Luke 22:1-49

¹Tawen Jerusalem-itwew akngerr mpwelhenh tyenkerr ikwer apmelerrew. Jew-rnemarl akarrerrem, amern ilperr-ilperr arlwarelheley-angenh arlkwew-arlkwem, aker yep-yep-then. Rernemap iylpangkem, antyerl Akngey-wenhelarl awey alkenh-rnem Egypt-areny-rnem-wenh ipmew-antey atweynenh awank-akerr. Rap mentyarl arew awey alkenh-rnem Israel-rnem-wenh, renh-rnem ipmew atwey-angenh.

²Artwa rltwernem Jew-rnem-wenh tyaty ilkwareny-rnem artwa angka Moses-wenhew akalty-anthey-angker-rnem-then rernem angkerrenh alakenh: “Nthakenh Jesus-an anantherr irrtyertel antwerrkem, renh atweyew?” Akngerr-wety rernem ywarn iterrenh apatemel, ingwer-rnem ikwer-rnem ahelerrewerr.

³Arrenty alkenhelan Satan-el Judas Iscariot arrkernew-anem. Kwertengerl ikwerenh-anteyarlap ran, Jesus-elarl ayerrpelew arrwekel-antey.

⁴Rap irrtyertel-antey alhew artwa rltwa tyaty ilkwareny-rnem-warl, iltyemwerney tyaty ilkwareny-warl-then. Rap angkew, “Ayengan iterreyel, Jesus arrewantherr ahayiweyew. Nthakenharlap atha ileman?”

⁵Rernemap inkwerelhemel awew, angkew-anem ikwer, “Anantherran apwert akngerr ngkweng anthem.”

⁶Judas-an angkew, “Yew-yew.” Ran intem alakenh iterrerl-apenh, “Ilengerarl atha renh-rnem ilanthem, Jesus antwerrkeyew? Irrpetyapantarl ikwer-itwel aneyeleng-arey apek?”

⁷Arlta ingwerelan rernem amern ilperr-ilperr arlkew-arlkwenh Jew-rnem-wenh-angkwarr. Ingkerrel yep-yep akely ahenty akemel atwew. Rernemap ampernew, arlkweyew-anem.

⁸Jesus angkew Peter-ew-then John-ew-then, “Alhenh-atherr, amern tyenkerr-rnem ineyew. Amern-rnem ampernenh-atherr arrernemel, anantherr kwenty arlkwew-arlkweyew.”

⁹Ratherrap ayernew, “Nthek-ampeny-warl aylernanth amern-rnem ampernem?”

¹⁰Ra tyernew, “Alhenh-atherr Jerusalem-warl. Mpwelanthap renh arenheyenh, artwa anyentarl apetyeyenh ampwal kwatyew-arelh-akert. Renhap apentenh-atherr warl anyent-angkwarr, aylpenhemel ikwer-angkwarr.

¹¹Angkey-alhenh-atherr alakenh warlew-artey ikwer, ‘Ingkartel thwenew. Nthenh-itwewarlap anantherr tyenkerran arlkweyenh?’

¹²Artwa rap atnwenhem irrwerl, room taypel ilkwangketyarr-warl. Ikwer-itwew amern tyenkerr-rnem ampernenh-atherr arrernemel, anantherr arlkwew-arlkweyew.”

¹³Ratherrap anperl-alhew, inngarl arewan, Jesus rarl ilew-angkwarr arrwekel-antey. Amern tyenkerr-rnem arrernew-penh, ratherrap alpew Jesus-warl angkep-antey.

¹⁴Ingkenyarl aylpenhewel, Jesus alhew kwertengerl ikwerenh-rnem-akert apmer ikwer-warl. Rernemap arrernelhew, tyenkerr-anem arlkwew-arlkweyew.

¹⁵Rap angkew ikwer-rnem, “Ayengan ilkelhew-antey, tyenkerr nhenh arlkweyew arrewantherr-akert. Anantherrarl arlkwem-penh, ingwer-rnemelan ayenh irrwampenh-antheyenh artewenty, ipmew-antey ayenh atweyenh.

¹⁶Ingkerr atyeng awelhenh-arey! Tyenkerr nhelkwer atha arlkwey-angenh arrpemarl alakenh. Ingwer-ingwerant, ayengarl ilwenty-penh, Akngeyan ikwerenh-rnemew atyetyart aneyenh, athap arlkweyenh arrpemarl alakenh.”

¹⁷Rap inew irrkwa ngkwarl wayn-akert, inkwerelhemel Akngey-anem nakew ngkwarl ikwer-akertel. Rap angkew-anem ikwer-rnem, “Ya, ngkwarl nhenhan inenh-arey. Antherreynemel antywenh-arey akelyarl-akely.

¹⁸Ngkwarl wayn nhenh atha antywey-angenh arrpemarl ahern nhenh-itwew alakenh. Ingwer-ingwerant, Akngeyan ikwerenh-rnemew atyetyart aneyenh, athap antywem arrpemarl alakenh.”

¹⁹Amern-anem ra inew, rap inkwerelhemel Akngey-anem nakew amern ikwer-akertel. Akaltheynemel akelyarl-akely ikwer-rnem antheynew angkemel, “Arlka atyenh nhenhan. Ingwer-rnemelarl arlka atyenh-anem artewenty arleny-arrerneyenh whip-el. Ayengan katy ilweyenh arrewantherr. Alakenhaym arrantherr amern arlkwerl-anem, atyeng iylpangkemel.”

²⁰Rernem tyenkerr arlkwew-penh, Jesus-el inew arrpemarl irrkwa ngkwarl wayn-akert, antheynemel angkemel-antey, “Arrnga thelemel katy ilweyenh ayeng arrewantherr, apmwa irrarlkenheyew. Akngeyel arretengelew, rarl anyent-anem arrenhantherrenh pweytelem ikwer-warl. Atharl arrnga thelem alakenh, Akngey arrewantherr angkem ingwer-rnemew-then, rarl apmwa irrarlkem arrewantherr ingkerrenh-they.”

²¹Rap angkew ikwer-rnem, “Anyentan arrewantherr-they alherlenty-akngeyenh artwa ilkwernem-warl irrtyertel-antey. Amernarl arlkwem-penh, rap ingwer-rnem-anem ileyenh, ayenh antwerrkeyew.

²²Artwa Inngarl Akngey-wenh ayengan ilwem, Akngey-wenh pipel aynteyel-angkwarr. Artwa irrtyert-awarr renhanap Akngeyel artewentyel irrwampenh-antheyenh.”

²³Kwertengerl-rnemel awew alakenh, rernemap angkerrew, “Artwa nthek-apenyarlap ran?”

²⁴Rernemarl anew-anenh-antey, kwertengerl-rnem alakenh angkerrenh anyentarl-anyentarl, “Ayengan atyetyart Jesus-they, arrantherr ingwer-rneman arrangkwarl!”

²⁵Jesus angkew ikwer-rnem, “Atyetyart ahern nhenh-areny-rnem ahelengkwarl. Rernem akngerr pwerep-anthem, awelheyew ikwer-rnem. Rernem angkem, ‘Mwerr-angkerant-arey anantherr anem apmer nhenh-itwew, ayengarl atyetyart ilkwarl.’

²⁶Atyetyart ahelengkw yanh-rnem-apeny aney-angenh. Anyentarl arrewantherr-they atyetyartan aneyew. Warrkenh-apeny nga anemer anyentant, 11 yanh-rnemew warrkerreyew. Ntwan arntarnt-aremer 11 yanh-rnem.

²⁷Atyetyart ilkwa artwa ilek-apenyarlap ran? Weth ran taypelel anem, amernarl arlkwem, artwa warrkenhelarl ikwer akngetyem. Ayengarlap atyetyart ahelengkw weth-rnem-apeny-weny. Athap arrenhantherrenh arntarnt-arem.

²⁸Arrantherran ayenh iwerl-alhey-angenh, rlterrkarl atyeng ayntewengarl, ingwer-rneman atyeng-wety intwemelerrewarl.

²⁹Akngey atyenhel ayenh atyetyart arrernew ingkerr ikwerenh-rnemew. Alakenh-anyem ingwer-ingwer atharl arrenhantherrenh arrerneyenh atyetyart-rnem.

³⁰Ayengan aney-alpem atyetyart irrwerl-itwew, kwertengerl-rnem arrantherr atyeng-itwel aney-alpem. Anantherrap inkwerelhemel kwenty arlkwerrem. Arrantherr chair amparrkentyel anem, Jew-rnem arntarnt-aremel ingkerrenh.”

³¹Jesus angkew Simon Peter ikwer, “Simon, awelha atyeng. Arrenty alkenhel Satan-el Akngey alakenh ayernew, ‘Mwerrang atha kwertengerl-rnem arrkernem artewentyel?’ Akngeyan angkew, ‘Kel mwerr.’ Ingwerentyaman arrantherr iylpareth-antey ikwer awelhem, apmwangkwarrarl angkeyelewan.

³²Athan ngkweng Akngey ayernew, Simon-ay, ngenh rlterrkeleyew. Atha iterl-areyel, ngarl atyeng-wety amenterrenheyenh. Ngarl atyeng-warl angkeperrenhey-alpeyenh, ntwap ingwer-rneman rlterrkel-aynta.”

³³Ra tyernew, “Arrangkwarl! Ngenh akwernem tyayl-warl, ayeng ngkweng-angkwarr alhem arrpemarl. Ngenh ipmew atwem, ayenhanap rernem atweyew arrpemarl.”

³⁴Jesus angkew, “Ileyel atha ngenh arraty. Tywek-tywek arlkeyew-alenty rlengk atemwengkel-antey, irrpety-inger nga ilelheyenh, ntwan ayenh iterl-arey-angenh.”

³⁵Kwertengerl 12 ikwer-rnem-anem ra angkew, “Arrantherr iterl-areyel, atharl weth thwenew arrenhantherrenh, angka mwerr-angker ilerl-apaynteyew. Iltyantarlap arrantherr alhew; apwert-weny, yakweth-weny, pwet anyentant. Ayek ingwer-rnemelan arntarnt-arew arrenhantherrenh?” Rernem tyernew, “Ya, ingwer-rnemel anenhantherrenh arntarnt-arew inngarl.”

³⁶Rap angkew, “Aleyan ingwer-lkwer-anem. Ingwer-rnemelan arrenhantherrenh arntarnt-arey-angenh. Aleyan arrewantherr mwerr-anemarl apwert-then yakweth-then akngeyew. Ingwerentyel nayp arlpenty atnyeney-angenh apek. Ra kwet ikwerenh anthemer apwertew. Apwert ikwerel ra nayp arlpenty-anem inemer.

³⁷Akngey-wenh pipelan alakenhan aynteyel: ‘Rernem angkeyenh, atharl angka Moses-wenh apentey-angenh.’ Ya, angka yanhan atyeng-akert. Rlengkan rernem atyeng-akert alakenh-anyem ilem, Akngey-wenh pipelarl aynteyel-angkwarr.”

³⁸Kwertengerl-rnem angkew, “Ingkartay, nhenh araw! Kelarl anantherran nayp arlpenty atherr atnyeneyel.” Ra angkew, “Kel-antey. Alakenh angkey-angenh, menty. Arwa angkeyel.”

³⁹Ikwer-penhan Jesus warl ikwer-they anperl-alhew kwertengerl ikwerenh-rnem-akert, angkep alpew apmelerrel-ayeth Apwert Alip-warl.

⁴⁰Rernemarl apwertel aney-alhew, rap angkew ikwer-rnem, “Akngey-anem arrantherr ayernenh-arey rlterrkeleyew. Arrentyel arrenhantherrenh arrkernewerr, angkeperreyew atyeng-wety.”

⁴¹Kwertengerl-rnem arrernelhew ingkerrenh-antey, Jesus-an arleng-awatyelew. Rap kwenerremel-anem angkenh alakenh-anyem,

⁴²“Akngey atyenh, ayeng ilkelheyel, ntwa artwereleyew ahelengkw yanh-rnem. Ayenh irrwampenh-anthewerr, ipmew-antey atwemel! Ngarl ilkelhenty, rernem ayenh atwem, kel mwerrarl. Ayeng ngkweng awelhemarl. Ngkwenh-angkwarr mwerr.”

⁴³Antyerl-anem irrwerl-they anamerl-antey aremerrenhey-alhew, rlterrkeleyew renh.

⁴⁴Jesus-an arlka apmwerrenhew. Rap Akngey angkepelarreng ayernenh rlterrkel-antey irrkaty-angkwarr. Rlterrkel ayernenh-angkwarr, intyey-anem ikwer-they taltyaytnenh kwaty-apeny.

⁴⁵Akngey-warl angkenh-penh, ra rtnerl-alhew, alpemel-anem ikwer-rnem-warl. Rap renh-rnem arey-alpew, ankwarl ayntenh-anem. Rernemarl amperrngerremel anew-anenh, ankwel-anem renh-rnem atwew.

⁴⁶Rap atyekelemel ayernew, “Ay! Ilekewarl arrantherran ankwan aynteyel? Akwentenh-arey! Akngey ayern-ayntenh-arey artewenty, arrentyel arrenhantherrenh ilpertelewerr.”

⁴⁷Jesus-an angkenh-angkwarr, kwertengerl Judas-anem aremerrey-alhew akngerr ingwer-rnem-akert. Rap alhew, Jesus-ew arrwantyeyew-arrpantey.

⁴⁸Jesus-el ayernew, “Inngang ntwan ayenh arrwantyeyel? Arrangkw. Alakenhan ntwa ayenh artwa ahawarr-rnem-warl lwewarrerneyew, antwerrkeyew.”

⁴⁹Kwertengerl ingwer-rnemel arew, artwa ahawarr-rnem arrererrenhey-alhew, antwerrkeyew-anem. Rernem ayernew, “Ingkartay, mwerrang anantherr renh-rnem atanthem nayp arlpenty atherrel?”