LUKA 1:40-55

⁴⁰Sekaraia ena ruma dekenai ia daekau, Elisabeta dekenai ia hanamoa.

⁴¹Elisabeta ese Maria ena hanamoa hereva ia kamonai neganai, iena natuna be iena bogana lalonai ia roho, vadaeni Elisabeta ena lalona be Lauma Helaga ese ia hahonua.

⁴²Vadaeni ia hereva badabada, ia gwau, “Hahine ibounai edia huanai oi sibona be namo herea! Oi ese do oi havaraia merona danu be do ia namo bada herea!

⁴³Lauegu namo be dahaka, be lauegu Lohiabada ena sinana ese lau dekenai ia vadivadi inai?

⁴⁴Be, oiemu hanamoa ena mamina lauegu taiana dekenai ia vareai neganai, lauegu natuna be egu bogana dekenai ia roho, mai moale danu.

⁴⁵Abidadama hahinena e, oi namo vadaeni. Badina be Lohiabada dekena amo oi kamonai herevadia be do idia momokani.”

⁴⁶Vadaeni Maria ia gwau: “Lauegu lalona ese Lohiabada ia hanamoa noho.

⁴⁷Lauegu laumana danu be Dirava, egu Hamauria Tauna dainai ia moale bada noho.

⁴⁸Badina be lau, iena hesiai hahine ogogamina, ia laloa vadaeni, bona unai dainai, hari ela bona hanaihanai, taunimanima ibounai ese lau do idia hanamoa bada.

⁴⁹Badina be Siahu Diravana ese hoa kara lau dekenai ia havaraia vadaeni. Iena ladana be ia helaga.

⁵⁰Iena bogahisihisi be ia dekenai idia gari taudia ibounai edia latanai ia noho, bona edia natudia latanai danu nega hanaihanai.

⁵¹Iena imana ese iena goada ia hedinaraia vadaeni, bona hekokoroku taudia ia ese ia luludia idau gabu dekenai.

⁵²“Ia ese lohia taudia edia helai gabudia dekena amo ia doridia diho, to ogogami taudia be ia ese ia abidia isi vadaeni.

⁵³Hitolo taudia, ia ese gau namodia dekenai edia bogana ia hahonua vadaeni, to kohu momo taudia be ia ese imadia kavakava ia siaidia lao.

⁵⁴Iena hesiai besena Israela dekenai ia ese durua ia henia vadaeni, bona iseda sene taudia dekenai ia henia gwauhamata ia badinaia vadaeni.

⁵⁵Iena bogahisihisi ia henia noho Aberahamo bona iena bese taudia dekenai. Inai iena bogahisihisi kara do ia laloaboio lasi ela bona hanaihanai.”