qatarac ehuc juwec.
7Ehame goreŋ sowa juhuc aakic lama hezuniŋte hombaŋ maickeme
8Jesuzi Petoro â Johane ʒiŋuc muhuc sorec‐jofawec: “Ŋohe rarâ aakic lama hezu rikec ehapire fâpene nânʒepeŋeŋ.”
9Mume jahe ʒiŋuc muhuc wiocnepic: “Fic wena hezu rikec ezeperec?”
10Eme ʒiŋuc jasawec: “Mananic, ŋohe haeo ferâ ŋic moc opâ râqâchec bâfuarâ bâjâperâ, ficko feme fenic.
11Ferâ fic rune ʒiŋuc âzâcneniŋ: ‘Qaqazuzi gore ʒiŋuc mukac, fic maŋne wena motecfâc‐nane jaŋehec aakic lama nanaŋmu?’
12Iŋuc âzâcnepire fic maŋne kâcɋene moc ŋeŋe fofo wiac rumacke emasaŋ ekicne ŋofatume ira aakic lama rike bâmoc ezepirec.”
13Eme jahe rarâ wiac muwec sâc bâfuarâ aakic lama rike bâmoc epic.
14Eme nâzo dameŋ maickeme motecfâcne gâcne rocjopame fisirâ nâmbiŋ.
15Ehuc ʒiŋuc jazawec: “Ʒâic dameŋ‐nanezi bâmbeŋnuhame aakic lama ʒi ŋoŋehec nâpemurâ boc enarejec.
16No mupe mananiŋ: No aakic lama mocwâc mi nânâ juhape Anuture uucmaŋko fâri fideteŋ eocmu.”
17Iŋuc murâ waiŋ râqâc rorâ daŋge murâ ʒiŋuc jazawec: “Ŋoŋe rorâ nâ nareŋ gareŋ eniŋ.
18No ŋazape, waiŋ opâ mocwâc mi nânâ juhape Anuture uucmaŋ fua tâcnezokac.”
19Dâŋ i murâ poroŋ rorâ daŋge murâ bazurâ ʒiŋuc muhuc jarewec: “Kecʒi fâri‐nane, i ŋoŋere erâ qikiŋnekicne. Nore manasuhuc iŋuc nânʒepieŋ.”
20Nânâ nâpie waiŋ râqâc rorâ iŋuc jaha jarehuc muwec: “Râqâc kecʒira ʒâʒâfic ɋâricnere socnane ŋekac. I ŋoŋere erâ qikiŋnekicne.
21Erâ manaŋgopieŋ, doc bacnuocmu eki nohec tebo ʒira wiac mâmâc ro nâc ehuc ŋekoperec.
22Ŋic Fâri Wâtuŋne e hata muʒâwecnekicne ijaha raocmu. Â doc baocmu e ine, jei okacne mo iŋucne roocmu.”
23Iŋuc mume motec jaŋe guru‐jeŋickonec mozi i eocmu muhuc wiwioc embiŋ.
24Eku wâc motec jaŋe nâŋâcnaonec mozi femicne‐nâŋec jukac muhuc hehefaric embiŋ.
25Epie Jesuzi ʒiŋuc jazawec: “Mâreŋ ŋicwofuŋ jaŋe ŋiczi kiŋaŋ qajareeŋgopieŋ â fekicne sâko jaŋe omanezi mumbiaŋ‐jopaeŋgopieŋ.
26Ŋoŋerao ine iŋuc mi fuazejec. Ŋoŋerao kâcɋenezi piticnere sâc juzejec, â micnezi kiŋaŋ qaqare sâcko juzejec.
27Me ŋoŋe muniŋ, wenimo izi fekicne? Nânâ mâc ŋehuc nâocmu eki fekicne, me rike bâmoc eocmu eki fekicne? Mâc ŋehuc nâocmuzi fekicne, i manaeŋgopieŋ. Noni ine ŋoŋere ŋondeŋko kiŋaŋ qaqa iŋucne erâ juekopac.
28Ŋoŋe hâcne ʒârâ hâriŋ maŋko jupe jujufâc‐nane jueŋgopieŋ.
29Eme Mamac‐nanezi guriŋ bapa gie munarewec iŋuc jaha noni ŋoŋe muŋarekopac,
30ŋoŋe nore uucmaŋko tiwâ nâ ʒeri eniŋte â ŋicwofuŋ ŋeŋeo ŋehuc Israe ŋicguru 12 jaŋere dâŋ mutaraniŋte.
31“Simoŋ, Simoŋ, padi saja bapie wosâeekac iŋuc jaha Sataŋzi ŋoŋe ere meo fepie saja bacŋopaocte mujec.
32Eme noni ine mamanasiŋge omaezacte gore erâ numupac. Irec go miti hatao mocwâc risierâ qomâfâcge keteŋ‐jopazemec.”
33Mume Petorozi ʒiŋuc âzâcnewec: “Wofuŋ, go kâpâcwâruo me hâmocko fâtec fâpemu.”
34Eme Jesuzi muwec, “Petoro, no gazape manac, qâqâczi miŋecgac ŋafeo mi dâŋehame goki jahec â moc micnucmu.”
35Iŋuc murâ muwec, “Noni moneŋ tâmiric â he tâmiric â kikehuhu tâmiric sorec‐ŋopape ra basac qasac moc embiŋ me?” Eme jaŋe mumbiŋ, “Iŋuc aricne jâmbâŋ.”
36Mupie ʒiŋuc ʒuhuckewec: “Â dameŋ ʒiŋuczia ine moc e moneŋ focnekacko ro bajuzejec, â moc e hemotec focnekacko rupe juzejec, â moc e ʒika basahuc ŋaqi qikiŋneme moc kitâcnecnezejec.
37No mupe mananiŋ, findaŋdâŋ moc ʒiŋuc qâreŋkekicne: ‘E ʒika qaqa jaŋere guruo râembiŋ’, dâŋ i norao fârinehuc eocmu. Erâ nore dâŋ mukicne i mâmâc sasawa sanaŋke‐fâreocte dameŋ maickekac hâcne.”
38Mume motec jaŋe ʒiŋuc âzâcnembiŋ: “Wofuŋ honec, ʒi ʒika jajahec fokopirec.” Eme muwec: “Sâcne.”
39Eme ŋeku Jesu e ŋafe sâc ejujec iŋuc erâ hae beherâ Oliwa tikio feme motec jaŋe bâjâpembiŋ.
40Eme jujujecko fisirâ motecfâcne ʒiŋuc jazawec: “Ŋoŋe eesâicko dockenʒipiŋte numuniŋ.”
41Iŋuc murâ qânâ wickepene raekac irec sâc rarâ dieŋzi herâ ʒiŋuc muhuc numuwec:
42“Mamac, go manatec sâckeme mutec ʒâic guru ʒizi nowaruoc. Erâ nore dâŋ mâcne, gore dâŋ sanaŋkezejec.”
43Iŋuc muhame sambâŋkonec aŋelo moczi waharâ basanaŋkewec.
44Eme maŋzi ʒâic hâhâwicne ecneha fotariehuc numuwec. Ehame fofoŋac‐ticne soc ʒâmbâŋ iŋucne tâcnehuc mâreŋko wahawec.
45Numuku faharerâ motecfâcne jaŋerao rarâ honec‐jopawec: Jaŋe busâqoczi bâdoc‐jopame betaŋkerâ guŋ fombiŋ.
46Fohapie jazarâ muwec: “Ŋoŋe wemocte guŋ foŋgopieŋ? Eesâicko dockenʒipiŋte faharerâ numuniŋ me!”
47Iŋuc muhuc domahame mi râsi guru ututuŋ fisinʒepieŋ i! Eme motec jaŋere âgo moc ʒâŋene Juda, eki micne bajarehuc Jesurao rarâ muduckewec.
48Muduckeme Jesuzi ʒiŋuc âzâcnewec: “Juda, go wemocte Ŋic Fâri Wâtuŋne e muduckehuc doc bakomec?”
49Eme Jesure kikefuŋfâc jaŋe wiac fuazo eme honerâ mumbiŋ, “Wofuŋ, ʒikazi jopanaŋ me?”
Luka 22
Luka 22:1-49