Lucangundru 1:10-32

¹⁰Ja kana wrolara palarani terkana wonti ngatjila kuli ngumuja ditjini.

¹¹Ja Kaparaia angela kulno mmkangu wondraterina wonti, nau turutupu Altaraia ngunarani terkana wonti.

¹²Ja Zachariali nina najina, nau ngarrana wonti ja japali pantjina wonti.

¹³Angela nunkangu jatana wonti: “Wata japali nganau Zachariajai, ngangau ngatjina jinkani ngarana warai, ja noajeli jinkanali jinkangu kanku dankala nganai, ja jundru tala nunkani dikala nganai: Johannes.

¹⁴Ja jundru mankina ja mujla ngamalkala nganai, ja marapu mankila nganai nunkani dankanandru,

¹⁵Ngangau nau pirna nganala nganai Kaparani; ja waina ja tapana ngurunguru nulu wata tapala nganai, ja Jaolali kulikirieli nau manamiri pantjila nganai nimkani ngandri mandrandru.

¹⁶Ja nulu Israelaia ngatamura marapu karitjimalkala nganai Kaparani Godani tananani.

¹⁷Ja nau nunkangu ngopera wapala nganai Eliaia jaolali ja ngurungurulali, ngaperi woraia ngara kupa worani, ja delkinietja talkulaia kirilani karitjimalkala, Kaparani kana wolara talku ngankingala.”

¹⁸Ja Zacharias angelani jatana wonti: “Worderu ngato jenia ngujamananto? Ngangau ngani pinaru, ja noa ngakani nankani ditji marapuni wiringana warai.”

¹⁹Ja angelali kalabana wonti ja nunkangu jatana wonti: “Ngani Gabrieli nganai, nauja Godani terkai, ja Nulia ngana jinpana warai, jinkangu ngankamalinanto, ja ninapini ngantjani jaura jinkangu kaukaubananto.

²⁰Ja mai, jidni ngapurila nganai ja ngandandarila nganai jatala nunkangupini ditjielu, nunkangupini jenia morlalu pantjila, nganai; ngangau jundru jaurani ngakanani wata morlalu ngundrana warai, tanaia morlalu pantjila nganai ditjini tananani.”

²¹Ja kana wolarali kalkana wonti Zachariangu, to tana ngaruparana wonti, ngangau nau juri ngamana wonti Godaia pungani.

²²Nau matja dunkana kurana, nau ngandandarina wonti tanangu ngankamalila, ja tanali ngujamana wonti, nulu mudla Godaia pungani najina warai, ja nau tanangu marali wondraterina wonti ja ngapu nganana wonti.

²³Ja jendranguta ngankana ditji nunkani matja mudana, nau tikana wonti pungaia nunkanaia.

²⁴Tanangupini ditjini ngadani, Elisabeth noa nunkani mandrantjurina wonti; ja nani kurukuru ngamalkaterina wonti pira mara wora, ja jatana wonti:

²⁵“Jeruja Kaparali tanangupini ditjini ngakangu ngankana paraia, tanangu Nulia ngana najina, ninta ngakani kanandru manila.”

²⁶Pi rani mara wora ja kulnuni G-odali angela Gabriel jinpana wonti ngura kulnuja Galilaiaia, tala nunkani Nazaret.

²⁷Mankara kulnuni, nandru talpadakana wonti materi kulnuni, tala nunkani Joseph, Davidani pungandru; ja mankaraia tala Maria nganana wonti.

²⁸Ja angela nankangu wirina wonti ja jatana wonti: “Murlali nganamai murlamaninietjajai; Kapara jinkangunto, jidni murlali pirna nganai widlani!”

²⁹Nandru nina najina, nani ngaruparana wonti nunkani jaurandru, ja ngundraterina wonti, mina mandurini jaura jenia nganai.

³⁰Ja angela nankangu jatana wonti: “Wata japali nganau Mariajai; ngangau jundru manjula mankamankana warai Godani.

³¹Ja mai, jidni mandrantjurila nganai, ja kanku kulno dankala nganai, ja tala nunkani dikala nganai: “JESUS.”

³²Naupini pirna nganala nganai, ja tanali nina Kapara pirnaia Ngatamura dikala nganai, ja Goda Kaparali nunkangu jinkila nganai ngaperaia nunkanaia Davidani pirnalaia piri.