Luk 1:40-55

⁴⁰en Meri bin go streit langa det haus blanga Sekaraiya, en wen imbin kamat deya, imbin tok gudei langa det olgamen.

⁴¹Wal wen det olgamen bin irrim Meri bin tok gudei, det beibi insaid langa det olgamen binji bin jamp, en det Holi Spirit bin gowin langa det olgamen,

⁴²en det olgamen bin jingat adbala langa Meri, “God im laigim yu, en imbin pikimat yu brom ola najalot gel, en det beibi weya yu garra abum, im brabli speshalwan.

⁴³“Wal yubin meigim mi brabli gudbinji wen yu kaman iya, dumaji yu na mami blanga det brabli haibala Bos.

⁴⁴En wen aibin irrim yubin tok gudei, det beibi insaid langa mi bin jamp, dumaji imbin gudbinji.

⁴⁵En yu garra jidan gudbinji du, dumaji yubin bilib langa God, en ebrijing weya imbin dalim yu garra hepin truwan.” Lagijat na det olgamen bin tok.

⁴⁶Wal Meri bin tok na, “Mi preisimbat God det brabliwan Bos,

⁴⁷en mi brabli gudbinji langa im, dumaji im na bin seibum mi.

⁴⁸Nomeda mi nomo haibala gel, bat stil God bin jinggabat mi. Nomeda mi oni wekingel blanga im, bat stil imbin pikimat mi, en brom tudei na ola pipul ebriweya garra gulum mi Blesidwan.

⁴⁹Dei garra tok lagijat dumaji God bin dum loda gudbala ting blanga mi. God im brabli haibala, en im garram loda pawa. Im na det brabli Holiwan,

⁵⁰en im brabli kainbala langa ol detlot pipul brom ebri jinareishan hu rispek im.

⁵¹God bin shoum im pawa langa ol detlot pipul hubin reken miselp haibala en meigimbat olabat ronwan plen. Imbin shoum im pawa wen imbin deigidawei ola enijing brom olabat en meigim olabat lobala.

⁵²God bin meigim ola haibala king jidan lobala, en imbin lidimap ola lobala pipul langa haibala pleis.

⁵³Imbin lukaftumbat ola hanggribala pipul garram olkain gudbala ting, en imbin jandimwei ola ritj pipul nomo garram enijing langa olabat bingga.

⁵⁴God bin kipum det pramis weya imbin meigim langa wi grengrenfatha Eibrahem, en imbin albumbat ol detlot pipul langa dijan kantri Isreil hubin bulurrum im.

⁵⁵Imbin jinggabat det pramis weya imbin meigim langa Eibrahem en langa ola biginini blanga im en langa olabat biginini du. Imbin tok im garra kain langa olabat olagija, en imbin duwit na.” Lagijat na Meri bin tok.