San Lucas 22:1-49

¹Catiꞌ chzoa gdxin lni catiꞌ tahuëꞌ yöt xtil cunazíꞌ xnëꞌi, nazíꞌ lei Pascua lni naꞌ,

²guludubëꞌ yuguꞌ bxuz uná bëꞌ len bönniꞌ gdauꞌ tuꞌsëdi. Taꞌzú taꞌböꞌë ludöddëꞌ Jesús, san cutu gulazáquiꞌnëꞌ le tádxinëꞌ bunách.

³Niꞌr yajtság Judas Satanás tuꞌ xöhuiꞌ. Judas lëꞌ caꞌ Iscariote, len nababëꞌ idxínnutëꞌ gbaz nasölëꞌë Cristo.

⁴Gyijëꞌ Judas naꞌ, yjë́ꞌlenëꞌ didzaꞌ yuguꞌ bxuz uná bëꞌ len bönniꞌ dë lu naꞌquëꞌ qui gdauꞌ, nacx gunëꞌ quië udödëꞌ Jesús lu naꞌquëꞌ.

⁵Guludzijnëꞌ bönniꞌ gdauꞌ naꞌ, len gulazíꞌ lu naꞌquëꞌ lunödzjëꞌ queëꞌ dumí.

⁶Rdzag ladxëꞌë Judas, atiꞌ rzu rböꞌë udödëꞌ Jesús lu naꞌquëꞌ bagachiꞌz.

⁷Bdxin dza naꞌ tahuëꞌ yöt xtil cunazíꞌ xnëꞌi, catiꞌ ral‑laꞌ ludöddëꞌ‑baꞌ böꞌcuꞌ zxilaꞌ tahuëꞌ xtsöꞌ Lni Pascua.

⁸Bsölëꞌë Pedro len Juan, Jesús, rnëꞌ: ―Gul‑tséaj, gul‑tsajpáꞌ queëruꞌ le gáguruꞌ dzöꞌ Lni Pascua.

⁹Tëꞌ Lëꞌ: ―¿Gazx rëꞌnnuꞌ tsajpaꞌtuꞌ queëruꞌ?

¹⁰Rëꞌ lequëꞌ Jesús, rnëꞌ: ―Gul‑yutscaꞌ, catiꞌ tsazliꞌ lu yödz ni, niꞌ grujëꞌ bönniꞌ dutsaguëꞌ lbiꞌiliꞌ, zunuꞌë röꞌö nis. Gul‑tséajlenëꞌ ga gdxíntëliꞌ yuꞌu ga tsaziëꞌ.

¹¹Gul‑guië́ꞌ xan yuꞌu naꞌ: “Bönniꞌ Usëdi rëꞌ liꞌ: ¿Gazx zoa yuꞌu lni ga gágulenaꞌ yuguꞌ bönniꞌ usë́d quiaꞌ xtsöꞌ Lni Pascua?”

¹²Niꞌr uluiꞌinëꞌ lbiꞌiliꞌ tu yuꞌu zxön xtsaꞌ ga niꞌ chnabáꞌa. Gul‑páꞌ niꞌ le gáguruꞌ.

¹³Niꞌr yjaquëꞌ len yajxácaꞌquëꞌ ca naꞌ chgudxëꞌ lequëꞌ Jesús, atiꞌ gulupë́ꞌë niꞌ le lahuëꞌ xtsöꞌ Lni Pascua.

¹⁴Catiꞌ bdxin dzöꞌ naꞌ, gröꞌë Jesús ga lahuëꞌ, atiꞌ gulabö́ꞌlenëꞌ Lëꞌ tsazxö́n gbaz queëꞌ naꞌ.

¹⁵Niꞌr Jesús rëꞌ lequëꞌ: ―Guctsca ladxaꞌa gágulenaꞌ lbiꞌiliꞌ tsazxö́n xtsöꞌ ni zíꞌatël catiꞌ ziꞌa sacaꞌ quiꞌa len gatiaꞌ.

¹⁶Rëpaꞌ lbiꞌiliꞌ: Cutur gahuaꞌ lë ni catiꞌ gdxinr dza gac le ruluíꞌz xtsöꞌ ni ga niꞌ rna bëꞌë Dios.

¹⁷Gdel‑lëꞌë zxígaꞌdauꞌ len gudxëꞌ Dios: “Xclenuꞌ.” Niꞌr rëꞌ lequëꞌ: ―Gul‑síꞌ lë ni len gul‑guíꞌaj latiꞌ hueaj,

¹⁸le rëpaꞌ lbiꞌiliꞌ: Cutur guiꞌjaꞌ xisi uva catiꞌ gdxinr le rna bëꞌë Dios.

¹⁹Niꞌr gdel‑lëꞌë yöt xtil len gudxëꞌ Dios: “Xclenuꞌ.” Gdöd niꞌ buzxuzxjëꞌ lei len bëꞌë qui queëquëꞌ, rnëꞌ: ―Lë ni nac gdu ca nayáꞌ nabanaꞌ le rudödaꞌ uláz queëliꞌ. Gul‑gún cni quië usáꞌ ládxiꞌliꞌ nedaꞌ.

²⁰Catiꞌ budx glahuëꞌ, lëzcaꞌ cni bëꞌë didzaꞌ qui zxígaꞌdauꞌ naꞌ, rnëꞌ: ―Zxígaꞌdauꞌ ni ruluíꞌ ca nac didzaꞌ cub rucáꞌn tsahuiꞌ, atiꞌ run tsutsu lei rön quiaꞌ, rön naꞌ glalj niꞌa queëliꞌ.

²¹’Naꞌa, röꞌë rágulenëꞌ nedaꞌ tsazxö́n bönniꞌ naꞌ udödëꞌ nedaꞌ lu naꞌgac bunách.

²²Le nactë huayijaꞌ ga ludöddëꞌ nedaꞌ, Bönniꞌ Nuhuöaquëꞌ Gdu Bunách, gac quiaꞌ ca naꞌ nayúj lu guich laꞌy ca ral‑laꞌ gac quiaꞌ, san bicaꞌ bayechiꞌ bönniꞌ naꞌ udödëꞌ nedaꞌ.

²³Niꞌr gulazú lauquëꞌ taꞌnabnëꞌ Lëꞌ tu tuëꞌ, taꞌnë́ꞌ: ―¿Núzxaltuꞌ nu gun cni?

²⁴Niꞌr gluꞌë didzaꞌ laꞌ légaczëꞌ núzxalquëꞌ gdél‑liꞌnëꞌ latj blau.

²⁵Jesús gudxëꞌ lequëꞌ: ―Bönniꞌ taꞌná bëꞌë tuꞌgunëꞌ dxin yöl‑laꞌ uná bëꞌ quequëꞌ, taꞌná béꞌinëꞌ bunách, atiꞌ nup niꞌ dë lu naꞌgac yöl‑laꞌ uná bëꞌ, lëquëꞌ bönniꞌ taclen.

²⁶Lbiꞌiliꞌ cutu ral‑laꞌ gunliꞌ cni, san nu nac blau ladjliꞌ ral‑laꞌ gac ca nu nac cuídiꞌtër, atiꞌ nu rna bëꞌ ral‑laꞌ gac ca nu run dxin qui lzëꞌi.

²⁷¿Nuzxal naꞌ nacr blau, nu naꞌ röꞌ ragu, o nu rupáꞌ laꞌ huagu? ¿Naruꞌ clëg nu naꞌ röꞌ ragu nacr blau? Nedaꞌ zóalenaꞌ lbiꞌiliꞌ ca nu rupáꞌ laꞌ huagu.

²⁸’Lbiꞌiliꞌ ni gzóalenliꞌ nedaꞌ catiꞌ niꞌ bi guc quiaꞌ, yuguꞌ le gulazíꞌ bëꞌ nedaꞌ.

²⁹Qui lë ni naꞌ udödaꞌ lu naꞌliꞌ tu ga gna bëꞌliꞌ, ca naꞌ benëꞌ Xuzaꞌ, budödëꞌ lu naꞌa ga gna bëꞌa nedaꞌ.

³⁰Cni gunaꞌ quië gac cöꞌliꞌ, guiꞌj gágulenliꞌ nedaꞌ ga niꞌ gna bëꞌa, atiꞌ cöꞌliꞌ xlatjczliꞌ ga cuequi xbeyliꞌ idxinnu cöꞌ zxiꞌn xsoëꞌ Israel.

³¹Gnëꞌ caꞌ cni Xanruꞌ: ―Simón, Simón. Byutscaꞌ. Chgnab lbiꞌiliꞌ Satanás tuꞌ xöhuiꞌ, quië uríx udö́d lbiꞌiliꞌ ca nu ruríx rudö́d zxoaꞌ xtil

³²san chbulidzaꞌ‑nëꞌ Dios gnabdaꞌ Lëꞌ gáclenëꞌ liꞌ, cui udx udú yöl‑laꞌ rejlëꞌ quiuꞌ nedaꞌ. Naꞌa, catiꞌ huöacuꞌ quiaꞌ, btip ládxiꞌquëꞌ böchiꞌ lzaꞌu.

³³Pedro rëꞌ Lëꞌ: ―Xan, chzoaꞌ sáꞌlenaꞌ Liꞌ, clëgz tsijaꞌ lidx guia, san lëzcaꞌ gátlenaꞌ Liꞌ.

³⁴Jesús rëꞌ lëꞌ: ―Pedro, rëpaꞌ liꞌ: Ziꞌal cödxbaꞌ zxiꞌn druz naꞌa, chgdáꞌbaguꞌu tsonn lzu, gnauꞌ cutu núnbëꞌu nedaꞌ.

³⁵Gnabnëꞌ lequëꞌ Jesús, rnëꞌ: ―Catiꞌ bsölaꞌa lbiꞌiliꞌ cunuaꞌliꞌ yöxj yöt, ni bzud dumí, ni chop cöꞌ löl‑liꞌ, ¿naruꞌ bi byadzj queëliꞌ? Lequëꞌ taꞌnë́ꞌ: ―Cutu bi.

³⁶Niꞌr rëꞌ lequëꞌ: ―Naꞌa, nu dë qui yöxj yöt ral‑laꞌ guaꞌ lei, atiꞌ lëzcaꞌ cni ral‑laꞌ gun nu dë qui bzud dumí, atiꞌ nu cudë́ qui guia tuchiꞌ ral‑laꞌ gutiꞌ lariꞌ rxoa yeni len siꞌ tu guia tuchiꞌ.

³⁷Rëpaꞌ lbiꞌiliꞌ: Run bayúdx gac quiaꞌ lë naꞌ nayúj lu guich laꞌy, rna: “Glunëꞌ queëꞌ ca tunëꞌ quegac nup tuaꞌ döꞌ”, le lutság yúguꞌtë le nayujgac lu guich ca ral‑laꞌ gac quiaꞌ.

³⁸Niꞌr lequëꞌ taꞌnë́ꞌ: ―Xan, ni dë chop guia tuchiꞌ. Lëꞌ rëꞌ lequëꞌ: ―Chnac.

³⁹Niꞌr brujëꞌ Jesús len ca runczëꞌ zijëꞌ lu Guiꞌa Ga Röꞌgac Yag Olivo, atiꞌ zjáclenëꞌ Lëꞌ bönniꞌ usë́d queëꞌ.

⁴⁰Catiꞌ guladxinëꞌ niꞌ, rëꞌ lequëꞌ Jesús, rnëꞌ: ―Gul‑lidzëꞌ Dios, gnábiliꞌ‑nëꞌ cui gataꞌ latj siꞌ bëꞌ lbiꞌiliꞌ tuꞌ xöhuiꞌ.

⁴¹Niꞌr gzëꞌë ga naꞌ nacuꞌë Jesús, gdödëꞌ yelatiꞌ tsca ga rdxin guiöj r‑ruꞌnruꞌ, atiꞌ niꞌ buzechu zxibëꞌ rulidzëꞌ Dios.

⁴²Rnëꞌ: ―Xuz, chquiꞌ rëꞌnnuꞌ, bcuas ga zoaꞌ lë naꞌ ral‑laꞌ sacaꞌ quiꞌa, san clëg ca rëꞌndaꞌ nedaꞌ, san ca rëꞌnnuꞌ Liꞌ gunuꞌ.

⁴³Niꞌr buluíꞌ lahuëꞌ gbaz laꞌy queëꞌ Dios, zëꞌë yehuaꞌ yubá, atiꞌ butipëꞌ ladxëꞌë Jesús.

⁴⁴Lu yöl‑laꞌ rsëbi ladxiꞌ queëꞌ, gdu ladxëꞌë bulidzëꞌ Dios Jesús, atiꞌ guc ca rön rabaꞌ luyú nis yös queëꞌ.

⁴⁵Catiꞌ budx bulidzëꞌ Dios, gyasëꞌ len böjëꞌ ga naꞌ nacuꞌë bönniꞌ usë́d queëꞌ, atiꞌ duxaquëꞌë lequëꞌ tasiëꞌ niꞌa qui yöl‑laꞌ ruhuiꞌni quequëꞌ.

⁴⁶Niꞌr Jesús rëꞌ lequëꞌ: ―¿Rástsaliꞌ? Gul‑tsás, gul‑lidzëꞌ Dios gnábiliꞌ‑nëꞌ cui gataꞌ latj siꞌ bëꞌ lbiꞌiliꞌ tuꞌ xöhuiꞌ.

⁴⁷Tsal niꞌ ruꞌë didzaꞌ Jesús, laꞌ guladxintëꞌ niꞌ bönniꞌ zian, dzaguëꞌ lequëꞌ Judas, bönniꞌ naꞌ nababëꞌ idxinnuëꞌ bönniꞌ usë́d queëꞌ Jesús, atiꞌ nanörëꞌ lauquëꞌ bönniꞌ zian naꞌ. Gbiguëꞌë ga zoëꞌ Jesús quië utság lahuëꞌ Lëꞌ.

⁴⁸Niꞌr Jesús rëꞌ lëꞌ: ―Judas, ¿naruꞌ rudödtsuꞌ cni nedaꞌ, Bönniꞌ Nuhuöaquëꞌ Gdu Bunách, rutság lauꞌ nedaꞌ?

⁴⁹Catiꞌ gulaléꞌinëꞌ ca naꞌ rac queëꞌ Jesús bönniꞌ naꞌ nacuáꞌlenëꞌ Lëꞌ, tëꞌ Lëꞌ: ―Xan, ¿naruꞌ güiꞌtuꞌ lequëꞌ guia tuchiꞌ?