LUKA 1:10-32

¹⁰a taunimanima iboudiai na murimuri ai e noho, e ḡuriḡuri.

¹¹Una negana ai, ia ese Lohiabada ena aneru ta e itaia, muramura mai bonana patana idibana kahana ai e gini.

¹²Sakaria ese e itaia, bena kudouna e hetaha, bona gari ese e butua tao.

¹³A aneru ese e hereva henia, eto, Sakaria, asio gari, badina be emu ḡuriḡuri vada e kamonai, adavamu Elisabeta ese natumu ta do baine abia, ladana ba hatoa IOANE.

¹⁴Ba moale, ba moale hisi dae, hutuma danu ia baine vara dainai bae moale.

¹⁵Badina be Lohiabada vairanai ia na baine herea; ia ese vine ranuna bona kekero muramuradia basine inu, bona dounu sinana bogana ai na Lauma Helaga ese baine rohea.

¹⁶Ia ese Israel memerodia hutuma baine hakerehaidia, Lohiabada, edia Dirava, bae lou henia;

¹⁷bona Lohiabada vairanai baine raka, Elia ena kara bona ena siahu heḡereḡerena. Tamadia lalodia natudia laloda ida baine hatamonadia; gwau-edeede taudia aonega baine henidia, kara maoromaoro taudia ai baela; bona bese ta baine abia heḡaeḡae, Lohiabada ena.

¹⁸Sakaria ese hari aneru e hamaoroa, eto, Ina na ede baina diba toma? Lau na iahu; adavagu danu vada e buruka.

¹⁹Aneru e helada hato, eto, Lau na Gabriel, Dirava vairanai na gini; ihereva-henimu bona ina harina namona ihamaorolaimu totona e siaigu.

²⁰Benaini, vada ba mu, basio hereva diba, ela bona ina hereva anina baine vara dinana, badina be egu hereva na tome abia dae; to, ena nega korikori ai do baine momokani.

²¹Taunimanima ese Sakaria e naria mase, bena e hoa, badina be gabu helaḡana ai e halahe.

²²Bena e raka lasi ai na asi hereva dibana. Bena lalodia e parara, ia na gabu helaḡana ai vada e mata hanai. Bena ia ese toa amo e hadibadia, vada e mu.

²³Ena ḡaukara dinadia e haḡuḡuru, bena ena ruma korikori ela.

²⁴Gabeamo, ia adavana Elisabeta vada e rogorogo, bena hua ima e noho hehuni;

²⁵eto, Lohiabada ese ini vada e karagu toma, ena ura negana vada eme haḡeregu, egu hemarai taunimanima vairadiai vada eme abia oho.

²⁶Hua ihatauratoina, Dirava ese aneru ladana Gabriel e siaia, Galilea hanuana ta ladana Nasaret ela.

²⁷Haneulato ta be unuseni ai, ia na David ena iduhu tauna ta, ladana losef, maohenina; haneulato ladana be Maria.

²⁸Aneru na ia dekenai e raka vareai, eto, Ba mauri, e lalokau henimumu hahinemu! Lohiabada ese baine bamomu.

²⁹Una hereva dainai ia na kudouna e hetaha, bona lalona e haguhi, una hahenamo anina be dahaka.

³⁰A aneru ese e hamaoroa, eto, Maria e, asio gari, badina be Dirava ena harihari ome abia.

³¹Oi na do ba rogorogo, mero ta bavabia, ladana ba hatoa IESU.

³²Ia na baine herea dae, Herea Mikamika Natuna bae gwauraia; Lohiabada Dirava ese tamana David ena terono na baine henia;