Luka 19:5-40

⁵A ked o Isus reslo adari, dikhlja upre hem phenđa lese: “Zakej, hulji sigate! Avdive valjani te ovav ano to čher.”

⁶I o Zakej huljilo sigate hem anđa le čhere kora peste radosno.

⁷Sa o manuša kola dikhle adava vaćerde e Isusestar so na valjanđa te džal te bešel e grešnikoja lese ano čher.

⁸A o Zakej terdino hem phenđa e Gospodese: “Ače, Gospode, ekvaš oto barvalipe mlo ka dav e čororenđe, a te nekas prevarinđum, ka irinav lese štar puti više.”

⁹A ko adava, o Isus phenđa lese: “Avdive alo o spasenje ano akava čher, adalese soi hem o Zakej potomko e Avraamesoro.

¹⁰Me, o Čhavo e Manušesoro, aljum te rodav hem te spasinav e našalden!”

¹¹But manuša šunena ine adava so o Isus vaćerđa. I sar o Isus inele paše uzalo Jerusalim, o manuša mislinde da o carstvo e Devlesoro otojekhvar ka mothoj pe. Adalese o Isus phenđa lenđe pana jekh paramiz:

¹²“Inele jekh ugledno manuš kova spremisalo te džal ki durutni phuv koro jekh baro vladari kova ka čhivel le zako caro upri lesiri phuv, a palo adava te irini pe čhere.

¹³I vičinđa ple deše slugen, dinđa len po ekvaš kilo srebro hem phenđa lenđe: 'Ćeren buti adaleja đikote na avava.' I dželo ko drom.

¹⁴A o manuša oti lesiri phuv mrzinde le i bičhalde pumare manušen koro baro vladari vaćerindoj: 'Na mangaja akale te ovel amaro caro.'

¹⁵Ked o ugledno manuš irinđa pe sar caro, terinđa te vičinen koro leste okole slugen, kolenđe dinđa love, te dikhel kobor zaradinde.

¹⁶O prvo sluga alo vaćerindoj: 'Gospodarona, oto love save dinđan man, ćerđum deš puti edobor.'

¹⁷I ov phenđa lese: 'But šukar. Tu injan šukar sluga! Adalese so injanle maje verno ko najxari, dava tut te vladine upro deš dizja!'

¹⁸O dujto sluga alo vaćerindoj: 'Gospodarona, oto love save dinđan man, ćerđum pandž puti edobor.'

¹⁹I lese phenđa: 'Dava tut te vladine upro pandž dizja!'

²⁰Aver sluga alo bizi zarada vaćerindoj: 'Gospodarona, ače te love save dinđan man. Garavđum len ano jekh kotor e šejengoro.

²¹Ćerđum ađahar adalese so darandiljum tutar so injan strogo manuš. Leja so nane klo hem čedeja so avera manuša sejinđe.'

²²A ov phenđa lese: 'Tu na injan šukar sluga! Palo kle lafija ka sudinav tut. Te džanđan so injum strogo manuš, da lava so nane mlo hem čedava so avera sejinđe,

²³sose onda na dinđan mle love ki kamata? Đi akana ka ovel man ine zarada savi ka lav ine avindoj čhere.'

²⁴Tegani phenđa okolenđe kola terdine uzalo leste: 'Len akale slugastar o love hem den la okolese kas isi deš puti edobor!'

²⁵A on inele protiv hem phende: 'Ali, gospodarona, ole već isi pandž kilja srebro.'

²⁶O caro phenđa: 'Vaćerava tumenđe da đijekhe kas isi, ka del pe lese pana, a okole kas nane ka lel pe lestar hem okova xari so isi le.

²⁷A okolen mle dušmanjen, so na mangle te ovav lengoro caro, anen akari hem čhinen len angla mande!'”

²⁸I ked vaćerđa lenđe adava, o Isus dželo nakoro Jerusalim phirindoj anglo ple učenici.

²⁹Ked alo paše uzalo gava Vitfaga hem Vitanija, uzali gora vičimi E maslinakiri, bičhalđa duje učenikonen

³⁰vaćerindoj: “Džan ko adava gav savoi angla tumende. I ked ka đerdinen, ka arakhen phandle terne xere upro koleste pana nijekh manuš na beštino. Phraven le hem anen le akari.

³¹Te neko pučlja tumen: 'Sose phravena le?', vaćeren lese: 'E Gospodese valjani.'”

³²On džele hem arakhle ađahar sar so phenđa lenđe o Isus.

³³I sar phravena ine e terne xere, o manuša, kasoro inele o terno xer, pučle len: “Sose phravena e terne xere?”

³⁴A on phende: “E Gospodese valjani.”

³⁵I ande e xere anglo Isus. Čhivde pumare fostanja upro xer hem pomožinde e Isusese te uštel upro leste.

³⁶I sar džala ine anglal bešindoj upro xer, o manuša dinde le čast ađahar so buljarena ine pumare fostanja upro drom anglo leste.

³⁷A ked alo paše uzali nizbrdica E maslinakere goratar, sa o učenici so inele adari lelje radosno hem oto sa o glaso te slavinen e Devle zako sa o čudesija save dikhle:

³⁸“Blagoslovime o Caro kova avela ano anav e Gospodesoro! Nek ovel mir ano nebo hem slava e Devlese ko učipe!”

³⁹Tegani nesave fariseja, kola inele maškaro lende, phende e Isusese: “Učitelju, phen kle učenikonenđe te na vaćeren adava.”

⁴⁰A o Isus phenđa lenđe: “Te trainde on, o bara ka vičinen slavindoj!”