Ruka 1:10-32

¹⁰Moro myhto oximõmãkõ oturũko roropa toh kynexine Ritonõpo a ixtaratu panõ zatyryhtao.

¹¹Morarame Ritonõpo nenyokyhpyry toeporehkase. Tõsenepose eya. Xikihme kynexine ixtaratu zahkatoh apotunuru wino.

¹²Mokyro eneryke Zakaria a kynoserehne. Kynenaroxitapane roropa ynororo.

¹³Yrome ynara tykase Ritonõpo nenyokyhpyry eya, —Enaromyra exiko, Zakaria. Õturutopõpyry totase Ritonõpo a mana, poeto poko. Morara exiryke opyty poetoẽme exĩko mana. Enurũko mana, orutuame. Morara exiryke Joãome esehpako.

¹⁴Tãkye exĩko matose mokyro enurusẽ poko. Imehnõ roropa tuhkãkõ tãkye exĩko mã toto.

¹⁵Imehxo mokyro enẽko Ritonõpo mana. Naeroro eukuru jehnahpyry onẽpyra monehtane. Ritonõpo zuzenu imaro exĩko mana aenurutopõpyry poe ro.

¹⁶Tuhkãkõ Izyraeu tõ Ritonõpo poko enetupuhpõko ropa mana, toto esẽme enetupuhpõko ropa mana aomipona toto ehtohme.

¹⁷Osemazuhme ytoytõko mana Kuesẽkõ oehtãne. Orẽpyra roropa exĩko mana. Ritonõpo zuzenu imaro, urutõ Eria maro ehtopõpyry saaro. Aomiry etaryke tyya xine typoenõke exiketõ mã typoenõ tõ maro oxiehno pyra exĩko ropa mã toto. Aomiry etaryke roropa tyya xine Ritonõpo omipona pyra exiketõ mã tyyrypyrykõ se pyra exĩko mã toto. Zae toexirykõ se rokẽ exĩko mã toto. Aomiry etaryke tyya xine Kuesẽkõ poetory to tosẽkõ oepyry eraximapitõko mã toto, tykase Ritonõpo nenyokyhpyry eya.

¹⁸Yrome ynara tykase Zakaria Ritonõpo nenyokyhpyry a, —Emũkuãkohxo nary ke hano? Oty rĩkohxo hko hmã oenetupuhtohme ya? Tamuxime reh toehse ahse. Kunumixime roropa kuh ypyty mah, emũkuapỹme, tykase Zakaria eya.

¹⁹Mame ynara tykase Ritonõpo nenyokyhpyry Zakaria a, —Ywy ase Kapirieu, Ritonõpo ẽpataka exikihmakety ase. Eya tonyohse ywy ourutohme, tõmiry kurã ekarotohme oya repe.

²⁰Yrome jomiry ajohpã sã menetupuhno. Emero tyrĩko Ritonõpo mana jomihpyryae ro. Onenetupuhpyra oexiryke tõmire pyra exĩko mase ipunaka. Mynyhme rokẽ mase exĩko omũkuru enurutoh ponãmero, tykase Ritonõpo nenyokyhpyry eya.

²¹Morarame oximõmãkõ Zakaria eraximãko toh kynexine. Osenetupuhnõko toto, —Oty pokohkoh okynã nae, Ritonõpo maro oturutoh tao? tykase toto oxime rokene.

²²Morarame tutũtase ropa tahtao, toto anaomiropyra kynexine, tõmikehse toexiryke. Mame Ritonõpo maro oturutoh tao Ritonõpo nenyokyhpyry enetopõpyry eya tonetupuhse eya xine. Mame tõmikehse toexiryke tomary ke rokẽ mokaro turuse ropa Ritonõpo nenyokyhpyry oehtopõpyry poko.

²³Morarame toerohtoh poko tõtyhkase tahtao Ritonõpo maro oturutoh tao, toytose ropa ynororo tytapyĩ taka.

²⁴Moromeĩpo ipyty Izapeu poetoẽme toehse. 5me nuno taropose eya tũtara tytapyĩ tae.

²⁵Ynara tykase ynororo, —Kure Ritonõpo jyrĩko ropa mana. Ihxipỹke exiase. Jemũkuatohpopyra kunumixime toehse. Yrome jehtopõpyry tymyakãmase tãkye jehtohme poetoẽme jexiryke, tykase tyya rokene.

²⁶Morarame 6me nuno Izapeu tuesapare ahtao Kapirieu tonyohse ropa Ritonõpo a, Nazare pona, Karirea rãnaka.

²⁷Nohpo zurutohme tonyohse mokyro Ritonõpo nenyokyhpyry, orutua kõ poko exipitopỹ zurutohme oryxi. Mokyro esety Maria kynexine. Joze nerenanopyry kynexine. Tawi parỹpyryme kynexine Joze.

²⁸Morarame nohpo a toytose Ritonõpo nenyokyhpyry. —Oehno kene! tykase. —Oserehpyra ke exiko orymo. Kuesẽkõ amaro mana, kure rokẽ oriry se mana. Opyno mana, tykase ynororo eya.

²⁹Mame Ritonõpo nenyokyhpyry eneryke tyya, aomiry etaryke roropa tyya torẽtyke toehse Maria. Toemynyhmase. “Otara nyka hko hmose?” tykase tukurohtao.

³⁰Ynara tykase Ritonõpo nenyokyhpyry eya, —Enaromyra exiko, Maria. Opynanohnõko Ritonõpo mana.

³¹Poetoẽme exĩko mase. Emũkuãko mase orutuame. Jezume ke mesehpatase.

³²Tuisamehxo exĩko mana. Ritonõpo mũkuru imehxo exiketyme esehtõko imehnõ mana. Emero esẽme tyripõko roropa Kuesẽkõ Ritonõpo mana. Tytamuru Tawi ehtopõpyry sã exĩko mana.