Luke 19:5-40

⁵Da Yesu ye ni bubu'a, a nzuya shu nda hla wu, “Zakka, grji ue gbagbla, don luwa gbigbi me son koh me.”

⁶U wa grji nitsu me nda ye kpa ni ngyiri.

⁷Da ko nha a toh, baka na son na wawu mbawu, nda tre, “A ye hi ziri ni koh ndji u lahtre.”

⁸Zakka kri nda hla ni Bachi, “Toh mba Bachi, nh'ma ha u kpie me he wu'a me nno bi ya, mba u mita mla ndrjo kpieri, me nno nkpu nza rjula.”

⁹Yesu hla niwu, “Luwa cheto aye ni koh yi don wawu me ahi Vren Ibrahim.

¹⁰E, Ivren Ndji a ye wah nda kpa bi wa ba kado'a chuwo.”

¹¹Da ba wo tre ba, a trenda hla misali ri ni bawu, ka ahe whiwhre ni Wurushelima, u ba ban koh mulki Irji tiewhre u ye.

¹²A tre towa, “Indji ri wa ani to tie a hi ni gburi gbugbanmu nda hi kpa chu nda kma ye.

¹³A yo mri koh ma wlon nda nno ba pa wlon, nda hla bawu, 'Hi kasran niwu gbien kma yemu.'

¹⁴Amma indji ma ba kranwu nda nton ndji mba bari hu gonma nda hla, 'Kie na kpanyime ndi ndu ndi yi ndu chu mbu na.'

¹⁵Ba he wa aka kpa chu nda kma ye, a ndu ba yo gran ma ba wa anno ba inklen nda to riba wa ba tie.

¹⁶U mumla a ye niwu nda tre, 'Bachi mu, pa me'a wa une'a a nji pa wlon ye nha.'

¹⁷Ichu'a hla wu, u toh tie, u gran ndindi, Ni wa u toh tie ni kpie tsitsa ma, u he ni igbu zan wlon wa wu nji mba.'

¹⁸U ha ye nda tre, pa me Bachi, a nji pa ton bari ye.'

¹⁹Ichu'a hla wu, 'U kpa gbu ton wa wu nji'a.

²⁰Iri ye nda tre, Bachi, ngye pa me'a yi, mi ka ri mlazi ni mi kpi,

²¹don mi klu sissri me, don u ndji u nno ya. U ban ni bubu wa una zi'a na.

²²U chu'a hla wu, 'Ni tre u nyu me ba me han tre'a nitu me, wu meme gran. Wu toh ndi mi ndji wa mi wa bran, ni ban ikpi wa mi na kazi'a na, u me hi vu ikpie'a mi na chuna.

²³Don ngye una yo nklen ni banki toh mi na kma ye mika kpa nha ni a hon tuma (riba) na?

²⁴Ichu'a hla bawu wa ba kri wu'a, 'kpa pa wa ahe ni wu'a, ndi ka nno u pa wlon'a.'

²⁵Ba hla wu, Bachi, a he ni pa wlon.'

²⁶Mi hla yiwu, indji wa a he wu'a, ba nno tia, amma uwa a hama wu'a, ba kpa mbru wa ahe niwu.

²⁷Amma biyi, bi yo shishi nime, bi wa bana nyime ndu me chu mba na, nji ba ye wayi ndi wu ba ni shishi mu.'”

²⁸Da a hla tre bi yi, a vu gon ma hi Wurushelima

²⁹Ba he me wa a ye whiwhre ni Baitfaji mba Baitanya, nitu ngblu wa ba yo ndi Zaitun, wa ka ton mri koh ma harhi,

³⁰ndi, “Hi nimi vi gbu wa ahe ni ko shishi mbi'a. Bita ta ri, bi toh vren nakpron wa bana honwu to na. Siwu ndi njiwu yemu.

³¹Indrjo nita mye yi, 'Bi siwu ni ngye?' Bika hla, Bachi mba ni son.'”

³²Biwa ba ton ba, bahi nda kato vren na pron'a towa Yesu a hla bawu'a.

³³Baka ki si vren nagro, kikima baka mye ba, “Bi si vren nakpron ni ngye?”

³⁴U ba tre, “Bachi ni son.”

³⁵Ba nji ye ni Yesu, nda lba ba kpi mba ni tu vren nakpron nda ban Yesu sa tuma.

³⁶Da si zren, baka lba ikpi bi sru kpa mba ni tu nkon.

³⁷A tie whiwhre ni blaba ngblu Zaitun, u gbuj'bu mri koh ma baka ku'u ngyiri nda ni gbre Irji san ni ngyiri kpukpo me nitu wa ba toh ikpie wa atie'a wa nno ba sissri,

³⁸nda tre, “ Lulu a hi'u chu wa asi ye nimi nde TieTie! Salama ni shulu daraja wa a zan dauka!”

³⁹Farisawa bari nimi jbu hla wu, “Ticha yra nha ba”

⁴⁰Yesu a sa bawu, Mi hla yiwu njanjimu, biyi bata ki ngbangbi, tita ba yra gro.”