Luk 19:5-40

⁵Ntɛ Yesu ɛmbəp kətɔt kaŋkɔ dəntɔf mɔ, k’eyekti fɔr k’ɛnəŋk fum nwɛ, k’oloku kɔ: «Sasey məkufɛ mətor; bawo nde kəlɔ kam iŋkɔ mɔkɔ iyi.»

⁶Kɔ Sasey ɛmbɛlkər kətor, k’ɛmbaŋ Yesu pəbotu disrɛ.

⁷Ntɛ afum ŋanəŋk ti mɔ, kɔ ŋayɛfɛ kəcɔpɛnɛ, ŋac-loku: «Ndena fum wəciya ɔŋkɔ pəyi.»

⁸Mba Sasey nwɛ ɛnacəmɛ wəbɛ fɔr kiriŋ mɔ, oloku: «Wəbɛ, indesɔŋ atɔyɔ daka dacɔ da kəsɔtɔ kem; nwɛ o nwɛ inanaŋkanɛ kəbaŋər pɛlarəm mɔ, indesɔŋ wəkayi kəmaŋkəlɛ ka tɔkɔ inabaŋər kɔ mɔ.»

⁹Kɔ Yesu oloku kɔ: «Mɔkɔ, Kanu kəyac aka kəlɔ kaŋkɛ, bawo məna sɔ wəka Abraham məyɔnɛ!

¹⁰Bawo Wan ka fum ender kədetɛn kɔ kəyac ka aŋɛ ŋanasɔlɛ mɔ.»

¹¹Afum ŋayi kəcəŋkəl Yesu. Kɔ Yesu ɔnɔcər capafɔ cəlɔma, bawo ŋanalɔtərnɛ Yerusalɛm, afum ŋac-cɛm-cɛmnɛ a dɛbɛ da Kanu dɔŋkɔwur gbəŋcana babɔkɔ.

¹²Kɔ Yesu oloku: «Fum wətɔt tokom wɔlɔma, ɛnayɛfɛ k’ɔŋkɔ atɔf ŋobol-bolu kəkɔ-tɛn dɛbɛ a pədeder.

¹³Kɔ fum nwɛ ewe acar ɔn wəco, k’ɔsɔŋ ŋa nwɛ o nwɛ kɛmɛ kəpɔŋ kin, k’oloku ŋa: ‹Nəc-kafəlɛ-kafəlɛ ki waca haŋ ic-der.›

¹⁴Mba afum aka dare dadɔkɔ ŋanater kɔ, kɔ ŋasom kəkɔ-loku nde fum nwɛ ɔŋc-kɔ kətɛn dɛbɛ mɔ: ‹Səfaŋ fɛ a fum wəkawɛ pəyɔnɛ su wəbɛ!›

¹⁵Kɔ fum nwɛ ɔŋkɔ pəsɔtɔ dɛbɛ, ntɛ olukus mɔ, k’ewe acar ɔn aŋɛ wəco kədecərɛ ntɛ nwɛ o nwɛ ɛŋkafəli-kafəli waca mɔ.

¹⁶Kɔ wəcar wəcɔkɔ-cɔkɔ ender, k’oloku: ‹Wəbɛ, isɔtɔ wəco wa kɛma kəŋkɔ mənasɔŋ’im mɔ.›

¹⁷Kɔ fum nwɛ oloku: ‹Tentesɛ, wəcar wətɔt məyɔnɛ, bawo məlomp teta tes tɛfɛt, indesɔŋ sədare wəco məyɔnɛ wəbɛ kəŋan.›

¹⁸Kɔ wəcar wəka mɛrəŋ ender, kɔ wəkakɔ oloku kɔ: ‹Wəbɛ, kəcamət ka kəŋkɔ mənasɔŋ’im mɔ, k’isɔtɔ.›

¹⁹Kɔ fum nwɛ oloku sɔ wəkakɔ: ‹Isɔŋ’əm sədare kəcamət, məyɔnɛ wəbɛ kəŋan.›

²⁰Kɔ wəlɔma ender pəloku: ‹Wəbɛ kɛma kam kəŋkɛ, inafɔktər ki dəkəloto kətɔt imɛŋk.

²¹Bawo inanes’am ntɛ məŋcuca mes mɔ: Məŋlɛk mpɛ məntɔboc mɔ; mətɛl nde mənatɔ-bɔf mɔ.›

²²Kɔ fum nwɛ oloku wəcar kɔn: ‹Moloku mam m’ indekit’əm, məna wəcar wəlɛc! Mənacərɛ a iŋcuca; k’iŋlɛk mpɛ intɔboc mɔ, ic-tɛl da intɔbɔf mɔ.

²³Ak’ ɛnasɔŋɛ ntɛ mənatɔ-bɔs-bɔsər pəsam pem mɔ, kɔ ntɛ ilukus mɔ, k’iŋkɔ ibaŋ pi padeŋərɛn’em kəntaŋgbɛ?›

²⁴K’oloku afum akɔ ŋanayi di mɔ: ‹Nəbaŋər kɔ kɛma kaŋkɔ nəkenɛ ki wəkɔ ɔsɔtɔn’em wəco mɔ.›

²⁵Kɔ afum ŋaloku: ‹Wəbɛ, wəkakɔ ɔsɔtɔ wəco!›

²⁶Kɔ fum nwɛ oloku ŋa: ‹Ic-lok’un: Məna nwɛ məyɔ mɔ, ambɛrɛnɛ sɔ məna wəkayi. Mba məna nwɛ məntɔyɔ mɔ, ambaŋər’əm ali depic pɔkɔ məyɔ mɔ.

²⁷Ta mɛrəŋ tayi, nəkɛr’em ater’em aŋɛ ŋanatɔ-faŋ a iyɔnɛ ŋa wəbɛ mɔ, nəfay ŋa mera fɔr yem kiriŋ.›»

²⁸Ntɛ Yesu elip kəloku afum moloku mamɔkɔ mɔ, k’osumpər dɔpɔ afum kiriŋ kəkɔ Yerusalɛm.

²⁹Ntɛ Yesu ɔlɔtərnɛ sədare sa Bɛtfase kɔ Betani mɔ, kəca ka tɔrɔ tɔkɔ aŋwe Tɔrɔ ta Olif mɔ, kɔ Yesu osom acɛpsɛ ɔn darəŋ mɛrəŋ.

³⁰K’oloku ŋa: «Nəkɔ nde dare ndɛ antɛfərnɛ mɔ, kɔ nəŋkɔbɛrɛ-ɛ, nəŋkɔbəp di sɔfale səfɛt pakot si, nsɛ fum o fum ɛntatɔ-ndɛ mɔ. Nəsikəli si, nəkɛrɛ.

³¹Kɔ fum eyif nu: ‹Ta ake tɔ nəŋsikəlɛ si-ɛ?› Nəloku kɔ gbəcərəm: ‹Bawo Wəbɛ ɛfaŋ si.›»

³²Kɔ afum aŋɛ anasom mɔ ŋaŋkɔ, kɔ ŋaŋkɔ ŋabəp sɔfale səfɛt pakot si pəmɔ tɔkɔ Yesu ɛnaloku ŋa mɔ.

³³Ŋayi kəsikəli sɔfale səfɛt, kɔ asərka ŋayif ŋa: «Ta ake tɔ nəŋsikəlɛ sɔfale sasɔkɔ-ɛ?»

³⁴Kɔ acɛpsɛ ɔn darəŋ mɛrəŋ aŋɛ ŋaloku aka sɔfale: «Wəbɛ ɛfaŋ si.»

³⁵Kɔ afum aŋɛ ŋaŋkenɛ Yesu sɔfale səfɛt nsɛ, kɔ ŋandeŋəsər si suma səŋan, kɔ Yesu ɛndɛ si kəroŋ.

³⁶Tɔkɔ ɔŋc-kɔ kiriŋ mɔ, itɔ afum ŋaŋc-perɛ kɔ suma səŋan dɔpɔ.

³⁷Ntɛ ŋalɔtərnɛ Yerusalɛm nde pətəmbələr pa Tɔrɔ ta Olif mɔ, kɔ pəmbɔt kənay kəŋkɔ kənacɛpsɛ kɔ darəŋ mɔ fəp. Kɔ ŋayɛfɛ kəkor-koru Kanu pəpɔŋ, bawo ŋananəŋk mes mɛwɛy-wɛy mmɛ Kanu kəmmentər mɔ.

³⁸Kɔ ŋac-loku: «Kanu Kəpɔŋ kəpocɛ pətɔt wəbɛ nwɛ enderɛnɛ tewe tɔn mɔ! Pəforu peyi dareŋc, kɔ pəmot pa pəlel pa dɛbɛ dɔn peyi dareŋc!»

³⁹AFarisi akin akin akɔ ŋanayi kənay kaŋkɔ dacɔ mɔ, ŋaloku Yesu: «Wəbɛ, məloku acɛpsɛ am darəŋ ŋacaŋk!»

⁴⁰Kɔ Yesu oloku ŋa: «Kɔ ŋaŋcaŋk-ɛ, masar moŋkulɛ-kulɛ!»