LUKA 19:5-40

⁵Iesu na una gabu ai e kau, e roha dae, e itaia, bena e hamaoroa, eto, Sakaio e, a diho haraḡa, badina be hari dina emu ruma ai baina noho.

⁶Bena e diho haraḡa-haraḡa, ena ruma ai e abia dae mai moalena ida.

⁷E itaia taudia iboudiai ese e maumauraia, eto, Ia ese dika tauna e vadivadi heniamuu.

⁸A Sakaio e gini tore, Lohiabada e hereva henia, eto, Lohiabada e, a itaia, egu kohu kahana na ogoḡami taudia aina henidia, bona ena kohu vada na abia kava tauna na nega hani baina henia lou.

⁹Iesu eto, Harihari hahemauri na ina ruma ai vada eme kau; badina be ia danu Abraham natuna.

¹⁰Badina be Taunimanima Natuna na boio taudia itahudia bona ihamauridia totona ema.

¹¹Bena e kamonaiva taudia na Iesu ese sivarai heḡereḡerena ta ma e hamaorodia; badina be Ierusalem vada e kahira-kahira, bona idia banava eto Dirava ena basileia una negana ai baine hedinarai.

¹²Ia eto, Lohia ta hanua daudauna ela, pavapava dagina baine abia bena ma baine lou mai eto.

¹³Una dainai ena hesiai taudia gwauta e boiridia guna, gold monidia ladadia mina ta ta amo e henidia, eto, Ba hoihoilai ela bona lau baina lou mai.

¹⁴To ena hanua taudia ese e lalo dika heniava; bena hesiai haida ia murina amo e siaidia, baeto “Ai na asia uramu emai pavapava ai bainela”.

¹⁵Pavapava dagina e abia, bena e lou, moni e henidia taudia e boiridia, edia hoihoi ai e davari ḡaudia baine diba eto.

¹⁶Ginigunana ema, eto, Ḡaubada e, emu mina ta amo mina gwauta vada na davari.

¹⁷Ia ese e hanamoa, eto, Namo herea; oi na hesiai taumu namona; ḡau maraḡina o balaia heni namonamo dainai, hanua gwauta lohiadia ai baola.

¹⁸Ihararuana danu ema, eto, Ḡaubada e, emu mina ta amo mina ima vada na davari.

¹⁹Bena ia eto, Hanua ima lohiadia ai baola.

²⁰Ta ma ema, eto, Ḡaubada e, emu mina tamona binai; dabua ai na kumia, na balaia heni;

²¹badina be oi garimu na gariva, oi na gwautora taumu, to atoa diho ḡauna o abia isimu, to hadoa ḡauna o utuamu.

²²A ia eto, Oi na hesiai taumu dikana; sibomu emu hereva amo baina hahemaoro henimu. Oi na dibamu lau na gwau-tora taugu, asina atoa diho ḡauna na abia isimu bona asina hadoa ḡauna na utuamu.

²³Matogana: edeheto egu moni na bank taudia dekedia to laohaia; bena bama lou mai, bama abia lou mai ato-kauna ida?

²⁴Bena dekenai e gini taudia e haduadia, eto, Enai mina na avabihaia, mina gwauta tauna ba henia.

²⁵Idia eto, Ḡaubada e, ia na mai ena mina gwauta.

²⁶Ia ma eto, Lau na hamaoromuimu, mai ena ḡau tauna na ḡau momo bae henia; to asi ena ḡau tauna enai sina miana ḡauna do bae abihaia.

²⁷A lau inaigu, asie urava baina lohiadia taudia, a mailaidia, vairagu ai bavaladia mase.

²⁸Una hereva muridiai Iesu ese e gunalaidia, Ierusalem ai eha dara dae.

²⁹Ia na e raka lao, ela bona Betefage bona Betania, Olive ororona hanuadia, vada e kahira-kahira. Bena ena hahediba rarua e siaidia guna,

³⁰eto, Vairada hanuana aola, bena ba raka vareai gabuna ai doniki natuna ta hemata-kauna ai ba itaia, latanai tau ta do se helai kau; ba ruhaia, ba mailaia.

³¹A ta ese baine nanadaimui, baineto “Dahaka dainai ena doniki natuna o ruhaiamu?” umui baoto “Lohiabada ese e ura heniamu”.

³²E siaidia taudia na vada ela, e hamaorodia heḡereḡerena ai vada e davaria.

³³ldia ese doniki natuna e ruhaiava ai, doniki biaguna ese e nanadaidia, eto, Dahaka dainai doniki natuna o ruhaiamu?

³⁴Idia eto, Lohiabada ese e ura heniamu.

³⁵Idia ese doniki natuna na Iesu dekena e hakaua lao, bona edia dabua na doruna ai e laha; bena Iesu e helai kau.

³⁶Laona ai, idia ese edia dabua na dala ai e laha.

³⁷Hanua vada e kahikahi, Olive ororona e hekei, bena hahediba hutuma bada e moale hisi dae, Dirava e imodaia, e itava karadia siahudia iboudiai daidiai.

³⁸Idia eto, Hanua Pavapavana, Lohiabada ladana ai e maimu, aita hanamoa; Maino guba ai baine bada, Bona heimodai guba doriva-dorivana ai.

³⁹Bena Farisea taudia haida ese hutuma bogaragidia amo ia e hamaoroa, eto, Hahediba taumu e, emu hahediba na a gwau henidia.

⁴⁰A ia ese e haere henidia, eto, Lau na hamaoromuimu, idia na bema asi reḡereḡedia, ini nadi bema lolo.