Luka 1:10-32

¹⁰Ebu Zakariaꞌa uvahu hohoḡa hufiꞌeteꞌe habaꞌa zamaḡa diuḡiro zu vaze ḡuḡuvaḡaꞌe kuru neḡa enoneo kurau radiunu.

¹¹Eꞌe zamaḡano Zuhiꞌa Boro tuḡure vigaꞌa* Zakaria mazao fureraro. Aniꞌe uvahu hohoḡa hufiꞌeteꞌe fataḡa edaꞌe moneo edaro.

¹²Ebu Zakariaꞌa eꞌe horonirotene, viga deꞌoniro zu rihau rudaro.

¹³Rehano tuḡure vigaꞌa niro, raenaꞌa, “Zakaria! Ago rihanoꞌi! Badiꞌaꞌa ḡae kuru igiro, eꞌanoꞌo ḡa inugo Elisabetaꞌe ubugo ꞌahoga fureniꞌuma. Ebu niḡaꞌe Ioane rae turahoꞌi!

¹⁴Ḡaꞌe ani uꞌano matuꞌe rudaꞌuma, ebu vaze ḡehaḡa zuni aneꞌa fureranateꞌe moneo matuꞌiꞌuma.

¹⁵Mazaḡa aniꞌe Zuhiꞌa Boro zamao niḡa boro reꞌuma. Ebu vaini vuḡa zu vu sauꞌa mene gagiꞌuma. Zu viꞌa isi zamaḡanonoꞌo Vine Zaḡoḡaniꞌa ani ibito haꞌuma.

¹⁶Aniꞌe Isaraela azaḡa ḡehaḡa sauꞌazeonoꞌo mae ḡihuzadu Zuhiꞌa Boro zeḡe Badiꞌa vaḡe tutuze onaiꞌuma.

¹⁷Ani viga zu gigiꞌaḡaꞌe peroveta vazeḡa Elia teigiꞌuma. Aniꞌe Zuhiꞌa Boro izema onaogano onaiꞌuma. Ebu Moga zu ubuḡa zamaze mae tibuzifine danaziꞌuma. Zu Badiꞌa mene hegoteꞌeteꞌe azaḡaꞌe duduḡa azaḡa horozadu Badiꞌa hegotifine tutuziꞌuma, ebu vazeꞌa Zuhiꞌa Boro veize ruhibifine ihoziꞌuma.”

¹⁸Zakariaꞌa tuḡure viga niro, raenaꞌa, “E voureha ebu eḡe roḡae zuni voureha. Ḡae ḡoereꞌa fureraꞌumaꞌe, e nougenouge ederiꞌuma?”

¹⁹Ebu tuḡure vigaꞌa naenaeninaꞌa, “Eꞌe Gabiriera. Eꞌe Badiꞌa zamao edauꞌenaꞌa, tuḡure igiꞌeteꞌe aneruḡa. Badiꞌaꞌa ḡae hari manoḡa ꞌadi ḡouga radu eḡe tuḡuheha.

²⁰Ḡianoꞌi! Madaḡaniꞌa onaine, eḡeꞌa rateꞌe ḡoeꞌa huganiꞌa fureraꞌuma. Mazaḡa ḡaꞌe eḡe ḡoere mene mae ḡihinateꞌe uꞌano, ḡaꞌe ḡoeroga mene idaraꞌuma, onamo ḡae ubugoꞌa fureraꞌuma.”

²¹U vaze ḡuḡuvaḡaꞌe enonao Zakaria guhiniꞌenaꞌa, ani nougadu kuru neḡa zamaḡano faḡahune radiuꞌohe rae zamarinu.

²²Ebu Zakaria kuru neḡanonoꞌo buarotene, ani ze ḡorezoga mene idararo. Ani ꞌevore hina daꞌo ḡorezido, zu hebeꞌaꞌe adudaro. Eꞌanoꞌo zeꞌe aniꞌa kuru neḡa zamaḡano iḡunu teiḡe horoniroteꞌe ederiro.

²³Ebu Zakaria kuru neḡano Badiꞌa mazao gaueꞌeteꞌe madaḡa hauḡirotene, Ierusalema habaꞌa modadu neḡa onamiro.

²⁴Eꞌe enogano ani inuga Elisabetaꞌe ene tiro, ebu bato fuꞌo ani neo radiunu.

²⁵Ani raenaꞌa, “Zuhiꞌa Boroꞌa danahadu e ene teha! Ene mene meiroteꞌe mazagaroḡa izidi Zuhiꞌa Boroꞌa mae vaḡineha!”

²⁶Elisabetaꞌa ene tiroteꞌe enogano bato 6 radirotene, Badiꞌaꞌa tuḡure viga Gabiriera Galilea habaꞌa Nazareta neḡano Maria vaḡe ovoe tuḡuniro.

²⁷Mariaꞌe ohoze teite ize mene baziroteꞌe nogobaḡa. Aniꞌe Davida mariga vazeḡa ꞌahoga niḡa Iosefa teite iraꞌauniro.

²⁸Gabirieraꞌa Maria vaḡe onairotene, ani niro, raenaꞌa, “Badiꞌaꞌa manoḡa ḡanateꞌe roḡaeḡa! Matuꞌoꞌi! Zuhiꞌa Boroꞌe ḡae teite radiuꞌohe.”

²⁹Maria ani eꞌe igirotene, zaguzagaro zu adaꞌadaniro, ebu 'Ḡoere ꞌadi hugaꞌe nagini?' rae zamarinu.

³⁰Ebu tuḡure vigaꞌa ninaꞌa, “Maria! Ago rihanoꞌi! Mazaḡa Badiꞌaꞌe ḡae mazao matuꞌeꞌohe.

³¹Ḡianoꞌi! Ḡaꞌe ene teꞌadu ubugo ꞌahoga fureniꞌuma ebu niḡaꞌe Iesu rae turahiꞌuma.

³²Aniꞌe niḡa boro reꞌuma ebu vazeꞌa aniꞌe Badiꞌa ḡihiꞌa ubuga rae reꞌuma. Ebu ane vouḡa kini Davida teige, Zuhiꞌa Boro Badiꞌaꞌa aniꞌe kini rae reꞌuma.