Luk 1:40-55

⁴⁰Navong rokol meteimal koanek, va neim en teim sen Sakaraea, ka vise Elsavet.

⁴¹Ka navong Elsavet long ren Meri, tivava onen kaikai en vangen. Evus, Ninin Votut mai sien Elsavet

⁴²ka kei viso keih vit, “!Tokolkatien onen Ahi mul enuk mulin ahin sav keil, ka tokolkatien onen mul en tivava koa mul en vangom!

⁴³Inau narvinvintei keke mama onen Asuv onak hemai hesao enau.

⁴⁴Nalong kilea en tounah enek veni navong nalonguk kovise nau, tivava onak si kei ka kaikai en vangok.

⁴⁵Tokolkatien onen Ahi mul enuk veni kokur anatin en selusien onen keke tounah enek hekistal enuk hesuval koa kei viteni minuk.”

⁴⁶Ka Meri viteni vit, “En rendemien onak, namul navati lat isen Ahi Asuv.

⁴⁷Nasi nau houlu ven Ahi onak koa mul mutut inau.

⁴⁸Kei en rovobongentei nau, avaseini navi ahin kuren toumien onen enges. Kosa heha, meatin vasi ihitehiteni keke Ahi rokol kat inau.

⁴⁹Ahi ten keihoen mumon marmari tounah keil minau ka isen vi votut.

⁵⁰Kei en mahis koakeil amul avouhou mini, koakeil aro kosa, ka koakeil imai ikatau veah.

⁵¹Ral min keihoen onen, Ahi mumon marmari tounah keil, ka likat rasilin koakeil akur rendemien ten hetetamenien mul en keil.

⁵²Kei lah lat asuv houlu keil ran vulie ten keihoen, ka vati lat meatin kuren keil esuk.

⁵³Navong meatin keil koa amai kat keil umai ven Ahi, mul san more anien min keil. Ka navong koakeil tounah one houlu umai veni, sila lin keil uva avi heite hon.

⁵⁴Kei mai san kataunien min me-Isrel keil koa aka en mari vatiamal onen avu Siekob telamu, koa vi meatin toumien onen. Kei mul kataun keil veni mundem kat hatkatien onen keke hetie lat enmahisien min keil.

⁵⁵Kei mum musil hatkatien keil koa mumoni ral min avu keil orer, min Ebraham ka min vatiamal keil onen koa avi me-Isrel keil. Hatkatien koanik onen sakras vavus.”