Luka 22:1-49

¹Lal maiyoko kidi Yuda yo be tikana porong yo taukan so be iyeii a isung i, inbe lodi tut ye Paskimoolooningi ke Maro i, in nookoot nga iman potai oo.

²Ye kene tani in di tooltool maimai ke paroranga so pang Maro tiye di pannoongoo ke ger ke Maro nga, ngan ke be tikaua Yesu mallangana ye di tooltool tina ngan matadi tiap, yesoo titattadai di. Le nga tigaua, inbe tisere dada yo be tikauu a tiparama, a be nen ngan tiraumate le imata ye i.

³Motong la tool dook tiap Satan, in idiwidiwi Yuta yo tikiui ene san ye Iskariot i, in lono. Ngan Yuta tani, in Yesu di galiunu tina yo sangaul be ru nga, ngan atu kidi.

⁴Motong la Yuta tani in ilo ikamata di tooltool maimai ke paroranga so pang Maro nga, ngan tiye di tooltool kuto maimai yo matadi kala di bianga yo tikodo kala bareme mai ke sungunu nga, a be lo iye di tiwetewete, inbe tikarata betanga ye dada yo be itara Yesu tani in la baedi ye i.

⁵Ngan tilongo tina yo iwete nen nga le lodi ponana dook, motong la tigaua lodi be ole tikap pat pattu panga.

⁶Le nga Yuta tani in lono dook mata ye betanga kidi le la inam, inbe lon kaua urata ye lal nangai dook mata ke be di tooltool malala mai tina ngan tiyepe tiap, inbe itara Yesu la baedi nga.

⁷Motong la lal maiyoko tani kidi Yuda yo be tikana porong yo taukan so be iyei a isung i, inbe lodi tut ye Paskimoolooningi ke Maro, in pombe.  Le nga ye kene tani in, ngan ole di Yuda tina be tiraumata asara yo ene sipsip in natunu a be tiyei paroranga ye a tikan ye lal ke Paskimoolooningi tani.

⁸Motong la Yesu iwanga Pita ye Yowan be yaru timuku la tipare kaningi pang di. Le nga iwete pang di nen, “Suru, nga ole angru kamuku a kala la kapare kaningi paidi yo be takan ye lal ke Paskimoolooningi ke Maro i nga.”

⁹Motong la yaru titoro Yesu nen, “Ni nangai lom be la ampare kaningi tina ngan ye i?”

¹⁰Motong la Yesu iwete pang di yaru nen, “Kumata be angru kapa le lo pombe malala mai tani in lono nga, ngan ole tamoto atu yo ikooroo ran bor somai in itauarai ang dada. Ngan katoo a kaye kalo pang ye rumu yo be lo idewoo i.

¹¹Ngan kalo, lo ngan be katoro rumu taunu nen, ‘Pannoongoo kiam iwete be man amtorong nen: Rumu lono yo kukarata panga be se iye di galiunu tiyepe ye, inbe tikana kaningi ke Paskimoolooningi ke Maro ye i, in la nangai i?’

¹²Ngan ole rumu taunu tani in ipatnaia rumu lono somai atu yo iken ke ete i, in pang. Ngan rumu lono tani in tikarata kookoowoo ke burungu le ke kaningi so ye oo. Lo ngan be angru kalo lo kapare kaningi nango.”

¹³Motong la di galiunu ru tina ngan tiyege di a tilo nga, ngan le lo tikamata so tina le imot ngan pombe ben tina yo Yesu iwete pang di ye nga. Motong la yaru tipare kaningi yo be tikan ye lal ke Paskimoolooningi ke Maro nga.

¹⁴Ngan lal ke kaningi so pombe, le nga Yesu iye di aposol ki tina ngan lo tiwur le tiwakaia kookoowoo yo ke kaningi so i.

¹⁵Motong la Yesu iwete pang di aposol ki tina ngan nen, “Au i lok dook mata san be le ayang takana kaningi ke Paskimoolooningi ke Maro i, muku ngan, lo ngan be asolo urata moonoo dook tiap ke masngana kooti.

¹⁶Awete pang nen, yesoo au i o ke be akana kaningi ke Paskimoolooningi ke Maro tani in mulu tiap, le ilo ye lal yo Maro itaru be matan kala di tooltool ki ye i, in pombe. Ye kene tani in, ngan la be Maro ole ipatnaia Paskimoolooningi tani, in punu le iken mallangana pang nga.”

¹⁷Motong la ikaua ruku atu a iwete lo ponana ki pang Maro ye, inbe iyei ne, “Kakaua ruku i a ang le imot kasuketketi kataunu yang, inbe kayin ran ki nga kasin kasin.

¹⁸Awete pang nen, yesoo au i o ke be ayin ooroo surunu mulu tiap, le ilo ye lal yo Maro be matan kala di tooltool ki ye i.”

¹⁹Motong la Yesu ikaua porong atu a iwete lo ponana ki pang Maro ye, inbe itepalapala a ikap pang di galiunu tina, inbe iwete pang di nen, “Bi, i au medak la akauu pang i. Le ole kakani a be nen ngan lomim tutu matenge kiau ye.”

²⁰Ngan tikana porong tani a imot, motong la itoo dada gaongo leu ye ruku. Le iwete nen, “Ooroo wain surunu yo iken ruku i lono nga, ngan rara kiau yo be apamede betanga medana paunu pang ye i. Ngan la le apatioo be nen a Maro ilonang ye.

²¹Bong kakamata! Tool yo be itarau la di koi kiau baedi i, in ya la amru amkan so gaongo ye kookoowoo ke kaningi so i.

²²Ngan nen le Tool Moolmool ke Maro ole itoo dada tani yo muku ngan Maro iweta a itaru panga i. Bong barau, tool yo be itara Tool Moolmool ke Maro la di koi ki baedi i, in ole isolo masngana mai le masngana mai ki taunu.”

²³Yesu di galiunu tina, ngan tilongo yo iwete nen nga, le nga di tapdi tipartortor nen, “Ai, in sei kiidi be iyeie dada nen i?”

²⁴Motong la ye kene tani in Yesu di galiunu tina ngan di tapdi tiparsu ye betanga kataunu ye di, be ole sei tool iyei kuto mai a imuku pang di i.

²⁵Le nga Yesu iwete pang di nen, “Ai, di tooltool kuto maimai ke di tooltool yo tipa ye rara kidi Yuda tiap nga, ngan tikodo le timede ye gurana kidi, inbe tidada di tooltool kidi podi. Inbe di tooltool tina yo gurana kidi mai le di diedi tiyepe parmadi nga, ngan di tapdi lodi be di tooltool tikiui di ye ‘Di Tooltool ke Maroro.’

²⁶Bong ang nga, kin kayei nen be. Le kumata tool atu kataunu yang lono be iyei tool mai le imuku pang nga, ngan ole ya taunu irautoo le idu meneng lopo yege ni, dawa ben tool kase yo taukan ene i. Inbe kumata le tool atu lono be iyei tool kuto mai a be matan kalang nga, ngan ole iyei ben kapraingi kiang.

²⁷Nga be atorang, sei tool ene mai i, tool yo iwur ye kookoowoo ke kaningi so i, too tool yo iso kaningi a ikap la irai di tooltool yo tiwur ye kookoowoo ke kaningi so i? Ngan tool yo ene mai i, in tool tani yo iwur ye kookoowoo a be ikan so i. Bong au i nookoot ayang tayepe nga, ngan ayei dawa ben kapraingi kiang, a be nen ngan alonang.

²⁸Muku ngan ayang tayepe, inbe moonoo matana matana la pompombe pang yau nga, bong ngan le kakoo yau tiap.

²⁹Ngan nen le ben tina Tamak imalum pau le itarau be ayei tool kuto mai a matak kala so nga le imot nga, ngan la au lapau amalum pang le ole atarang be kayei tooltool kuto maimai nen lapau.

³⁰Ngan nanga, kumata le pang dama ni be ayei tool kuto mai a matak kala so nga le imot nga, ngan ole ayang tawur le tawakaia kookoowoo kiau ke kaningi so a takan be tayin, inbe ole lo kawur ye kookoowoo ke burungu ke di tooltool kuto maimai, a be nen ngan matamim kala di rara ke Isrel yo sangaul be ru nga.”

³¹Motong la Yesu iwete pang Simon nen, “Simon, Simon, kupalongo! Satan itor be ole itou ang atu atu ye lo medana kiang, dawa ben tool ke kapkingi be itaurai dingding patunu a be kulini ikoo ye kanono nga.

³²Bong ngan Simon, au i apatarau yong oo, a be nen ngan lo medana kiong yo kutaru pau i, in ilene le ipa so be. Ngan nen le ye kene yo be kuportaka lom mulu pau ye in nga, ngan kupamede di diem kapala yo titara lodi medana pau nga, ngan lodi, a be nen ngan tikodo le timede lapau.”

³³Motong la Pita iyei ne, “Tool Mai, au i araia lok be ole titaridi aru lo rumu dook tiap kidi talnga dikidiki lono, a be nen ngan aru le ru be tammata.”

³⁴Motong la Yesu iraua betanga ke Pita nen, “Atoo, Pita! Awete pong nen, nookoot bong katai nga, ngan ole tareke itang tiao, inbe kupataukala a kuwete le patol be ong i lom galanga yau tiap.”

³⁵Motong la Yesu iwete pang di galiunu tina nen, “Ye kene yo awangang baemim koonoo a kala be la kayei urata kiau ye in nga, ngan le kakap touo depe ke tarungu pat, le depe ke lonloningi, inbe loningi ke kemim ngan sa a kala tiap. Bong kene tani in le kamaka ye so sa lapau, too tiap?” Ngan le di galiunu tina tiyei ne, “Tiap.”

³⁶Motong la iwete pang di nen, “Bong nookoot nga, tool be depe ki ke tarungu pat, ngan ikauu. Inbe tool be depe ki ke tarungu lonloningi nga, ngan ikauu lapau. Inbe kumata le tool be taukan pul ke patokongo nga, ngan ole iyawara sousoungu matolene ki, a be nen ngan ikap pat tina, inbe iyimi kan atu.

³⁷Ngan awete pang nen, yesoo betanga yo tiwodo ilo ye Rau ke Maro nga, ngan iwete nen, ‘Di tooltool ole tikamata dawa ben ya in tool dook tiap atu.’  Le ole tiyei dada nen pau, yesoo so tina le imot yo tiwodo betanga ki lo iken ye Rau ke Maro nga, ngan ole kanono pombe pang yau moolmool le imot.”

³⁸Yesu iwete pang di nen, motong la di galiunu tina ngan tiyei ne, “Tool Mai, kumata! Am nga pul kiam ke patokongo ngan ru nanga la ikenen nga.” Motong la iwete pang di nen, “Ngan dook mata.”

³⁹Motong la Yesu iyege malala mai tani, inbe ipa a ilo pang kawal Olip ben tina yo kanakana ngan iyei nga. Le nga di galiunu tina ngan titoo lapau a tiye tilo.

⁴⁰Ngan tilo a lo pombe ye ni tani, motong la iwete pang di nen, “Ai, kapatarau, a nen ngan touanga sa be pombe pang yang nga, ngan o ke be kamol tiap.”

⁴¹Motong la iyege di galiunu tina, inbe ipa le ila manga mooloo kasin, dawa ben manga yo tool atu be ikat ye pat ngan le la pumbe ye i. Motong la du igun turunu, inbe ipatarau. Iyei ne,

⁴²“Tamak, kumata le lom dook mata nga, ngan kugutaka ruku ke masngana i yau. Bong kin kutoo au lok be, kutoo ong taum lom leu.”

⁴³Yesu ipatarau nen, motong la bangabangana atu ke Maro ipa ye malala ke Maro a isi pombe pang ye a ipamede.

⁴⁴Ngan Yesu ya taunu ikanamaii ngan lon modoko inbe tinin moo mai san, le nga ipatarau le gurana. Inbe sapirana yo irar ye tinini mai i le imot a imol du tana nga, ngan dawa ben rara patunu.

⁴⁵Yesu ipatarau a imot, motong la imadit a imulu a ila pang ye di galiunu tina. Ila, ngan ikamata di yo tiken mata koot nga, yesoo bong lo modoko mai irau di le guradi tiap.

⁴⁶Motong la iwete pang di nen, “Ai, nga yelei a kaken mata nga? Kamadit a kapatarau, a nen ngan touanga sa be pombe pang yang nga, ngan o ke be kamol tiap.”

⁴⁷Yesu iwetewete nen go, inbe di tooltool malala mai tipa le lo pombe. Di tooltool tina ngan Yuta yo Yesu di galiunu tina yo sangaul be ru nga, ngan atu kidi i, in ya la irara di a tilo i. Le nga Yuta tani in ipa so le ila potai ye Yesu la iwarra, inbe isomo pangana.

⁴⁸Motong la Yesu itoru nen, “Yuta, nga be kutara Tool Moolmool ke Maro la di koi ki baedi, la le se kusomo pangana nen nga, too?”

⁴⁹Ye kene tani in yeisa be Yesu di galiunu tina ngan tikamata so tani yo be pombe pang ye in nga, le nga tiyei ne, “Tool Mai, nga lom belei, be amraumatamata di tooltool nga ye pul kiam ke patokongo nga, too?”