Luka 22:1-49

¹Areto Nige ie Sese mataasina i hanahanau, esana ede Pasova.

²Kohena lailaidi tataodi, eo tauuriuri tataodi, ana mata se eooi ia bena se unui: tatao mo se matausiedi.

³Satani Iuda, esana esau Isakariota, abo i lui, ia saudoudoi‐labui wa esau.

⁴Ia i lau dobila eai kohena lailaidi eo kapena maedi se ribariba, Iesu edoha ena abiabina abo i morui eo i mosei isi aridi eai.

⁵Isi nuadi se lolo, eo se oioiriba moni abo se mosei ia arinai.

⁶Ia i heribanonohaidi ena dobila i woeai aisana, bena i moruiyamui, tatao wa nige se ita.

⁷Areto Nige i Sese asubenana i lagema, pasova arinai bena se unui.

⁸Ia Petero eo Ioane i hetamaridi, i ene, “Au lau, pasova au abinonohai, abo ta ai.”

⁹Isi se ribalau ia arinai, si ene, “Haedi abo ai abinonohai?”

¹⁰I heribadi, i ene, “Ena au lulage eanua eai, tau esau abo au hailobai, goila siaki eai i bahei: ia au lauwatai numa ena abaawasae eai hinage au awasae.

¹¹Numa wa tanuagana abo au heriba, au ene, “Tanuagada i heribam, i ene, Taumana edi biri haedi, arinai pasova ea ai, ma egu heaheatayao?’

¹²Ia abo biri lailai ewa eai i heitamiu se peinonohao: metai au abinonohai.”

¹³Isi se lau, hinage se lobai doha wau i ribaei wa: pasova abo se abinonohai.

¹⁴Huiana ie lage, ia i bawabigabiga, eo aposotolo saudoudoi‐labui maenayao.

¹⁵I ribalau aridi eai, i ene, “Egu gadosisi lailai ede ina maeguyao omi pasova ta ai baguna, abo ea amamna:

¹⁶paana ede ea heribamiu ta, pasova ta taba nige ea ai uioi, i lau e abo se hemamohoiei Eaubada ena basileia eai.”

¹⁷Kaputi i abi, abo i lautoi, i ene, “Teina au abi, ami au soi:

¹⁸Ea heribamiu ta, vine masina taba nige ea nomuioi, i lau e Eaubada ena basileia i lagema.”

¹⁹Areto ie abi, i lautoi, abo i ihi, i mosei aridi eai, i ene, “Taugu ede teina se leawa au abi, arinai emi abahenuaisinigu.”

²⁰Se aiai lautom abo kaputi hinage ie abi, i ene, “Teina kaputi ta gagaeo harihariuna osinagu eai, se heboriri debamiu eai.

²¹“Na, ia abo i moruigu, maegu nimana ie tore hatahata potana eai ta.

²²Mamohoi tau Natuna abo i lau doha se nuatui nonohai: kapore nei tau ne ia i morui ne!”

²³Isibom se hesihesiouioidi si ene aitea tau aridi eai abo i abi doha nei.

²⁴Hinage isibom se haiawayagara, aitea aridi eai abo i saeariri.

²⁵I ribalau aridi eai i ene, “Murimuri tataodi edi wasawasa se lauhearidi, eo isi tatao se lauhesomdi, esadi se tore tatao tauhelolodi.

²⁶Na, omi tabu meta doha: esau arimiu eai i sae ia abo i hemala taumurita: eo ia se awaguiauei, abo i hemala tauheaheari.

²⁷Aitea i sae ariri ede, ia abo i bawabigabiga i aiai, e ia abo heaeai tauabina? Ia i bawabigabiga i aiai, e nige’e? Na eau arimiu eai doha heaheari tauna.

²⁸“Agu noho ea hearodi omi ede au miatahitahi arigu eai.

²⁹Basileia esau abo au abi enamiu: doha hinage Tamagu i leama enagu;

³⁰egu basileia eai, egu hatahata eai abo au aiai, eo au aiainom, eo abo au bawabigabiga terona potadi eai Isaraela bogadi saudoudoi‐labui abo au heduduraidi.”

³¹Guiau abo i ene, “Simona e, Simona e, Satani i henua ariri bena i abim, bena i oiluiluim doha sitona.

³²Na ea lau‐uurao enam, bena em sunuma tabu i lautom: oa nuam u bui, em dodogayao abo u headidiridi.”

³³I ribalau ia arinai, i ene, “Guiau e, eau abo ea lauwataim, ta lau numa masigiri eai, eo ta mate.”

³⁴I ene, “Petero e, ea heribam ta, teina wau ta kamkam sora nige ie dou, oa ma haiona abo u uharaegu, abo u ene nige abigu u ata.”

³⁵Iesu i ribalau aridi eai, i ene, “Nabada wa ea hetamarimiu wa, nige moni tobona, eo nige tobo, eo nige ae’um, ginauri esau au hedeha?” Isi si ene, “Nige’e.”

³⁶Abo i ribalau aridi eai, i ene, “Teina huia ta ia taba moni tobona i abi abo i abi, eo lauwasi tobona hinage: ia hinage nige ena elepa, ena lulu i uneunei, abo ena elepa ena abaabina.

³⁷Paana ea heribamiu ta, ea ’ne, teina ta se uriyao debagu eai abo se hemamohoiei, si ene, ‘Laugagaeo tauutuutusina maedi se heoiesegai,’ paana ede saha enagu si uri, abo se hemamohoiei.”

³⁸Isi si ene, “Guiau e, hage u ita elepa labui ede ina.” I ribalau aridi eai, i ene, “Gonoana.”

³⁹Ia ie pesa ie lau Oliveta tupina eai, doha ia kamanina; ena heaheatayao ia se hemuriwatai.

⁴⁰Ie lage dimona eai, i ribalau aridi eai, i ene, “Au lau‐uura, ata noho se hearomiu.”

⁴¹Ia i lausuara siuna lohana doha we’u ta tu, i turibono, i lau‐uura.

⁴²I ene, “Tamagu e, ena nuam u ene i lolo, teina kaputi ta u laehesuara: Taiede eau nuagu nige’e, oa mo nuam ta abi.”

⁴³Aneru esau galewa eai i lagema ia arinai, ia i headidiri.

⁴⁴Ia amamna lailai i nuhuri ena uura i uura adidiri: i muiasa doha osina i namtutu lailai dobi tano eai.

⁴⁵I lau‐uura nonoha abo i toro, eo ie lau ena heaheatayao aridi eai i lobaidi ma enodi, paana se nuadubu ariri.

⁴⁶I ribalau aridi eai, i ene, “Saha au enoi? Au toro au uura, noho ata i hearomiu.”

⁴⁷Ia ma ribaribana na tatao moutuana se lagelage, tau wa esana se tore Iuda, saudoudoi‐labui wa esau, i eda‐bagubagunaedi, i lau e Iesu gegesina eai ia bena i alagoiei.

⁴⁸Na Iesu i ribalau ia arinai, i ene, “Iuda e, Tau Natuna em alagoi ta arinai u morui?”

⁴⁹Isi se torogogo ia gegesina eai tatao edi nuatu se itayao, se ribalau Iesu arinai si ene, “Guiau e elepa eai ai lauelepai wa?”