LUCAS 1:10-32

¹⁰Goxyaal co nolaadz me leṉ yadoo, laa grë miech ne ndxie nëz ley nonabgaa lo Dios,

¹¹tibaque zeeṉe brieequia tib xanjl Dios bzo cue pcoog nëz derech, zaatne nozëëg me yaal ga.

¹²Zeeṉe goṉ me anjl co bdzieb me, rdzieldraa me zha guṉ me lo dzeb co.

¹³Dzigo rëb anjl co lo me: ―¡Gdzieebd luu! Diidzse ziaḻnie naa lo luu, gacnaṉ luu gaṉle miṉe bnab luu lo Dios ga, pquiaadiag mew; gane niina laa tsieel luu gap tib mëëdbgui. Zeeṉe gal win, Juan cueelë to win.

¹⁴Tib guieḻbley nroob gac win lo to, niicle lo grëragaa miecha,

¹⁵sac tib meṉ nziuu gac win lo Dios. Zeeṉe gac win zha broob, ni tib ro nziu guied win, per ni vin yquiaarod win; ansraa gal win, laa Espíritu Sant nacniele win.

¹⁶Win gac meṉ ne co guic nzian grë zha Israel, gbiire gbig zho lo Dios, meṉ ne rnabey zho.

¹⁷Zigne goc Lí, meṉ ne biaad pteed xtiidz me padzeela, sca gac win tedner win lo me, nroob poder ne gap win. Win gnee lo grë miech rii, gbiire gleynie zho me zigne goc xmeṉgol zho zha ne bleynie me; csaan zho grë xquieḻntseeb zho, gban zho zigne racladz me; zeeṉa niowse gac zho ycaania zho me.

¹⁸Pquiab Zacarí rëb Zacarí lo anjl co: ―¡Ncuaaṉe gacd i goṉ rnee luu! Zigtaa naaw, zigtaa tsieel naaw, meṉgol-le nac no.

¹⁹Rëbchaa anjl co: ―Bieṉ gaṉle anjl Gabriel nu quianee lo luu, anjl ne tibaque zo lo Dios. Me pxeeḻ naa ziaḻnie naa diidz rii.

²⁰Per ne squi rliladzd luuw, na laa luu guiaaṉ ngop, haxta gaḻ dze ne gac miṉe rne naa lo luu nu, dze co glan xtiidz luu stib.

²¹Grë miech ne ndxie quianab lo Dios ga, quiambëz zho Zacarí, rnabdiidzlsa zho pe goc me, sac raṉ zho rrieed me zaatne ziezëëg me yaal ga.

²²Zeeṉe briee me, goṉ zho gacdraa gnee me, dzigo bieṉ zho no pe blu Dios lo me ga. Teḻ pe racladz me gnee me, niapse señ rlu me.

²³Bzase dze ne beeṉ me dziin leṉ yadoo, dzigo laa me zey lidz me.

²⁴Goca bla ngbidz, laa mëëd co pquialo zdoo tsieel me. Dipse leṉ gaay mëë bio zhuz co ro yu, ib brieed me, rley me rnee me:

²⁵―¡Zha wentaa Dios, bneedz me diidz bdziṉ dze yquianie naa mëëd rii, zeeṉa gzhidzniedraa miech naa!

²⁶Goc xoop mëë zoney Lisabet mëëd, pxeeḻ Dios anjl co stib güey me Nazaret, guiedz ne ndxie xtan zha Galilé.

²⁷Ga no tib ndzoop nguieg lë Marí, leṉ dze co no xtiidz ndzoop co ctsieelnia ndzoop tib zha xtii rey David, lë José.

²⁸Bdziṉ anjl co zaatne no ndzoop, pquiaabdiuzh me ndzoop, rëb me: ―¡Dichos luu goṉ, sac tib zha nziuu nac luu lo Dios! Me quianap luu.

²⁹Zeeṉe goṉ Marí anjl co, ni goṉ Marí zha rnee me, bzee zdoo Marí, rieṉd Marí dieṉ pe nac scataa rzë xtiidz me.

³⁰Dzigo rëbchaa me lo Marí: ―¡Gdzieebd luu! Laa Dios goṉ bzooblo luu ygaa luu tib guieḻnzaac nroob.

³¹Zdoo luu yquiaalo tib mëëdbgui, zeeṉe laa win gal, JESUS cueelë luu win.

³²Tib meṉ nroob gac win, zieṉ miech gaṉle Xpëëd Dios ro ne no gbaa nac win; ni so me win gnabey win zig bnabey xmeṉgol win David.