Luka 19:5-40

⁵Thaj kana avilo o Isus ke gova than, dikhlja le upre, thaj vačarda lese: “Zakhej! Ulji sigate! Avđive trubul te avav ane ćo čher.”

⁶Thaj o Zakhej sigate ulilo taro kaš, thaj anda le an po čher radosno.

⁷Thaj savore, kana dikhlje e Isuse, vačarde maškar peste kaj avilo ano čher e grešnikose.

⁸A o Zakhej ačhilo thaj vačarda e Rajose: “Rajo! Ak opaš mo barvalipe ka dav e čororenđe, thaj ako nekas phabardem ka iriv lese štar droma po but.”

⁹A o Isus vačarda lese: “Avilo avđive spasenje kale čherese, golese kaj si i kava čhavo e Avraameso!

¹⁰Golese kaj me o Čhavo e Manušeso aviljem te rodav thaj te spasiv so si hasardo.”

¹¹But manuša gova šunde thaj o Isus vačarda lenđe vađi jekh paramič, golese kaj sesa pašo Jerusalim, thaj dije gođi kaj akana ka avol o carstvo e Devleso.

¹²Vačarda gijate: “Jekh manuš tari prešundi familija đelo ani durutni phuv te postavin le zako caro, thaj te iril pe.

¹³Akharda gija dešen piren slugen thaj dija len po opaši kila rupuno, thaj vačarda lenđe: 'Trgujin sa đi kaj ni avav.'

¹⁴A e manuša tar lesi phuv ni manglje le thaj bičhalde pe manušen te vačaren e po bare carose: 'Ni manga vov te caruil pe amende.”

¹⁵Thaj kana irisajlo sar caro, vačarda te akharen okolen slugen kase dija o rupunipe, te dičhol so čerde.

¹⁶Tegani avilo o angluno thaj vačarda: 'Barutneja! Ćerdem deš droma po but nego so dijan ma.'

¹⁷Thaj vačarda lese o caro: “But šukar. Tu san šukar sluga! Kana sana manđe šukar ko cikno ak davtu te ave pe deš forura embaro.'

¹⁸Thaj avilo o dujto thaj vačarda: “Barutneja! Ćerdem panđ droma po but nego so dijan ma.”

¹⁹'Šukar! Tu av embaro pe panđ forura.'

²⁰O trito avilo thaj vačarda: “Barutneja! Ake ćo rupunipe. Garadem le ano kotor e šejengo

²¹golese kaj daraljem tutar. Golese kaj san zuralo manuš. Le so naj ćiro, thaj čide so ni sejisadan.”

²²A o caro vačarda lese: “Pal će lafura ka sudiv tut, bilačheja slugo! Đangljan kaj sem zuralo manuš, kaj lav okova so naj mingro, thaj čidav so ni sijisadem?

²³Pa sose ni dijan o srebro e trgovconenđe, thaj me kana ka avav ka čidav gova kamatencar?

²⁴Thaj vačarda kolenđe so ačhile angle leste: “Len gova rupunipe lestar thaj den le okolese so isile deš rupune.

²⁵Thaj vačarde lese: “Barutneja! Le isi le panđ kile rupuno.”

²⁶A o caro vačarda lenđe: 'Golese kaj vačarav tumenđe kole so isi ka dolpe lese, a kole so naj ka lolpe lestar i okova zala so isi le.

²⁷A kolen me dušmajen, save ni manglje te avav lengo caro pe lende, anan len akari, thaj čhinen len angle mande.”'

²⁸Thaj kana vačarda lenđe gova o Isus đelo anglal, thaj đelo upre ano foro Jerusalim.

²⁹Kana avile pašo foro Vitfaga thaj o foro Vitanija pašo brego savo akhardola Maslinsko, bičhalda pe dujen sikaden.

³⁰Vačarda: “Đan ane gova gav angle tumende, thaj ka aračhen cikne here phanglo pe savo nijekh manuš ni uklilo. Putren le thaj anen le.

³¹Thaj ako khoni pučol tumen: 'Sose putren le?' gija vačaren lese: “E Rajose trubul.'”

³²Kana đele, arakhlje sar so vačarda lenđe o Isus.

³³A kana phutarde e cikne here pučlje len e manuša kaso sasa o cikno her: “Sose putren e cikne here?”

³⁴A von vačarde: “E Rajose trubul.”

³⁵Thaj ande le ko Isus, thaj čhute pe fostanura po cikno her, thaj bešljarde e Isuse pe leste.

³⁶Thaj kana đelo o Isus nakaro Jerusalim, e manuša čute pe fostanura ko drom te den čast e Isusese.

³⁷Kana avilo pašo than kaj počnil o brego o Maslinsko, lije but sikade te raduin pe thaj te hvalin e Devle taro jekh glaso so dikhlje e čudesura.

³⁸Vačarde: “Blagoslovimo o caro savo avol ano alav e Rajoso! Mir ko nebo thaj slava ko učipe!”

³⁹Thaj nesave fariseja save sesa maškare manuša vačarde lese: “Učitelju! Vačar će sikadenđe te na phenen gova!”

⁴⁰Thaj o Isus vačarda lenđe: “Phenav tumenđe, ako von khanči ni vačaren, e bara ka vačaren!”