San Lucas 1:40-55

⁴⁰Aheve aipo Zacarías rẽta pɨpe oiquese oso, oyapo “avɨrave” omu Isabel upe.

⁴¹Evocoiyase Isabel rɨe pɨpe omɨi imembrɨ iñehe renduse. Ahese Espíritu Santo oique Isabel avɨterve.

⁴²Ipare osapucai pĩrata aipo ehi chupe vorɨvetesave: —¡Tũpa nde rovasa cuña opacatu sui, iyavei osovasa nde membrɨ!

⁴³Noromohai eté che pɨri ereyu vaherã viña, che Yar sɨ.

⁴⁴Esepia, cheu “avɨrave” ereyapose, che membrɨ omɨi voi vorɨvetesave che rɨe pɨpe.

⁴⁵¡Sovasaprɨ ereico! Esepia, ereroya ité ñehesa ndeundar. Iyavei Tũpa omboavɨyera güemimombehu nde rese —ehi Isabel chupe.

⁴⁶Evocoiyase aipo ihese, “Che niha amboetei che Yar vichico;

⁴⁷cherorɨveté Tũpa che Pɨ̃sɨrosar rese.

⁴⁸Esepia, ahe omahe che rese che reco yemominisa pɨpe seroyasar che recosave. Co pɨpe suive, ‘Sovasaprɨ secoi’ ehira opacatu ava yuvɨreco cheu.

⁴⁹Esepia niha, Tũpa mbahe mboavaisarẽhɨ, oyapo mbahe tuvichá vahe cheu. ¡Tũpa imboeteiprɨ catu tasecoi yepi!

⁵⁰Ahe oiparaɨsuereco opacatu omboeteisar yepi.

⁵¹Nomboavai eté mbahe yapo. Osecoreroyɨ ava oyemboɨvate ai tẽi vahe.

⁵²Vɨroyɨ mborerecuar seco pĩrata vahe pĩratasa sui; ava seco mbegüemi vahe rumo osecomboɨvate.

⁵³Ava yaracua pota vahe, omboaracua; ava ‘che aracua vai’ ehi vahe rumo, nomboaracuai eté.

⁵⁴Oipɨ̃tɨvɨi niha opacatu vɨroyasareta judío yuvɨrecoi vahe. Esepia, ndasesarai eté poroparaɨsuerecosa mondo ãgua

⁵⁵güemimombehugüer rupi yande ramoi aracahendar Abraham upe, ichuindar upe avei yepi no” ehi vorɨvetesa pɨpe omu Isabel upe.